فوتو: ن.بايبۋلين
«ەلدەرىمىز اراسىندا بەرىك ساياسي ديالوگ ورنادى. ەكونوميكالىق جانە مادەني-گۋمانيتارلىق بايلانىستارىمىز دا جان-جاقتى دامىپ كەلەدى. تۇركيانىڭ ۇلى ۇلتتىق ماجىلىسىمەن ىنتىماقتاستىقتى دامىتۋعا جانە زاڭنامالىق باعىتتا تاجىريبە الماسۋعا مۇددەلىمىز. پارلامەنتتەردىڭ قۇزىرەتىنە جاتاتىن وزەكتى ماسەلەلەردى شەشۋ جولىندا «قازاقستان-تۇركيا» پارلامەنتارالىق دوستىق توپتارىنىڭ الەۋەتىن ءتيىمدى پايدالانۋدىڭ ماڭىزى زور. ساپارىڭىز پارلامەنتارالىق ديالوگتى نىعايتۋعا جانە ەلدەرىمىز اراسىنداعى ستراتەگيالىق سەرىكتەستىكتى كەڭەيتۋگە تىڭ سەرپىن بەرەدى دەپ سەنەمىز», دەگەن ماۋلەن اشىمباەۆ بۇگىنگى كەزدەسۋ قازاقستان مەن تۇركيا اراسىنداعى دوستىق جانە ىنتىماقتاستىق تۋرالى شارتتىڭ 30 جىلدىعىمەن قاتار كەلگەنىنە نازار اۋداردى.
كەزدەسۋ بارىسىندا پارلامەنتارالىق وداق, ەقىۇ پا جانە تۇركپا شەڭبەرىندەگى ءوزارا بايلانىستىڭ پەرسپەكتيۆالارى دا تالقىلاندى. سونداي-اق سۇحباتتاسۋشىلار بىرقاتار بىرلەسكەن جوبا جونىندە پىكىر الماستى. ناقتى ايتقاندا, ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋ, كولىك-لوگيستيكا سالاسىن دامىتۋ جانە باسقا دا باعىتتاعى بىرلەسكەن ءىس-قيمىلدى ارتتىرۋ ماسەلەلەرى اڭگىمەگە ارقاۋ بولدى.
بۇدان بولەك, ماۋلەن اشىمباەۆ پارلامەنتتىڭ قازاقستان پرەزيدەنتىنىڭ باستاماسىمەن ىسكە اسىرىلىپ جاتقان رەفورمالاردى زاڭنامالىق تۇرعىدان قامتاماسىز ەتۋ باعىتىنداعى جۇمىسىنا توقتالدى. كەزدەسۋدە الەمدىك جانە ءداستۇرلى دىندەر ليدەرلەرىنىڭ سەزىن دامىتۋدىڭ 2023-2033 جىلدارعا ارنالعان تۇجىرىمداماسى تۋرالى دا ايتىلدى.
ءوز كەزەگىندە نۋمان كۋرتۋلمۋش قازاقستاندا قولعا الىنعان رەفورمالاردىڭ ماڭىزدىلىعىن اتاپ ءوتتى. سونداي-اق ول پارلامەنتارالىق ىنتىماقتاستىقتى نىعايتۋ جولىندا اتقارىلىپ جاتقان جۇمىستارعا جانە رۋحاني ديپلوماتيانى دامىتۋ باعىتىندا سەزد حاتشىلىعى قابىلداعان شارالارعا ەرەكشە نازار اۋداردى.
