فوتو: t.me/qr_tjm
ءبىر كۇندە باسپاناسىنان, دۇنيە-مۇلكىنەن ايىرىلعان تۇرعىندار جانايقايىن جەرگىلىكتى اتقارۋشى ورگانعا جەتكىزۋ ءۇشىن وسىنداي قادامعا باردى.
اكىمدىك عيماراتىنىڭ الدىنداعى الاڭعا جينالعان تۇرعىنداردىڭ تالابىن الدىمەن جىلىوي اۋدانىنىڭ اكىمى جۇمابەك قاراجانوۆ تىڭدادى. كەيىن وبلىس اكىمىنىڭ ورىنباسارى جاسۇلان بيسەمبيەۆ قۇلسارىعا ارنايى باردى. ءبىر كۇننەن سوڭ وبلىس اكىمى سەرىك شاپكەنوۆ قۇلسارىلىق تۇرعىندارمەن كەزدەستى.
وبلىس اكىمى شىرىلداعان تۇرعىندارعا كەلتىرىلگەن شىعىندى تولەۋدەگى ەرەكشەلىكتەردى ءتۇسىندىردى. اكىمنىڭ ايتۋىنا قاراعاندا, اپاتتى دەپ تانىلعان, جوندەۋ جۇرگىزۋگە شەشىم قابىلدانعان ۇيلەر ءۇشىن وتەماقى بەرىلەدى. بىراق وتەماقى دا, زالال شىعىنى دا نارىق باعاسىنا سايكەس تولەنەدى.
«بارلىق زارداپ شەگۋشىگە بىردەي سومادا وتەماقى بەرۋ مۇمكىن ەمەس. باعالاۋ كەزىندە كوپتەگەن پارامەتر, اتاپ ايتقاندا, قۇرىلىس ماتەريالدارىنىڭ ساپاسىنان باستاپ ۇيدەگى ەسىكتىڭ سانىنا دەيىن ەسكەرىلەدى. سوندىقتان اپاتتى ءۇيدى جوندەۋ جانە تولەۋ سوماسى ءارتۇرلى بولادى. قازىر ءۇيدى تۇرۋعا جارامسىز دەپ تانىعان كەزدە ورتاشا وتەماقى ءبىر شارشى مەتر ءۇشىن شامامەن 200 – 240 مىڭ تەڭگە ارالىعىندا بەلگىلەندى», دەدى س.شاپكەنوۆ.
اكىمنىڭ دەرەگىنە سۇيەنسەك, قازىر قۇلسارى قالاسىنداعى تاسقىن سۋ باسقان ۇيلەردى باعالاۋ جۇمىسى جالعاسىپ جاتىر. ونى وسى اپتانىڭ سوڭىنا دەيىن اياقتاۋ جوسپارلانىپ وتىر. ال جىلجىمايتىن م ۇلىكتى باعالاۋ كوميسسياسىنا 2 727 ءوتىنىش تۇسكەن.
«تاسقىن سۋ باسقان 1 مىڭعا جۋىق ءۇي اپاتتى دەپ تانىلدى. قازىر 500 تۇرعىنعا باعالاۋ قورىتىندىسى تۋرالى اقپارات بەرىلدى. ونىڭ ىشىندە اپاتتى ءۇيدىڭ 105 يەسى, باسپاناسىنا كۇردەلى جوندەۋ جۇرگىزىلەتىن 53 تۇرعىن وتەماقى سوماسىنا كەلىسىپ, كەلىسىمشارتقا وتىردى. تۇرعىن ۇيلەردى باعالاۋ وسى اپتانىڭ سوڭىنا دەيىن جۇرگىزىلەدى. ماماندار تاۋلىك بويى جۇمىس ىستەپ ءجۇر», دەدى وبلىس اكىمى.
اۋدان ورتالىعى – قۇلسارى قالاسىنداعى «بولاشاق» شاعىن اۋدانىندا 70 ءۇيدىڭ قۇرىلىسى باستالدى. بۇل شاعىن اۋداندا 150 ءۇي سالۋ جوسپارلانىپ وتىر.
