- توتەنشە جاعداي تۋىنداعان كەزدە ازاماتتاردى ۋاقتىلى حاباردار ەتۋ ءۇشىن بيىل 1 ماۋسىمعا دەيىن "جاپپاي دابىل" جۇيەسى پيلوتتىق رەجيمدە ەنگىزىلەدى, – دەلىنگەن حابارلامادا.
پرەمەر-ءمينيستردىڭ ورىنباسارى قانات بوزىمباەۆ الماتىدا سەيسميكالىق قاۋىپسىزدىكتى قامتاماسىز ەتۋ ماسەلەلەرى بويىنشا كەڭەس وتكىزدى.
- عيماراتتاردىڭ سەيسميكالىق توزىمدىلىگىن ارتتىرۋ بويىنشا قابىلدانىپ جاتقان شارالار تۋرالى يندۋستريا جانە قۇرىلىس ءمينيسترى قانات شارلاپاەۆ باياندادى. ول سەيسميكالىق دەڭگەيى 7-9 بالل بولاتىن ۋچاسكەلەردە تۇرعىن ۇيلەر مەن الەۋمەتتىك نىساندار سالۋ ءۇشىن مىندەتتى سەيسميكالىق وقشاۋلاۋ جۇيەسىن ەنگىزۋ تۋرالى باياندادى. نورماتيۆتىك-تەحنيكالىق قۇجاتتارعا ءتيىستى تۇزەتۋلەر دايىندالدى, – دەدى ءباسپاسوز قىزمەتى.
بوزىمباەۆ حالىقارالىق, سونىڭ ىشىندە جاپوندىق تاجىريبەنى ەسكەرە وتىرىپ, جەر سىلكىنىسى قاۋپى بار ايماقتارداعى نىسانداردى جوبالاۋ ستاندارتتارىن قاتايتۋ بويىنشا جۇمىستاردى جۇرگىزۋدى, اككرەديتتەلگەن زەرتحانالاردى پايدالانا وتىرىپ, قۇرىلىس نورمالارىنىڭ ساقتالۋىنا قاداعالاۋدى كۇشەيتۋدى تاپسىردى.
- حالىقتى حاباردار ەتۋ جەلىگە قوسىمشا جۇكتەمەنى تۋدىرمايتىن جانە بازالىق ستانتسيا انتەننالارىنىڭ قامتۋ ايماعىنداعى بارلىق ابونەنتتەردى دەرەۋ جانە جاپپاي حاباردار ەتۋگە مۇمكىندىك بەرەتىن Cell Broadcast تەحنولوگياسى ارقىلى جۇزەگە اسىرىلادى, – دەدى الماتى اكىمى ەربولات دوساەۆ.
ۆيتسە-پرەمەر حالىقتى توتەنشە جاعداي تۋرالى حابارلاۋ جۇيەسىن ەنگىزۋ ۇدەرىسىن جەدەلدەتۋدى تاپسىردى. بۇل جۇيە ەلىمىزدىڭ جەر سىلكىنىسى قاۋپى بار بارلىق ايماقتارىندا بولۋى جانە ۇزدىكسىز جۇمىس ىستەۋى كەرەك.
- سونىمەن قاتار قانات بوزىمباەۆ مەملەكەتتىك ورگانداردىڭ جەر سىلكىنىسى كەزىندەگى ارەكەت الگوريتمىن دە تىڭدادى. بۇل حالىقتى اقپاراتتاندىرۋعا, قۇتقارۋ جانە ەۆاكۋاتسيالاۋ شارالارىن ۇيىمداستىرۋعا, دالالىق جانە جىلجىمالى اۋرۋحانالاردى ورنالاستىرۋعا قاتىستى. ۆيتسە-پرەمەر توتەنشە جاعدايلار مينيسترلىگىنە ماۋسىم ايىنىڭ ءبىرىنشى ونكۇندىگىندە "جەر" رەسپۋبليكالىق وقۋ-جاتتىعۋى كەزىندە الگوريتمدى سىناقتان وتكىزۋدى تاپسىردى, – دەپ تولىقتىردى مينيسترلەر كابينەتى.
- جاتتىعۋ اياسىندا تارتىلعان تەحنيكانىڭ جاي-كۇيىن جانە ونىڭ شەشىلەتىن مىندەتتەرگە سايكەستىگىن تەكسەرۋ دە ماڭىزدى. بۇل رەتتە توتەنشە جاعدايلاردى جويۋعا جەكە ۇيىمداردىڭ تەحنيكاسىن تارتۋ ماسەلەسىن پىسىقتاۋ قاجەت, – دەدى بوزىمباەۆ.
ۇكىمەتتە تۇسىندىرگەندەي, وتىرىس قورىتىندىسى بويىنشا ءتيىستى مينيسترلىكتەرگە ەلدەگى سەيسميكالىق جاعدايعا تۇراقتى مونيتورينگتى قامتاماسىز ەتۋ جانە جەر سىلكىنىسى كەزىندە تۇرعىنداردىڭ ءىس-ارەكەتتەرىن تاجىريبە جۇزىندە جۇزەگە اسىرۋ بويىنشا وقۋ-جاتتىعۋلاردى جۇيەلى تۇردە وتكىزۋ تاپسىرىلدى.
