«كەزىندە ايبات ەكەۋمىز بوكسپەن بىرگە اينالىستىق. ول وتە جىگەرلى بالا بولاتىن. بوكسشىلاردىڭ بويىنان مەن ايباتقا ءتان جالىندى, رۋحتى كوردىم. جەڭىسكە جەتۋگە دەگەن ۇمتىلىستارى جوعارى بولدى. سول سەبەپتى تۋرنير ادىلدىك پرينتسيپتەرىنە ساي ءوتتى دەپ ەسەپتەيمىن. اتالعان بىرىنشىلىك بالالارعا جاقسى كوڭىل-كۇي سىيلادى. ولارعا ۇلكەن تاجىريبە جيناۋعا مۇمكىندىك بەردى. البەتتە, وسى تۋرنير كەلەسى جىلى دا ءوز جالعاسىن تابۋى كەرەك», دەيدى باس تورەشى دارىن دۇيسەنباەۆ.
تۋرنيردە بەس سالماق ساناتى بويىنشا 60-تان استام مەدال جيىنتىعى ويناتىلدى. 200-گە جۋىق جاس سپورتشى قاتىستى. باتىردىڭ اتا-اناسى دايىنداعان ارنايى سىيلىقتار دا بولدى. ونى 43 كەلى سالماق دارەجەسىندە جەڭىمپاز اتانعان جاڭاارقالىق قابىلدا ءمانسۇر ۇتىپ الدى.
«وتكەن جىلى ارنايى سىيلىق ايبات ونەر كورسەتكەن 37 كەلى سالماقتىڭ جەڭىمپازىنا تاپسىرىلعان ەدى, وسى جولى 43 كەلى سالماق جەڭىمپازىنا بەرۋدى ءجون كوردىك. جىل سايىن سالماق دارەجەسى اۋىسىپ, بالالار ءۇشىن توسىن سىي بولسىن دەپ شەشتىك. بۇل دا جارىسقا قاتىسۋشىلاردى ىنتالاندىرادى. ۇلىم بوكسپەن اينالىسقاندا, وسىنداي جارىستارعا باراتىن. وسى جارىستى بىرنەشە جىل ۇيىمداستىرۋعا كومەك قولىن سوزىپ كەلە جاتقان ىشكى ىستەر مينيسترلىگىنە جانە ۇلتتىق ۇلان باسشىلىعىنا ۇلكەن العىسىمىزدى بىلدىرەمىز. تۋرنير جىلدان جىلعا جالعاسىپ, رەسپۋبليكالىق دەڭگەيگە دەيىن جەتەتىنىنە كامىل سەنەمىن», دەدى باتىردىڭ اناسى گۇلناز الكەنقىزى.
بىرىنشىلىك سوڭىندا ۇيىمداستىرۋشىلارعا ۇلتتىق ۇلان «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امريەۆتىڭ اتىنان العىس حات تابىستالسا, جەڭىمپازدارعا ارنايى گراموتالار مەن مەدالدار سالتاناتتى جاعدايدا تابىس ەتىلدى.
ايتا كەتۋ كەرەك, بۇعان دەيىن باتىر سارباز تۇرعان ۇيدە, اقسەلەۋ سەيدىمبەك اتىنداعى ورتا مەكتەپتە مەموريالدىق تاقتانىڭ اشىلۋ سالتاناتى وتكەن بولاتىن.
گەنەرال-مايور قايرات ۇمبەتوۆ ەل الدىندا ايبات امانوۆتىڭ اكەسىنە شاپان جاۋىپ, اسكەردىڭ باس قولباسشىسى اتىنان ەستەلىك سىيلىقتى تابىستادى.
ەسكە سالايىق, 2022 جىلعى قاڭتاردا جاپپاي تارتىپسىزدىكتەر كەزىندە تالدىقورعان قالاسىنداعى 5514 اسكەري ءبولىمىنىڭ قاتارداعى جاۋىنگەرى ايبات امانوۆ جولداستارىن قۇتقارۋ ماقساتىندا سوققىنى وزىنە قابىلداپ, ەرلىكپەن قازا تاپتى.
كورسەتكەن ەرلىگى مەن باتىلدىعى ءۇشىن مەملەكەت باسشىسىنىڭ بۇيرىعىمەن قايتىس بولعاننان كەيىن ءىىى دارەجەلى «ايبىن» وردەنىمەن ماراپاتتالدى. باتىر جاۋىنگەر ەسىمى ءوزى قىزمەت ەتكەن اسكەري ءبولىم جەكە قۇرامىنىڭ تىزىمىنە ماڭگىگە جازىلدى.
س.سەيفۋللين اتىنداعى جاڭاارقا تاريحي-ولكەتانۋ مۇراجايىندا ايبات امانوۆتىڭ كيىمدەرى مەن جەكە زاتتارى بار كورمە ۇيىمداستىرىلدى.
اقەركە مامىربەك
