قوعامدىق كەلىسىم كەڭەسى الەۋمەتتىك, ەڭبەك داۋلارىن شەشۋگە, ۇيىمنىڭ ۇجىم ىشىندە جايلى جاعداي ورناتۋ قىزمەتىن ۇيلەستىرۋگە, جۇرتشىلىقپەن بايلانىستى جان-جاقتى نىعايتۋعا ىقپال ەتۋ ماقساتىندا قۇرىلىپ, ماڭىزى بار قوعامدىق-ساياسي قوزعالىستار, قوعامدىق بىرلەستىكتەر, قاۋىمداستىقتار, زاڭدى تۇلعالار بىرلەستىكتەرى, ۇكىمەتتىك ەمەس ۇيىمدار, ارداگەرلەر مەن اقساقالدار كەڭەستەرى, كاسىپوداق, ءدىني بىرلەستىكتەر وكىلدەرىنىڭ تۇراقتى تۇردە جۇمىس ىستەيتىن فورۋمى بولىپ تابىلادى.
جوسالى اۋىلدىق وكرۋگىندە وسى كەڭەستىڭ العاشقى جيىنى وتكىزىلىپ, وندا كەڭەستىڭ توراعالىعىنا مەن سايلاندىم. جيىندا وكرۋگتىڭ 2015-2018 جىلدارعا ارنالعان كەشەندى دامىتۋ جوسپارى تانىستىرىلدى. سونداي-اق, جيىندا وكرۋگتىڭ الەۋمەتتىك-ەكونوميكالىق دامۋى تۋرالى قۇجاتى, كەڭەس قۇرامى تانىستىرىلىپ, 2014 جىلى اتقارىلعان جۇمىس قورىتىندىلاندى. سونداي-اق, جيىندا وكرۋگتىڭ وزەكتى ماسەلەلەرى تالقىلانىپ, ەلەكتر باعاندارىن تۇزەۋ, گاز تارتۋ جۇمىستارى, تامدى اۋىزسۋ قۇدىقتارىن دارىلەۋ, قوعامدىق مونشا سالۋ, مال باقتاشىلاردى ۇيىمداستىرۋ, اۋىلدا ەلەكتر جارىعى بولماعان كەزدە حالىققا سۋ ماسەلەسىن شەشۋ ءۇشىن قوسىمشا موتور الۋ, جىلقى مالىن تاڭبالاۋ تۋرالى ۇسىنىستار ەنگىزىلدى. وكرۋگتە وتكىزىلگەن جيىندا «تۋعان جەرگە تاعزىم» اكتسياسىن وتكىزۋدى ۇيىمداستىرۋ تۋرالى ماسەلە قارالىپ, وندا وكرۋگتەگى ايتۋلى تۇلعا بولعان ابدوللا جۇماعاليەۆتىڭ تۋعانىنا 100 جىل تولۋىنا وراي مەكتەپ الدىنا بيۋست ورناتۋ, ەلىمىزدەن شىققان بەدەلدى ازاماتتاردىڭ, كاسىپكەرلەردىڭ ءتىزىمى جاساقتالىپ, قارجىلاي كومەك جاساۋعا ۇندەۋ جاريالاندى. جالپى, وتكىزىلگەن وتىرىستاردا اۋىلدىڭ الەۋمەتتىك-ەكونوميكالىق, قۇقىقتىق, قوعامدىق-ساياسي دامۋىنىڭ ماسەلەلەرى تالقىلانىپ, ولاردى شەشۋ بويىنشا ۇسىنىستار ايتىلىپ, تاجىريبەلىك ۇسىنىمدار قابىلدانىپ كەلەدى. ال كەڭەستىڭ باستى ماقساتى – الەۋمەتتىك-ەكونوميكالىق, قۇقىقتىق, قوعامدىق-ساياسي, ۇلتارالىق, تاربيەلىك, سالت-داستۇرلىك ماسەلەلەردى, ولار بويىنشا قالىپتاسقان پىكىرلەردى, كوزقاراستاردى, ۇستانىمداردى ماقۇلداۋ, قوعامدىق, ۇلتارالىق تۇسىنىستىك پەن بىرلىكتى ناسيحاتتاۋ. وكرۋگ تۇرعىندارى ەلباسىنىڭ قازاقستان حالقىنا ارناعان جولداۋىن قولداي وتىرىپ, بىرلىك, تۇسىنىستىك تۇرعىسىندا جۇمىلا ەڭبەك ەتە بەرمەك.
