ءسابيدىڭ اناسى بالاسىنىڭ اۋرۋحاناعا العاش قاڭتار ايىندا تۇسكەنىن, ەمحانادا جۇرەككە جاسالعان ۋلترادىبىستىق زەرتتەۋى نەگىزىندە «تەترادا فاللو» دياگنوزى قويىلعانىن ايتادى. سول ۋاقىتتا دەرەۋ اۋرۋحاناعا جاتقىزىلىپ, ءبىر ايدان كەيىن وپەراتسيانىڭ ءبىرىنشى كەزەڭىن جاساعان.
كارديولوگيالىق ورتالىقتىڭ حيرۋرگتەرى جۇيەلى-وكپە اناستوموزى وپەراتسياسىنىڭ ءبىرىنشى كەزەڭىن جاسادى. ارتەريا تارىلعان جەردە وكپە ارتەرياسىنا ستەنت ورناتىلدى. بۇل بولاشاقتا اقاۋدى تۇزەتۋگە جانە راديكالدى وپەراتسيا جاساۋعا مۇمكىندىك بەرەدى ەكەن.
– ءسابي اۋرۋحاناعا اۋىر حالدە ءتۇستى. ءبىز وپەراتسيانىڭ ءبىرىنشى كەزەڭىن جۇرگىزدىك. بۇل سوعىپ تۇرعان جۇرەككە جاسالادى. وپەراتسيا بالانىڭ قالىپتى دامۋىنا, جۇرەكتىڭ تولىعىمەن تۇزەتۋگە دايىندالۋىنا كومەكتەسەدى. 4-5 ايدان سوڭ وپەراتسيانىڭ ەكىنشى كەزەڭىن جاساۋ كەرەك. بۇل فاللو اقاۋىن تۇبەگەيلى تۇزەتۋگە مۇمكىندىك بەرەدى, – دەيدى №2 كوپسالالى اۋرۋحانانىڭ بالالار كارديوحيرۋرگياسى بولىمشەسىنىڭ مەڭگەرۋشىسى جانات بولاتبەك ۇلى.
ماماندار «تەترادا فاللونى» ءتورت اناتوميالىق انوماليانى بىرىكتىرەتىن تۋابىتكەن جۇرەك اقاۋى دەپ تۇسىندىرەدى. قارىنشالىق پەردە اقاۋى, ورتانىڭ ىعىسۋى, وڭ جاق قارىنشانىڭ ستەنوزى جانە گيپەرتروفياسى. جۇرەك اقاۋى قاننىڭ وتتەگىمەن قانىعۋ دەڭگەيىنىڭ بىرتىندەپ تومەندەۋىنە اكەلەدى. بۇكىل اعزانىڭ جۇمىسىندا وزگەرىس پايدا بولادى, يممۋنيتەت تومەندەيدى, مي قىزمەتى جانە اعزانىڭ جالپى دامۋى باياۋلايدى. ناۋقاستىڭ جۇرەك ۇستاماسى كەزىندە دەنەسى كوگەرەدى, جىلدام تىنىستاي باستايدى, مازاسىزدانادى.
ۋاقىتىندا جاسالعان وپەراتسيانىڭ وڭ ناتيجەسىندە ماماندار كىشكەنتاي ناۋقاسقا تۋابىتكەن جۇرەك اقاۋىن كەزەڭ-كەزەڭىمەن تۇزەتىپ, تولىققاندى ءومىر سۇرۋگە مۇمكىندىك جاساۋعا تىرىستى. بۇل وپەراتسيا قىمبات ءارى كۇردەلى ەكەن. ءدارى-دارمەك پەن مەديتسينالىق ەم-شارالار كوپ ۋاقىتتى قاجەت ەتەدى. ونى تەگىن مەديتسينالىق كومەكتىڭ كەپىلدىك بەرىلگەن كولەمى جانە ءمامس جۇيەسى اياسىندا الادى.
قاراعاندى وبلىسى
