فوتو: turkystan.kz
قۇلسارى قالاسىنىڭ «بولاشاق» شاعىن اۋدانىنداعى العاشقى 80 ءۇي «قازاقستان حالقىنا» قوعامدىق قورىنىڭ قاراجاتى ەسەبىنەن سالىنادى.
اتىراۋ وبلىسىنىڭ قۇرىلىس باسقارماسىنىڭ باسشىسى نۇربەرگەن قۇسايىنوۆتىڭ ايتۋىنشا, بۇگىندە توپىراقتى تەگىستەۋ جۇمىستارىنا ءۇش مەردىگەر ۇيىمنىڭ 20 ارنايى تەحنيكاسى مەن 30 جۇمىسشى جۇمىلدىرىلعان.
- قازىرگى ۋاقىتتا ىرگەتاس قۇرىلىسىمەن قاتار, جاڭا شاعىن اۋدانعا جول ينفراقۇرىلىمىن سالۋ جۇمىستارى باستالدى. قالعان ينجەنەرلىك كوممۋنيكاتسيالار جۇرگىزىلىپ تۇر, - دەدى نۇربەرگەن قۇسايىنوۆ.
اتىراۋ وبلىسىنىڭ اكىمدىگىمەن ارادا قول قويىلعان مەموراندۋم شەڭبەرىندە, جەرگىلىكتى اتقارۋشى ورگان جاڭا ۇيلەر سالۋ ءۇشىن جەر ۋچاسكەلەرىن سۋعا كەتپەيتىن قاۋىپسىز ايماقتاردان ءبولۋدى قامتاماسىز ەتۋدە. سونداي-اق جەرگىلىكتى اتقارۋشى ورگان قۇرىلىس جۇرگىزۋ مەرزىمى مەن تەحنيكالىق تالاپتاردى ساقتاي وتىرىپ, قۇرىلىس جۇمىستارىنىڭ ساپاسىن باقىلايدى.