اسان ءجۇسىپوۆ,
جوسالى اۋىلدىق وكرۋگى قوعامدىق كەلىسىم كەڭەسىنىڭ توراعاسى.
باتىس قازاقستان وبلىسى.
ماقسات ايقىن, باعىت ءتۇزۋ
اسا قادىرلى ەلباسى نۇرسۇلتان ءابىش ۇلى نازارباەۆ! ءسىز قازاقستان حالقىنىڭ ماڭدايىنداعى جارىق جۇلدىزسىز. كۇن نۇرى مەن اي ساۋلەسىسىز. ءسىز بىلىمدىلىگىڭىز, اقىلدىلىعىڭىز, ءوز حالقىڭىز بەن ەلىڭىزگە دەگەن ادال ماحابباتىڭىز, دانا ىشكى جانە سىرتقى ساياساتىڭىز ارقاسىندا قازاقستان حالقىن باقىتقا باستاپ كەلەسىز. ءسىزدىڭ «نۇرلى جول» جوباڭىز قازاقستان حالقىنىڭ بولاشاعى جارقىن, كەلەشەگى كەمەل بولاتىنىنا كوزىمىزدى انىق جەتكىزەدى جانە وعان كامىل سەنەمىز. ءسىز كوپ قىرلى ساياساتىڭىزدىڭ ارقاسىندا دوستىق پەن بىرلىك تۋىن جوعارى كوتەرىپ, حالقىمىزدى ءبىر جۇدىرىقتاي جۇمىلدىرىپ, ەڭبەك ەتۋگە ۇيرەتتىڭىز. ءسىزدىڭ 1997 جىلى ءبىرىنشى جانە ودان كەيىنگى حالىققا جولداعان جولداۋلارىڭىز بىرلىگىمىز بەن ىنتىماعىمىزدى بەكەمدەي ءتۇسىپ كەلەدى. ءسىز ءبىر سوزىڭىزدە: «ماقسات ايقىن بولماي, باعىت ءتۇزۋ بولمايدى», دەپ ايتقان بولاتىنسىز. «نۇرلى جول» جوباڭىز ءسىزدىڭ كەلەشەك ايقىن جانە دۇرىس ەكەنىن كەزەكتى مارتە ايعاقتاپ بەرىپ وتىر. بۇل باعىتىڭىز ءبىزدىڭ «ماڭگىلىك ەلىمىزدىڭ» دۇنيەجۇزىنىڭ دامىعان وتىز ەلىنىڭ قاتارىنا تەز ارادا جەتۋىنە جول اشادى. بۇگىن قازاقستان ەۋروپا مەن ازيا اراسىنداعى كوپىر ىسپەتتى. بەرەكە باسى بىرلىكتە, بىرلىگى بار حالىقتىڭ بايراعى بيىك بولادى دەپ ءسىز ايتقانداي, ءبىزدىڭ بىرلىگىمىز, قۇداي قالاسا, ەشقاشان ىدىرامايدى. بايراعىمىزدى ۇرپاعىمىز ءۇشىن ىلعي بيىكتە كورە بەرەيىك. ءسىز ۇلاعاتتى سوزدەرىڭىزدىڭ بىرىندە ءبىر ادام وتىمەن مىڭ ادام جىلىنادى دەگەنسىز. قازاقستانداعى بۇگىنگى ۇلتارالىق تاتۋلىق پەن دىنارالىق تۇسىنىستىك ءسىزدىڭ ءسوزىڭىزدىڭ دۇرىستىعىن ايعاقتاپ بەرىپ وتىر. ءسىزدىڭ «جول كارتاسى» جوباڭىزدىڭ ارقاسىندا مەن تۋىپ-وسكەن پانفيلوۆ اۋدانىنداعى پەنجىم اۋىلىنىڭ قاسىندا عاسىرلار بويى قوزعالماي ءۇيىلىپ قۇم استىندا جاتقان دالاعا ەكى-ءۇش جىل ىشىندە كوركەم جانە اسەم نۇركەنت اۋىلى مەن التىنكول تەمىرجول بەكەتى سالىنىپ, قانشاما ادام جۇمىسپەن قامتاماسىز ەتىلدى. جاستار ءۇي الىپ, باسپانالى بولدى. حالىققا الەۋمەتتىك جاعداي تولىق جاسالعان. بۇل اۋدان حالقىنا وتە قۇندى بەرەكە اكەلدى. اۋدانىمىزداعى بۇل جاڭالىق