سۋرەتتى تۇسىرگەن – ەرلان ومار, «EQ»
كەيىنگى جىلدارى ءبىلىم سالاسى ۇلكەن سەرپىلىستەر مەن وزگەرىتەردى باستان وتكەردى. قازىرگى وقۋشىلاردىڭ ويلاۋ جۇيەسى تىم جىلدام دامىپ كەلەدى. وقۋشىنىڭ قاجەتتىلىكتەرى مەن ونىڭ دەڭگەيىنە ساي ساباقتى قۇرىلىمداپ, ونى ساۋاتتى جوسپارلاۋ قازىرگى تاڭدا وتە وزەكتى. ۇلى ۇستاز ىبىراي ءالتىنساريننىڭ «وقىعاندى كوڭىلگە, ىقىلاسپەن توقىڭىز!» دەگەن جىرىنىڭ تۇپكى ءمانى تەرەڭ. العان ءبىلىمىن كوكىرەگىنە ءتۇيىپ, ودان وزىنە ءبىر ساباق الماسا, قۇر جاتتاپ العان ءبىلىمنىڭ بالانىڭ بولاشاعى ءۇشىن ەشقانداي ماڭىزى جوق. وقۋشىنى وقۋعا ىنتالاندىرۋ ءۇشىن, نە ءۇشىن وقۋ كەرەك, جالپى ءبىلىمنىڭ ادام ومىرىندە قۇندىلىعى قانداي؟ وسى سۇراقتىڭ جاۋابىن بالانىڭ ساناسىنا قۇيا ءبىلۋ كەرەك. عالامتوردىڭ سيقىرلى الەمىندە بالانىڭ نازارىن وزىنە تارتىپ, ءتۇرلى قىزىلدى-جاسىلدى قىزىعىمەن ساباققا قاراۋعا مۇرشا بەرمەيدى. مۇعالىمنىڭ بۇل تۇرعىدا باستى قارۋى – ساباقتا قولدانىلاتىن ءتيىمدى, قىزىقتى, تابىستى, ساپالى ءادىس-تاسىلدەر. ول ءۇشىن بالانىڭ قىزىعىشىلىعى مەن قاجەتتىلىگىن ەسكەرۋ قاجەت. بالالار جاڭا تەحنولوگيانى تىم جىلدام يگەرەدى. ساباققا قاتىستى ويىن ۇلگىسىندەگى قىزىقتى ادىستەردى قولدانىڭىز. «وقىعانىڭدى ايتپا, توقىعانىڭدى ايت» دەگەن حالىق دانالىعىندا وقۋشىنىڭ ءار ساباقتان ءبىر وي ءتۇيۋى ماڭىزدى ەكەندىگىن بىلدىرەدى. ويلانۋعا داعدىلاندىراتىن ادىستەر, ونى تۇلعا رەتىندە پىكىرى ماڭىزدى ەكەنىن كورسەتە بىلگەندە, ءار وقۋشىنىڭ يدەياسىن تەرەڭ ساراپتاعاندا, ساباقتىڭ ءتۇرلى فورماتتا, ءارتۇرلى رولدىك ويىندارمەن وتكىزگەندە وقۋشىنىڭ ساباققا ىنتاسى ارتادى. ىنتاسىن وياتىپ, قىزىقتىرىپ وتكىزىلمەگەن ساباق وقۋشىنىڭ جادىندا ۇزاق ساقتالمايدى.
زاماناۋي مۇعالىمدەردى تولعاندىراتىن ماسەلەلەر كوپ. سونىڭ ەڭ نەگىزگىسى – وقۋشىنى وقۋعا قالاي ىنتالاندىرۋدىڭ سىرى. قازىرگى بالالاردا نازاردى شوعىرلاندىرۋدا, بىلىمگە شىنايى ىقىلاسپەن كىرىسىپ وقۋدا ۇلكەن ماسەلە بار. ونى شەشۋ ءۇشىن ۇستازدار قاۋىمى ۇنەمى ىزدەنىپ, جاڭا ادىستەردى ويلاستىرىپ, يدەيالارىن دامىتىپ وتىرادى. كەز كەلگەن ءىستى ىنتا-ىقىلاسپەن ورىنداسا, ونىڭ ناتيجەسى دە كوپ كۇتتىرمەيدى. قورىتىندى ويىم, وقۋشىلاردىڭ وقۋعا ىنتاسىن وياتا بىلگەن ۇستاز وقۋشىلاردىڭ بولاشاعىنىڭ جارقىن بولۋىنا جاساپ جاتقان ەڭ ۇلى ءىسى. وقۋشى كەزدەن وقۋعا ىنتاسى ويانسا, ول ءومىر بويى ىزدەنۋگە, دامۋعا, وسۋگە, جاڭا نارسەنى بىلۋگە قۇشتار بولادى. بۇل – تابىستى تۇلعانىڭ باستى قاسيەتى. تابىستى تۇلعا قالىپتاستىرۋدا وقۋشىلاردىڭ وقۋعا ىنتاسىن وياتا بىلەيىك!
ايناگۇل تابۋلدينا,
قازاق ءتىلى مەن ادەبيەتى مۇعالىمى
قاراعاندى وبلىسى,
قارقارالى اۋدانى
