اقيقاتقا اينالعان ارمان

ون ساۋساعىنان ونەر تامعان كاسىپكەر كەلىنشەكتىڭ ەندىگى ويى – «ءسان ءۇيىن» اشۋ سالتانات ەڭبەكتىڭ قادىر-قاسيەتىن جاس­تايىنان اجەسىنەن ۇيرەندى. اۋىل-ايماققا «ويماقتىنىڭ شەبەرى» اتانعان جارىقتىق ت ۇلىمشاعى جەلبىرەگەن ون قىزدىڭ اراسىنان ەكى جاسىندا قۇلاپ, مۇگەدەكتىككە ۇشىراعان ءۇيدىڭ ۇلكەنى – ونى جانىنان ءبىر ەلى تاستامايتىن. اجەسى ءىس تىگىپ جاتقان كەزدە ءجىپسىز بايلانىپ وتىراتىن. بىرەسە ينە ساباقتاتىپ, بىرەسە ماتا كەستىرىپ, ايتەۋىر, تىنىم تاپتىرمايتىن. «ويىن بالاسى» ەمەس پە, دالادا ق ۇلىن-تايداي اسىر سالىپ ويناپ جۇرگەن باۋىرلارىنا ەلەڭدەپ, زىتا جونەلمەككە ىڭعايلانا بەرگەندە تاعى ءبىر جۇمىستىڭ «قۇلاعىن» ۇستاتا قوياتىن. بۇگىندە ويلاپ وتىرسا, كەيۋانا نەمەرەسىنىڭ دەنساۋلىعىنىڭ دىمكاستىگىنە الاڭداپ, وزگەگە كۇنىن تۇسىرمەي ناپاقاسىن ادال تاۋىپ جەسە دەگەن ىشكى ۋايىم جەتەگىندە جۇرسە كەرەك. سوعىس جىلدارى تىگىنشىلىكتى كاسىپ ەتىپ, ۇلكەن وتباسىن اسىراعان قايسارلىعىنا تاڭعالاتىن. «سىرتقى, ىشكى كيىمدەر تىگىپ, ورىس اۋىلدارىنىڭ تۇرعىندارىنا نانعا, كارتوپقا ايىرباستايتىنبىز. اللا تاعالا بەرگەن ونەردىڭ ارقاسىندا شيەتتەي بەس بالانى قاتارىنان كەم قىلماي ءوسىرىپ, ازامات قاتارىنا قوستىم. مەنىڭ جولىمدى سەن جالعاستىرساڭ, ارمانىم بولماس ەدى», دەگەن ءسوز مۇسىركەگەندىكتەن ەمەس, ۇلكەن سەنىم ارتقاندىقتان ايتىلاتىن ەدى. سالتانات قايدا جۇرسە دە, اجە اماناتىن ەستەن ءبىر شىعارعان ەمەس. تاۋداي تالاپ جۇگىن ارقالاپ, وبلىس ورتالىعىنداعى № 42 تەحنيكالىق ۋچيليششەگە وقۋعا ءتۇستى. ونى بىتىرگەننەن كەيىن جامبىل اۋدانىنا قاراستى وزەرنىي اۋىلىنداعى تۇرمىستىق كومبيناتقا جۇمىسقا ورنالاستى. العاشقى ەڭبەك جولىن تىگىنشىلىكتەن باستاپ, كەيىن مەڭگەرۋشىلىككە جوعارىلاتىلدى. تاعدىردىڭ جازۋىمەن قوستانايدىڭ پەداگوگيكا ينستيتۋتىن ءتامامداپ كەلگەن جاس مامان سەيدىلمالىك دەگەن جىگىتپەن كەزدەسىپ, تۇرمىس قۇردى. تۇڭعىشى اداي دۇنيەگە كەلگەندە شوبەرە سۇيسەم دەگەن تىلەگىنە جەتە الماعان اجەسىنىڭ «قايدا جۇرسەڭ دە امان بول, ق ۇلىنىم!» دەگەن ءاجىم تورلاعان جىلى ءجۇزى كوز الدىنا ەلەس­تەپ, كوڭىلى بوساپ سالا بەرگەن. ەكىنشى ۇلى ادىلبەكتىڭ ىڭگالاعان ءۇنى شاڭىراق شاتتىعىن تولتىردى. بۇگىندە سالتانات اسكەرقىزىنىڭ تىگىنشىلىكپەن اينالىسقانىنا 34 جىل بولىپتى. ونىڭ قولىنان شىققان كەز كەلگەن بۇيىمنىڭ ءتۇر ۇيلەسىمدىلىگى, ءسان ۇلگىسى, تىگىستەرى مەن ويىقتارىنىڭ اسەم قيىستىرىلعاندىعى سونشالىق, كوزدىڭ جاۋ­ىن بىردەن الادى. اڭگىمە بارىسىندا ول كاسىبي شەبەرلىك ۇيرەنۋمەن, ىزدەنۋمەن قالىپتاساتىنىن ايتا كەلىپ, تىگىنشىلىكتى كاسىپ ەتىپ, وتباسىلىق ناسىپكە اينالدىرعانىنا وكىنبەيتىنىن جەتكىزدى. كەز كەلگەن كيىمدى بويعا قونىمدى ەتىپ, شەبەرلىكپەن تىگۋ ۇيرەنشىكتى