ءسىزدىڭ حالىقتى جىلىتىپ جۇرگەن وتىڭىزدىڭ ءبىر جالىنى. بۇل جالىن قازاقستان اۋماعىنداعى قانشاما جەردە جانعانىن ءبىز بىلەمىز. مەن – تابان اۋدارماي وتىز جىل ءبىلىم سالاسىندا جۇمىس ىستەگەن زەينەتكەرمىن. ءسىزدىڭ تاپسىرماڭىزعا ساي بالاباقشالار, جاڭا مەكتەپ سالىنىپ, ەسكى مەكتەپتى جوندەۋ ءۇشىن بولىنگەن مول قارجى مەنى قۋانىشقا بولەدى. بۇل – ءبىزدىڭ بالالارىمىز, نەمەرە, شوبەرەلەرىمىزدىڭ جارقىن بولاشاعىنا جول اشاتىن قادام. ال ءوزىم 78 جاستا بولسام دا باقىت بەرسە, كارىلىكتەن بەرسىن دەگەندەي, ادەمى قارتايۋعا ءسىز ارقىلى جەتكەنىمە ريزاشىلىعىمدى بىلدىرەمىن. سىزگە بۇكىل قازاقستان انالارى جانە اۋدان حالقىنىڭ اتىنان العىسىمدى ايتامىن. الدا كەلە جاتقان قازاقستان حالقى اسسامبلەياسىنىڭ 20 جىلدىعىمەن, ۇلى وتان سوعىسىنداعى جەڭىستىڭ 70 جىلدىعىمەن قۇتتىقتايمىن. وتباسىڭىزعا اماندىق, دەنىڭىزگە ساۋلىق تىلەيمىن. «نۇر وتان» شىنايى شاتتىعىم, كىرشىكسىز تازا پاك كۇنىم. ەڭسەسىن ەلدىڭ كوتەرگەن بەدەلىڭ بيىك ناق بۇگىن, – دەپ جەرگىلىكتى اقىنىمىز جىرلاعانداي, ءوزىڭىز باستاعان «نۇر وتان» پارتياسىنىڭ بەدەلى اركەز بيىكتەي بەرسىن!
مايمۋنام يمياروۆا, زەينەتكەر,
«قازاق كسر حالىق اعارتۋ ءىسىنىڭ وزىق قىزمەتكەرى».
الماتى وبلىسى, پانفيلوۆ اۋدانى.
قازاق دەسە, كوز الدىما اباي اتام كەلەدى
وسىلاي تولعانعان جاس ۇستاز ۇلى اقىننىڭ ولەڭدەرى مەن اندەرىنەن اركەز زور رۋحاني شابىت الاتىنىن جاسىرمايدى
قازاق تىلىندە تامىلجىتا ءان سالاتىن ورىس قىزى بارىن, ونىڭ عاجايىپ داۋىسىنىڭ ۇنايتىنى سونشالىق, توي-جيىندارعا ارنايى شاقىرتىپ الىناتىنىن, ال قايسىبىرەۋلەردىڭ ونىڭ ءانىن تىڭداۋ ءۇشىن عانا باراتىنىن ەستيتىنبىز. بىردە ءانشى قىزدى ىزدەپ بارعانىمىزدا, ماماندىعى بويىنشا مەكتەپكە قىزمەت اۋىستىرعانىن بىلدىك. تەلەفون ارقىلى حابارلاسىپ, كەزدەسۋگە كەلگەنىمىزدە ءوزىن ۆالەنتينا سلەسارەۆامىن دەپ تانىستىرعان مىنەزى اشىق, جايدارى قىز ءبىزدى ەجەلگى تانىسىنداي قۇشاق جايا قارسى الدى. بيىل م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن مۋزىكا ماماندىعى بويىنشا ءبىتىرىپ شىققانىن, قازىر شاكىرتتەرگە ساباق بەرەتىنىن بىردەن اقتارىپ سالدى. «جاقسىدا جاتتىق جوق» دەگەن. كىتاپحانادا سۇحباتىمىزدى ودان ءارى جالعاستىرىپ, تەرەڭىرەك تانىسۋعا مۇمكىندىك الدىم. – تۋعان جەرىم – اققايىڭ اۋدانىنداعى لەنين اۋىلى, – دەپ ساباقتادى ءسوزىن ول. – وسىنداعى ورىس مەكتەبىندە وقىپ جۇرگەندە, قازاق ءتىلىن تازا مەڭگەردىم. كەيىن ءتىلدى دە, ويدى دا ۇشتايتىن ءتۇرلى بايقاۋلارعا قاتىسا باستادىم. يمانداي شىنىم, اباي وقۋلارى ەرەكشە اسەر ەتتى. ۇلى شايىردىڭ ولەڭدەرىن تۇپنۇسقادان وقۋ ارقىلى وزگەشە ءبىر الەمدى, قازاق حالقىن باسقا قىرىنان تانىعانداي كۇي كەشتىم. ءسوز بەن وي اۋەزدىلىگى جانىمدى تەربەپ, الديلەگەندەي بولدى. وسىلايشا مەكتەپ باعدارلاماسىمەن عانا شەكتەلىپ قالماي, كوركەم ادەبيەتتەرگە دەگەن قۇمارلىعىم, قۇشتارلىعىم وياندى. قازاق دەسە, اباي اتامىزدىڭ الدىمەن كوز الدىما ەلەستەيتىنى دە سوندىقتان. قازاق تىلىندە ءان ايتۋدى «كوزىمنىڭ قاراسىنان» باستاعانىم بەكەر ەمەس شىعار, بابامىز ايان بەرگەن بولار دەپ كەيدە ويلايمىن. بۇگىندە رەپەرتۋارىمدا جۇزگە تارتا قازاق اندەرى بار. ۆالەنتينا ۋنيۆەرسيتەتتە وقىپ جۇرگەندە ءتورت جىل بويى قالانىڭ بەتكەۇستار مەيرامحانالارىندا قازاق اندەرىن اۋەلەتە شىرقاپ, تويلاردىڭ كوركىنە اينالىپتى. گرانتپەن وقىعان, شاكىرتاقىسىن ۇزبەي الىپ تۇرعان ستۋدەنتتىڭ بۇل اۋەستىگى تەك اقشاعا قىزىققاندىقتان ەمەس, رۋحاني جۇرەك قالاۋىنان تۋسا كەرەك. جوعارى وقۋ ورنىن ۇزدىك ءبىتىرىپ شىققان ونىڭ مۋزىكا ءپانىنىڭ مۇعالىمى ماماندىعىنا قوسا, فورتەپيانو مەن گيتارادا ءتاپ-ءتاۋىر وينايتىن ونەرى دە بار. سول سياقتى, ۆوكالدىق جانە ديريجەرلىك ماماندىقتارعا ماشىقتانىپ, تەوريالىق ءان ساباعىن دا جۇرگىزە الادى. بىراق كاسىپقوي ءانشى بولۋدى ماقسات تۇتقان ەمەس. قازىر قالاداعى №4 ورتا مەكتەپتە 1-6-سىنىپتارعا مۋزىكا پانىنەن ساباق بەرەدى. شاعىن ورتالىقتا مۋزىكالىق ۇيىرمەگە جەتەكشىلىك جاسايدى. ول «سەگىز اياق» پەن «ايتتىم سالەم, قالامقاستى» تامىلجىتا ورىنداعاندا الدىنا تۇسەتىن ءانشى جوق پا دەپ قالاسىڭ. كەڭ تىنىستى جوعارى سوپرانو داۋىسىمەن «كوزىمنىڭ قاراسىنىڭ» بىرەر شۋماعىن توگىلتكەندە جان تەبىرەنىپ, سەنبەسكە لاج قالمادى. ونىڭ «نۇرلان مەن مۇرات» توبىمەن ونەر كورسەتۋ ءساتى دە ءتۇسىپتى. ساحنا تورىندە «سارجايلاۋ», «وتىرارداعى توي», «قوشتاسقىم كەلمەيدى» اندەرىن شىرقاپ, اتاقتى دۋەتتىڭ ءوزىن تاڭعالدىرىپتى. جەرگىلىكتى «شەرتەر» قازاق انسامبلىمەن بىرلەسىپ كونتسەرت بەرگەن كەزدەرىن جىلىلىقپەن ەسكە الادى. سول جولى