بۇگىندە وسكەمەندە قابىرعاعا سۋرەت سالۋ جاقسى ۇردىسكە اينالا باستادى. ءى.ەسەنبەرلين داڭعىلى بويىنداعى بەس قاباتتى كىرپىش ءۇيدىڭ قابىرعاسىنا تۇسكەن الاش كوسەمى ءاليحان بوكەيحان پورترەتى كۇللى قازاقتىڭ رۋحىن كوتەرگەندەي.
تاياۋدا قوس سۋرەتشى ەرجان تاناەۆ پەن ءالي زاكير قىلقالامىن ارقالاپ, الماتىدان تاعى كەلدى. بۇل جولى قازىبەك بي داڭعىلى بويىنداعى توعىز قاباتتى ءۇيدىڭ قابىرعاسىنا مايدانگەر قۇرمات راحيموۆتىڭ پورترەتىن بەينەلەدى. ايتا كەتەيىك, ارداگەر اقساقال بيىل عاسىر تويىن تويلايدى. قىرقىنشى جىلدارى وت پەن وقتىڭ ورتاسىندا جۇرگەن باتىر باباعا قالا اكىمدىگى تاراپىنان كورسەتىلگەن قۇرمەت رەتىندە سۋرەتىن ۇلكەن داڭعىلدىڭ بويىنداعى قابىرعاعا سالعىزدى. 1943 جىلى نەبارى 16 جاسىندا ەڭبەك ارمياسىنا الىنعان قۇرمات اقساقال العىرلىعىمەن كوزگە ءتۇسىپ, 1944 جىلى 579-اتقىشتار پولكىندە جاپون مايدانىندا بولعان.
سونىمەن قاتار سۋرەتشىلەر 19-شاعىن اۋدانداعى كوپقاباتتى ۇيلەردىڭ تاعى بىرىنە پوليتسيا قىزمەتكەرلەرىنە ارنالعان مۋرال سالدى.
– اۋا رايى كەدەرگى بولماسا, ءبىر مۇرالدى ءۇش-ءتورت كۇندە سالىپ تاستايمىز. ارينە, وڭاي جۇمىس ەمەس. الدىن الا ارنايى قۇرىلعىمەن قابىرعاعا سۋرەتتىڭ كونتۋرىن ءتۇسىرىپ الامىز. سودان كەيىن بارىپ بويايمىز, – دەيدى قىلقالام شەبەرى ەرجان تاناەۆ.
كوشەلەردىڭ كوركى كىرىپ, ءماندى دە ءساندى سۋرەتتەردىڭ سالىنىپ جاتقانىنا تۇرعىندار دا قۋانىشتى. قالالىقتار مەن قوناقتار مەنمۇندالاپ تۇرعان قابىرعالاردىڭ قاسىندا سۋرەتكە ءتۇسىپ ءماز.
وسكەمەن