«تاسقىن سۋدىڭ سالدارىنان زارداپ شەككەن 301 كاسىپكەردەن كەلتىرىلگەن شىعىندى وتەۋ جونىندە ءوتىنىش ءتۇستى. زارداپ شەككەن كاسىپكەرلەرگە كەڭەس بەرۋ ورتالىعى اشىلدى. ال تۇرعىنداردان م ۇلىكتىك زالالدى وتەۋگە 2 707 ءوتىنىش ءتۇسىپ, ونىڭ 416-سىنىڭ قورىتىندىسى دايىن بولدى. م ۇلىكتىك زالال ءۇشىن 150 ايلىق ەسەپتىك كورسەتكىش مولشەرىندە وتەماقى بەرىلەدى», دەدى س.شاپكەنوۆ.
جىلىوي اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى نۇرتاس قۋاتباەۆتىڭ مالىمەتىنشە, تاسقىن سۋدىڭ سالدارىنان تۇرعىندار يەلىگىندەگى 876 مال مەن 532 قۇس ولگەنى انىقتالىپ وتىر. وسىعان بايلانىستى اتالعان بولىمگە 101 ءوتىنىش ءتۇسىپتى.
«سۋ تاسقىنى كەزىندە ولگەن مالدىڭ ىشىندە 697 قوي-ەشكى, 93 ءمۇيىزدى ءىرى قارا, 55 جىلقى, 31 تۇيە جانە 532 قۇس بار. 20 مامىردان بەرى 23 تۇرعىنعا ولگەن مالىنا جالپى سوماسى 25,6 ملن تەڭگەنىڭ وتەماقىسى تولەندى. ەندى 78 تۇرعىنعا وتەماقى مامىردىڭ سوڭىنا دەيىن تولەنەدى. وتەماقىنىڭ جالپى سوماسى 93,5 ملن تەڭگەنى قۇرايدى», دەيدى ن.قۋاتباەۆ.
قۇلسارى قالاسىنا توتەنشە جاعداي ەنگىزىلگەن 4 ساۋىردەن بەرى 1 مىڭ توننادان اسا گۋمانيتارلىق كومەك جەتكىزىلدى. وسىنداعى ەرىكتىلەر شتابىنىڭ جەتەكشىسى جانارگۇل شارعاباەۆانىڭ ايتۋىنشا, گۋمانيتارلىق كومەك ورتالىعىندا ازىق-ت ۇلىكتىڭ مول قورى بار. ازىق-ت ۇلىكتى 60-قا جۋىق ەرىكتى تۇرعىندارعا تاراتىپ ءجۇر.
«سۋ تاسقىنىنان زارداپ شەككەن تۇرعىندارعا ازىق-ت ۇلىك ارنايى كەستەگە سايكەس تاراتىلادى. قازىر 500-گە جۋىق وتباسىن قاجەتتى زاتتارمەن قامتاماسىز ەتىپ وتىرمىز. جاقىندا 20 توننالىق جۇك كولىگىمەن گۋمانيتارلىق كومەك جەتكىزىلدى. ونى 4 پۋنكت ارقىلى تاراتۋدى قولعا الدىق. قازىر ۇن, مۇزداتىلعان قۇس ەتى, جۇمىرتقا, جارما, جايالىق پەن توسەك جابىندىسى سەكىلدى ازىق-ت ۇلىك پەن قاجەتتى زاتتاردىڭ قورى جيناقتالدى. قۇلسارى قالاسىنا ۇزاق ساقتالاتىن ازىق-ت ۇلىك, گيگيەنالىق قۇرالدار مەن تۇرمىستىق حيميالىق زاتتار وبلىس ورتالىعىنان جەتكىزىلىپ جاتىر», دەدى ج.شارعاباەۆا.
مىنە, قۇلسارى قالاسىندا تاسقىن سۋدىڭ زاردابىن جويۋ ماقساتىندا وسىنداي جۇمىستار ىسكە اسىرىلىپ جاتىر. مۇنىڭ ءبارى زارداپ شەككەن تۇرعىنداردىڭ قالىپتى تىرلىككە ورالۋىنا ىقپال ەتۋ ءۇشىن قولعا الىنعان. كەشە جىلىوي اۋدانى اكىمدىگىنىڭ الدىندا بىرنەشە كۇن تۇرعان قۇلسارىلىق تۇرعىندار تارادى. مۇنى اۋداندىق اكىمدىك تۇرعىنداردىڭ سۋ باسقان ءۇي ءۇشىن بەرىلەتىن وتەماقىعا بايلانىستى جۇمىستارعا تۇسىنىستىكپەن قاراۋى دەپ باعالادى.
اتىراۋ وبلىسى