ابايدىڭ «جەلسىز تۇندە جارىق اي» ءانىن ۇيرەنىپ الىپتى. – نەگە ەكەنىن بىلمەيمىن, ماعان قازاق اندەرى قاتتى ۇنايدى. ءسىرا, ول ابايدىڭ ولەڭدەرى مەن اندەرىنە دەگەن زور سۇيىسپەنشىلىكتەن ويانعان بولار. جانە دە مەنىڭ سوپرانو داۋىسىما قاتتى ۇيلەسەدى. جەرلەسىمىز ءسابيت مۇقانوۆتىڭ سوزىنە جازىلعان «قازاق ءۆالسىن» ورىنداعاندا دا جانىم تاڭعى شىقتاي تازارىپ شىعا كەلەتىندەي كورىنەدى. ء«بىرجان-سارا» وپەراسىنان سارانىڭ ارياسىن ءسۇيىپ ورىندايمىن. ال جاستاردىڭ تويىندا كوبىنەسە قازاقتىڭ ەسترادالىق اندەرىن ورىنداپ ءجۇرمىن. الداعى ماقساتىم – شاكىرتتەرىمنىڭ بويىنا قازاق اندەرىنىڭ ءنارىن ءسىڭىرۋ, – دەيدى اعىنان جارىلعان كەيىپكەرىمىز. ونىڭ انگە دەگەن اۋەستىگى اكەسى سەرگەي الەكسەەۆيچتەن جۇقسا كەرەك. اۋىلدىڭ قاراپايىم ەڭبەككەرى جاس كەزىندە شارۋاشىلىقتا قۇرىلعان ەسترادالىق ۇجىمعا مۇشە بولىپ, جەتپىسىنشى جىلدارى «توي جىرى» ءانىن ايتقانى قىزىنىڭ ەسىندە قالىپتى. ۆالەنتينانىڭ ۇستازدىق اياق الىسى دا قۋانتادى. مەكتەپ جانىنداعى شاعىن ورتالىقتاعى ءتورت توپتىڭ بالالارىنا مەملەكەتتىك گيمندى ۇيرەتىپتى. «التىن كۇز» انىمەن مەكتەپ ساحناسىنا شىعارىپتى. مۇعالىمدەر مەرەكەسىندە وقۋشىلارى «مەكتەبىم» ءانىن ورىنداپ, ۇلكەن سىيلىق جاساپتى. اباي اندەرىمەن قاناتتانعان ارۋ قازاق اندەرىن جاس ورەندەرگە ۇيرەتۋدى وسىلايشا ءساتتى جالعاستىرىپ كەلەدى.
توقتار نۇراحمەت ۇلى, جۋرناليست.
سولتۇستىك قازاقستان وبلىسى.
سۋرەتتى تۇسىرگەن امانگەلدى بەكمۇراتوۆ.
پاتەر العان كۇنى ەلباسىنا حات جازامىن
– دەيدى وبلىس ورتالىعىنداعى №19 قازاق ورتا مەكتەبىنىڭ 7-سىنىپ وقۋشىسى نۇرجان مۇگىلسىم
«ەگەمەننىڭ» وبلىس ورتالىعىنداعى تىلشىلەر قوسىنىنا ادامدار ارىز-شاعىمدارىن الىپ كەلىپ-كەتىپ جاتادى. ولارعا قولدان كەلگەنشە كومەكتەسۋگە اسىعامىز. جانايقايلارىن گازەت بەتىنە جازىپ تا ءجۇرمىز. مىنا ءبىر حاتقا ءمان بەرىپ قارار بولساق, وي سالارلىقتاي ەكەن. رامازان مەن قاۋيا ءۇي كەزەگىنە سوناۋ 1992 جىلدارى تۇرسا كەرەك. سوناۋ دەپ ايتۋعا تۋرا كەلەدى, ويتكەنى, سونشاما جىلدار بويى پاتەر الامىز دەگەن ۇمىتتەرىن ۇزبەي ءالى كۇتىپ ءجۇر. سول جىلدارى تۇرعىن ءۇي كەزەكتەرىنىڭ قۇجاتتارى وبلىس ورتالىعىنداعى يندۋستريالىق اۋدانى تاراعان كەزدە جوعالىپ تا كەتىپتى. كەيىننەن مۇگىلسىمدەر وتباسى 2003 جىلى