تۇركىستان وبلىسىنىڭ شارۋالارى ءۇشىن سۋارمالى سۋ ارزاندادى

جىل باسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ شارۋالاردىڭ ءوتىنىشىن قاناعاتتاندىرۋ ماقساتىندا «قازسۋشار» فيليالدارىنا ديحاندارمەن دەلدالسىز تىكەلەي كەلىسىمشارتقا وتىرۋ تۋرالى تاپسىرما بەرگەن بولاتىن. وسىنىڭ ناتيجەسىندە بيىل تۇركىستان وبلىسىنىڭ شارۋالارى ءۇشىن سۋارمالى سۋدىڭ باعاسى 38%-عا دەيىن ارزاندادى.

ماسەلەن, وسىعان دەيىن سور شايۋ جۇمىستارىنا اعىن سۋ قۇنى 1 گەكتارعا – 6000-7000 تەڭگە ارالىعىندا بولسا, بيىل بەكىتىلگەن ءتاريفى بويىنشا قىزمەت قۇنى 1 گەكتارعا – 4282 تەڭگە. ەسەپتەۋ ناتيجەسىندە قىزمەت قۇنى ورتا ەسەپپەن 28% جانە 38%-عا دەيىن ارزانداعانى انىقتالدى.

تۇركىستان وبلىسى بويىنشا «قازسۋشار» فيليالى بيىل شارۋالارمەن سۋ بەرۋ قىزمەتى بويىنشا 6160 كەلىسىمشارت جاسادى. ونىڭ ىشىندە, ماقتاارال جانە جەتىساي اۋداندارى بويىنشا 111,1 مىڭ گەكتار سۋارمالى القاپقا سۋ بەرۋ تۋرالى 2825 كەلىسىمشارت, شاردارا اۋدانى بويىنشا 41,3 مىڭ گەكتار ەگىس القابىن تىرشىلىك نارىمەن قامتاماسىز ەتۋ جونىندە 1280 كەلىسىمشارتقا وتىردى.

«بيىلدان باستاپ ەلىمىزدىڭ وڭتۇستىگىندەگى بىرقاتار شارۋالار ءۇشىن سۋارمالى سۋ بەرۋ قىزمەتىنىڭ قۇنى ارزاندادى. سەبەبى, 2024 جىلعى ۆەگەتاتسيالىق كەزەڭگە دايىندىق اياسىندا «قازسۋشار» مەكەمەسى تۇتىنۋشىلارمەن تىكەلەي كەلىسىمشارتقا وتىرىپ جاتىر. بۇل ورتاداعى دەلدالداردى الىپ تاستاۋعا مۇمكىندىك بەرەدى. تيىسىنشە بىرقاتار تۇتىنۋشى ءۇشىن قىزمەتتەردىڭ قۇنىن ارزانداتادى. «قازسۋشار» مەكەمەسى 2024 جىلدىڭ ۆەگەتاتسيا ماۋسىمىنا 19 مىڭنان استام تۇتىنۋشىمەن كەلىسىمشارتقا وتىرۋدى جوسپارلاپ وتىر», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.