فوتو: قورعانىس مينيسترلىگى
الەمدەگى ەڭ ءىرى پانارالىق سپورت ۇيىمدارىنىڭ ءبىرى سانالاتىن Conseil International du Sport Militaire 140 ەلدىڭ اسكەري قىزمەتشىلەرىن بىرىكتىرەدى. ۇيىمنىڭ «سپورت ارقىلى دوستىق» دەگەن ۇرانى CISM-ءتىڭ نەگىزگى ماقساتى بەيبىتشىلىكتى نىعايتۋ قۇرالى رەتىندە قارۋلى كۇشتەر اراسىنداعى سپورت پەن دەنە شىنىقتىرۋدى دامىتۋ ەكەنىن كورسەتەدى.
جيىنعا قاتىسۋشىلاردىڭ باياندامالارىندا سپورتتىڭ ديپلوماتيالىق قۇرال رەتىندەگى ىقپالىنا جانە سپورتتى دامىتۋ ستراتەگيالارىنا باسا نازار اۋدارىلدى. سونىمەن بىرگە 2025 جىلعا ارنالعان ءىس-شارالار جوسپارىن بەكىتۋ ماسەلەلەرى تالقىلاندى.
قر قم سپورت كوميتەتىنىڭ توراعاسى – ورتالىق سپورت كلۋبىنىڭ باستىعى پولكوۆنيك ارمان ابەۋوۆ قازاق كۇرەسىنەن اسكەري قىزمەتشىلەر اراسىندا CISM ءبىرىنشى الەم چەمپيوناتىن 2025 جىلعى جوسپارعا ەنگىزۋ ماسەلەسى بويىنشا بايانداما جاسادى. ول قازاق كۇرەسىنىڭ تاريحى تۋرالى ايتىپ, مۇنداي ءتۋرنيردى ۇلتتىق سپورتتى دامىتۋ جانە قازاق كۇرەسىن الەمدىك دەڭگەيدە ناسيحاتتاۋ ماقساتىندا وتكىزۋ جوسپارلانىپ وتىرعانىن اتاپ ءوتتى. ەڭ كونە ۇلتتىق سپورت ءتۇرى ءارى حالقىمىزدىڭ مادەني قۇندىلىعى رەتىندە بالالار مەن جاستار اراسىندا كەڭىنەن تانىمالدىعىنا جانە بۇكىلالەمدىك يۋنەسكو ۇيىمى مويىنداعانىنا توقتالدى.
– ءبىزدىڭ ەلىمىز ءىرى سپورتتىق ءىس-شارالاردى وتكىزۋدە تاجىريبەگە باي. سول سەبەپتى ەلوردادا الەم چەمپيوناتىن لايىقتى ۇيىمداستىرۋعا بار كۇشىمىزدى سالامىز. بىزگە كورسەتىلگەن سەنىمى ءۇشىن الەمدىك كۇرەس ۇيىمىنا العىسىمدى بىلدىرگىم كەلەدى. اسكەري سپورت داستۇرلەرىن نىعايتۋ مەن ارتتىرۋ ىسىندە ارىپتەستىكتى ودان ءارى جالعاستىرا بەرەمىز, – دەپ اتاپ ءوتتى پولكوۆنيك ارمان ابەۋوۆ.
كونگرەسس پەن اسسامبلەيا اياسىندا تۇركيا, قىتاي, وڭتۇستىك كورەيادا قازاقستان قارۋلى كۇشتەرىنىڭ دەنە شىنىقتىرۋ جانە سپورت ماماندارىن وقىتۋ مەن بىلىكتىلىگىن ارتتىرۋ تۋرالى الدىن الا ۋاعدالاستىق تا بار.