تاعى دا الەۋمەتتىك تۇرعىن ءۇي كەزەگىنە تۇرعان. ونىڭ وزىنە 11 جىلداي ۋاقىت ءوتىپتى. پاتەردەن پاتەرگە كوشىپ جۇرسە دە, رامازان مەن قاۋيا مەرۋەرت, قارلىعاش اتتى ەكى قىز بەن باۋىرجان, ناريمان, نۇرجان دەگەن ءۇش ۇلدى تاربيەلەپ وسىرگەن. قازىر مەرۋەرت تۇرمىس قۇرىپتى, 3 بالاسى بار, قارلىعاش تا تۇرمىستا, 3 بالالى, ەكەۋى دە مۇعالىم. ءبىر وكىنىشتىسى, باۋىرجان اۋىرىپ مۇگەدەك بولىپ قالعان سوڭ, ۇيدە وقيدى. ناريمان اسكەر قاتارىنا بارىپ كەلگەن. ارنايى ورتا ءبىلىمدى, وبلىس ورتالىعىنداعى №1جىلۋ ەلەكتر ستانساسىندا جۇمىس جاسايتىن اكەسىنىڭ جولىن قۋىپ, گازبەن, ەلەكترمەن دانەكەرلەۋشى ماماندىعىن العان. ءسويتىپ, رامازان مەن قاۋيا نەمەرەلى دە بولدى, ۇلدارى ناريمان ۇيلەنىپ, ومىرگە ەرماحان اتتى ۇل كەلەدى. ال ەندى ءبىزدىڭ كەيىپكەرىمىز نۇرجاننىڭ جايىنا توقتالايىق. ول – رامازاننىڭ ءۇشىنشى ۇلى. 2007 جىلى ەلباسى جۇمىس ساپارىمەن پاۆلودارعا كەلگەندە وبلىس ورتالىعىنداعى №10 بالاباقشاعا دا سوعادى. سول كەزدە نۇرجان مۇگىلسىم ەلباسىنا كومپيۋتەر ارقىلى قازاقى ۇعىمدار تىزبەسىن جاساپ كورسەتىپ بەرگەن ەدى. – كىشكەنتاي كۇنىندە ەلباسىمەن تۇسكەن سۋرەتكە ءجيى قاراي بەرەتىن.ۇيگە كەلگەن قوناقتارعا, دوستارىنا كورسەتىپ جاتاتىن. ءالى دە ۇستەلىنىڭ ۇستىندە تۇرادى. عۇمىر بويعى ەستەلىك قوي, – دەيدى رامازان بىزبەن اڭگىمەسىندە. قازىر سول كىشكەنتاي كومپيۋتەرشى بالا نۇرجان ەرجەتكەن. وبلىس ورتالىعىنداعى №19 مەكتەپتىڭ 7-ءشى سىنىبىندا وقىپ ءجۇر. ەلباسىنىڭ ريزالىعىن, باتاسىن العان بالا. تالاپتى. زەرەك وقۋشى. قازىر وسى نۇرجان ءوسىپ كەلە جاتقان وتباسى وبلىس ورتالىعىنداعى پاتەر كەزەگىندە 71-ءشى بولىپ تۇر ەكەن. انە-مىنە دەۋمەن, كۇتۋمەن, شەنەۋنىكتەردىڭ ۋادەسىنە سەنۋمەن كەلەدى. ىلعي كەيىن شەگەرىلە بەرگەن عوي. – اكە-شەشەمنىڭ تالاي جىلدار بويى سارىلىپ ازەر جەتكەن 71-ءشى كەزەگىن تاعى دا كەيىن شەگەرىپ تاستاماسا ەكەن, بيىل پاتەر الساق, قۋانىشىمدى ايتىپ ەلباسىنا حات جازار ەدىم, – دەيدى نۇرجان. ولاي بولسا, ءبىزدىڭ دە ەلباسىمەن تۇسكەن سۋرەتكە قاراپ جىلىلىق, مەيىرىمدىلىك ىزدەيتىن نۇرجاننىڭ, بەسىكتە جاتقان كىشكەنتاي ەرماحاننىڭ قۋانىشىنا ورتاقتاسقىمىز كەلەدى, ەندى, جەرگىلىكتى اكىمدىكتەر دە نازارعا الىپ, ويلانار دەپ كۇتەيىك.
فاريدا بىقاي,
«ەگەمەن قازاقستان».
پاۆلودار.