ادەتىنە اينالعانى بىردەن بايقالادى. وسى كەزگە دەيىن «زينگەر» ەسكى تىگىن ماشينكاسىمەن جۇمىس ىستەپ كەلسە, ەندى سوڭعى ۇلگىدەگى شۆەيتساريالىق قۇرال ساتىپ العانىنا شەكسىز قۋانۋلى. بۇل ورايدا, «دامۋ» كاسىپكەرلىكتى دامىتۋ قورى مەن «كازكوممەرتسبانكتىڭ» «قۇس جولى» كورپوراتيۆتىك قورىنىڭ بىرلەسىپ, مۇمكىندىگى شەكتەۋلى جاندارعا ارنالعان «جۇلدىزدارعا قارا!» جوباسىنا قاتىسىپ, قايىرىمدىلىق گرانتىن جەڭىپ العان. سونىڭ ارقاسىندا كاسىبىن ودان ءارى جانداندىرىپ, جەكە كاسىپكەرلىگىن زاڭدى تۇردە رەسىمدەۋ مۇمكىندىگىنە يە بولعان. – ەڭ باستىسى, زاماناۋي تىگىن ماشينكاسىنا باعدارلامانى دۇرىس ەنگىزە ءبىلۋ كەرەك. باستاپ­قى­دا مەڭگەرۋ قيىنعا سوقتى. تەحني­كانىڭ تىلىنە جەتىك ۇلىم­نىڭ ارقاسىندا بارلىق باعدار­لامالاردى تەز-اق ۇيرەنىپ الدىم. تۇتىنۋشىلاردىڭ كەز كەلگەن تالعامىن ورىنداۋ مۇمكىندىگى دە ۇلعايدى. كەيبىرەۋلەر ينتەرنەتتەن كورىپ ۇناتقان كيىم ۇلگىسىنىڭ كوشىرمەسىن اكەلىپ, قولقا سالىپ جاتادى. ولاردىڭ وتىنىشتەرىن ەكى ەتكەن ەمەسپىن,– دەيدى سالتانات. تىگىنشىلىكپەن جۇيەلى شۇ­عىل­دانۋدىڭ ارقاسىندا وتباسىنىڭ تابىسى مولايا تۇسكەن. نەسيە ارقىلى ءۇي العان. ونىڭ ايتۋىنشا, انشىلەر مەن بيشىلەردەن تاپسىرىس ءجيى تۇسەتىن كورىنەدى. بالالار كيىمى, قۇدالىق, قىز ۇزاتۋ, كەلىن ءتۇسىرۋ جاساۋ-جابدىقتارىنا, ويۋلى كورپە-جاستىقتارعا ۇسىنىستار كوپ. قابىلداعان تاپسىرىستاردى دەر كەزىندە ءارى ساپالى ەتىپ ورىنداۋ – ونىڭ مىندەتى. ەشقانداي شاعىمداردىڭ ايتىلماۋىنا قاراعاندا, جۇرتشىلىق كوڭىلىنەن شىققان ءتارىزدى. جازدا كۇنى بويى باۋ-باقشادا بولاتىندىقتان, كەشكىلىك باستالعان جۇمىستىڭ ءتۇننىڭ ءبىر ۋاعىنا دەيىن سوزىلىپ كەتەتىن كەزدەرى ءجيى كەزدەسەدى. ال قىستا ناعىز تاپتىرمايتىن ەرمەك. شەبەردى قۋانتاتىن ءبىر جاي, تىگىن­شىلىككە قاجەتتى زات­تار­دىڭ دۇكەن سورەلەرىندە تولىپ تۇرعاندىعى. قولونەر دە شىعارماشىلىق ىزدەنىستەن تۋىندايتىنى انىق. سوندىقتان سالتانات اركەز قيال مەن ارمان قۇشاعىندا ءجۇرىپ, ءبىر-بىرىنە ۇقسامايتىن جاۋھار تۋىندىلاردى تۇتىنۋشىلارعا ۇسىنۋعا بەيىل. اجە اماناتىنىڭ, بالا ارمانىنىڭ اقيقاتقا اينالىپ, ەڭبەكتىڭ ريزىعىن تاتىپ وتىرعان باقىتتى كۇنگە جەتكەنىنە شۇكىرشىلىك ەتەدى. – جۇبايىم كوللەدجدە ۇستاز­دىق ەتەدى. ۇلكەن ۇلىم جۇمىس ءىس­تەيدى. كىشى ۇلىم بيىل اسكەري ينستيتۋتتى بىتىرەدى. ەڭبەكتىڭ ءدا­مىن تاتقان بىلەر دەگەن. الداعى ماقساتىمىزدىڭ ءبىرى – پاتەردى كەڭەيتىپ, اكە-شەشەمىزبەن بىرگە تۇرۋ. جاستاۋ كەزىمدە «ءسان ءۇيىن» اشۋدى ارمانداۋشى ەدىم. ول كۇنگە دە جەتەرمىن. ەڭ باستىسى, ەلىمىزدىڭ تىنىشتىعىن تىلەيىك, باسىمىز امان, باۋىرىمىز ءبۇتىن بولسىن!–دەدى قوشتاسار ساتتە ءوز ءىسىنىڭ مايتالمانى س. قاراعوجينا. گۇلگۇل تولەشوۆا, جۋرناليست. سولتۇستىك قازاقستان وبلىسى.