ستۋدەنتتەر تۋعان اۋىلدارىنا اتتاندى

استانانىڭ “ساپارجاي” اۆتوبەكەتى الدىنا كەشە سارى جانە اق ءتۇستى فۋتبولكا مەن باستارىنا كەپكا كيگەن ءبىر توپ ستۋدەنت جاستار جينالدى. ءبىلىم جانە عىلىم مينيسترلىگى باستاماشى بولىپ تابىلاتىن ء“ار ستۋدەنت – تۋعان اۋىلىنا!” اتتى رەسپۋبليكالىق اكتسيا وسىلايشا استانا قالاسىنىڭ ستۋدەنتتەرىن تۋعان اۋىلدارىنا شىعارىپ سالۋ راسىمىمەن باستالدى.ەلوردانىڭ جوعارى وقۋ ورىن­دا­رىنىڭ 1, 2 كۋرس ستۋدەنتتەرى بولىپ تابىلاتىن جاستاردىڭ كوڭىلدەرى كوتەرىڭكى. ويتكەنى, مۇنداي ەرەكشە قوشەمەتپەن شىعارىپ سالۋ ءراسىمى كۇندە بولا بەرمەيدى. تۋعان اۋىل­دارىنا يگىلىكتى ءىس-شارالار اتقارۋعا اتتانۋ الدىندا تۇرعان ستۋ­دەنت جاس­تار وسىندا ارنايى شاقىرتىلعان بۇقارالىق اقپارات قۇرالدارى وكىل­دەرىنە سۇحباتتارىن بەرىپ, سۋرەتكە دە ءتۇسىپ جاتتى. سولاردىڭ اراسىنان ءبىز قازاقستان ستۋدەنتتەرى اليانسى­نىڭ ۆيتسە-ليدەرى الىبەك ءمادى­بە­كوۆتى اڭگىمەگە تارتقان ەدىك. ول ءوز سوزىندە بىلاي دەدى: “بۇل اكتسيانىڭ ەڭ باستى تيىمدىلىگى سول, ولاردىڭ ءوز ۋاقىتتارىن ءتيىمدى پايدالانۋى جانە وقۋ بارىسىندا العان كوپ­تەگەن اقپاراتتاردى اۋىلداستارى مەن تۋعان-تۋىستارىنا جەتكىزۋى”. سونداي-اق ستۋدەنتتەر اۋىل­دا­رى­نا بارعان سوڭ مەملەكەت تارا­پى­نان جاستارعا نەندەي كومەكتەر كورسەتىلىپ جاتقاندىعىن جەتكىزىپ, ءبىلىم گرانتتارى تۋرالى ويلارىمەن بولىسۋلەرى شارت. وسى ماقساتپەن كەشە بىرنەشە ستۋدەنت ستەپنوگور قا­لاسىنا جول تارتتى. جوبا وسى­لايشا جالعاسىن تابا بەرەدى, دەيدى ءا.مادىبەكوۆ. قازىرگى جازعى دەمالىس كەزىندە ستۋدەنتتەر اۋىلدىڭ قوعامدىق ءومى­رىنە بەلسەندى قاتىسۋدا, سونىمەن قاتار, مەكتەپتەردىڭ اينالاسىن تا­زار­تىپ, اباتتاندىرۋ جۇمىستارىنا بەل­سەنە كىرىسىپ تە كەتىپتى. استانا­داعى س.سەيفۋللين اتىنداعى قازاق اگروتەحنيكالىق ينستيتۋتىنىڭ ستۋدەنتى اياگوز شەريازدانوۆانىڭ ايتۋىنشا, اۋىل جاستاردى تەك ەڭبەككە  تاربيەلەپ قانا قويماي, سونداي-اق وتانسۇيگىشتىك سەزىمدەرىن دە وياتادى. اتالعان وقۋ ورنىنىڭ كەلەسى ءبىر ستۋدەنتى عالىمجان كەرىمبەكوۆ قازىرگى كەزدە كوپتەگەن ستۋدەنتتەر ءوز اۋىلدارىنا بارىپ كومەك كورسەتۋگە قۇلشىنىپ وتىرعاندىعىن ايتتى. شىنىندا دا اكتسيانىڭ ماقسا­تى — جاستاردىڭ اۋىلدىڭ قوعامدىق ومىرىنە اتسالىسۋى ارقىلى تۋعان ەلىنە دەگەن جاۋاپكەرشىلىك سەزىمى مەن پاتريوتتىق رۋحىن قالىپتاس­تى­رۋ. بۇل, سونىمەن قاتار, ستۋدەنت­تەردىڭ تۋىپ-وسكەن اۋىلدارىنىڭ دامۋىنا تىكەلەي اتسالىسۋىنا ءمۇم­كىندىك تۋعىزادى. اكتسيا بارىسىندا ستۋدەنتتەر وزدەرى ءبىلىم العان مەك­تەپ­تەرىنىڭ اينالاسىن اباتتاندى­رىپ, ءار ءتۇرلى سپورتتىق جانە مادە­ني-كوپشىلىك شارالار ۇيىم­داس­تى­رادى, مەكتەپ جانىنداعى لاگەر­لەردەگى پەداگوگيكالىق جاساقتاردا جەتەكشى بولىپ جۇمىس ىستەيدى. اتالعان شارانىڭ تاعى ءبىر ءتيىمدى جاعى, بەلسەندى دەگەن ستۋ­دەنت­تەر ەلىمىزدىڭ الەۋمەتتىك-ەكو­نوميكالىق جانە ساياسي جاعدايى تۋ­رالى ءتۇسىندىرۋ جۇمىستارىن ءجۇر­گىزۋگە مۇمكىندىك الادى. سونىمەن بىرگە, ولار مەملەكەتتىڭ جاستاردى قالاي قولداپ جاتقانى جانە مەملەكەتتىك ءبىلىم باعدارلامالارى تۋرالى اقپاراتتارمەن دە بولىسەدى. اسقار تۇراپباي ۇلى. استانا.