3000 مەترگە كەدەرگىلەر ارقىلى جۇگىرگەن دجەرۋتانىڭ ناتيجەسى – 9:22.45 سەكۋند. وليمپيا ويىندارىنىڭ ليتسەنزياسىنا يەلىك ەتۋ ءۇشىن وسى كورسەتكىش وعان جەتكىلىكتى بولدى. بۇل – ەلىمىزدىڭ جەڭىل اتلەتتەر كومانداسىنىڭ قورجىنىنداعى ازىرگە ەكىنشى جولداما. ەستەرىڭىزدە بولسا, وسىدان ءبىر اي بۇرىن نيدەرلاندتىڭ روتتەردام قالاسىندا ۇيىمداستىرىلعان مارافونشىلار جارىسىنىڭ قورىتىندىسى بويىنشا جاننا ماماجانوۆا پاريج وليمپياداسىنا قاتىسۋشىلاردىڭ تىزىمىنە قوسىلدى.
ال نورا دجەرۋتونىڭ وزىنە كەلەر بولساق, ول 1995 جىلى كەنيادا دۇنيەگە كەلدى. 2016 جىلى افريكا چەمپيوناتىندا توپ جاردى. 2017 جىلدان بەرى نورامەن بىرگە تاعى ەكى كەنيالىق جەلاياق وسكەمەندە ىرگەتاسى قالانعان «التاي اتلەتيكس» كلۋبىنىڭ نامىسىن قورعاپ كەلەدى. 2022 جىلى ولار قازاقستان ۇلتتىق قۇراماسى ساپىنا قابىلداندى. ءدال سول ماۋسىمدا دجەرۋتو اقش-تىڭ يۋدجين قالاسىندا وتكەن الەم چەمپيوناتىندا التىننان القا تاقتى. ەلىمىزدىڭ جەڭىل اتلەتتەرى بۇعان دەيىن بىردە-ءبىر رەت ءدال وسى دودادا جەڭىس تۇعىرىنىڭ ەڭ بيىك ساتىسىنا كوتەرىلمەگەن ەدى. سودان كەيىن ول ءسابيلى بولدى. ارادا ءبىر جارىم جىلداي وتكەننەن سوڭ نورا پاريج وليمپياداسىنىڭ جولداماسىنا يەلىك ەتتى.
