سۋرەتتە: مۇحتار اۋەزوۆ – ءۇشىنشى قاتاردا, وڭنان ساناعاندا – ەكىنشى
ماسەلەن, مۇحتار اۋەزوۆ سەمەيدە سەميناريادا وقىپ جۇرگەندە 1913 جىلى تۇڭعىش قۇرىلعان «يارىش» («جارىس») فۋتبول كومانداسىنىڭ جارتىلاي قورعاۋشىسى بولىپ ويناعانىن بىلەمىز. كەيىنىرەك ات بايگەسىنە ەرەكشە جانكۇيەر بولىپتى. بۇدان بولەك جازۋشىنىڭ بيليارد, توعىزقۇمالاققا دا قىزىعۋشىلىعى ارتقان. اڭشىلىققا شىعۋى ەكىباستان. سونداي-اق ۇلى ەلدارمەن شاحمات ويناپ وتىرعانى دەرەكتى فيلمدە دە كورسەتىلەدى. ال مۇقاعالي ماقاتاەۆ پەن جۇماتاي جاقىپباەۆتىڭ بوكسپەن شۇعىلدانعانى دا ەل اۋزىندا ءالى ايتىلادى.
ورىس كلاسسيكتەرىنە كەلەر بولساق, ماكسيم گوركي شاڭعى تەپكەندى ۇناتقان ەكەن. ال لەۆ تولستوي سپورتقا وتە قۇمار بولعان. ول 67 جاسىندا ۆەلوسيپەد ايداۋدى ۇيرەنىپتى. لەۆ اقساقالدىڭ بۇل تالپىنىسىن كورگەن جۇرت, ارينە كۇلگەن. الايدا جازۋشى كۇندەلىگىندە: «كەيىنگى كەزدەرى مانەجدە ۆەلوسيپەد تەۋىپ ۇيرەنىپ ءجۇرمىن. مەنىڭ وعان قىزىعۋىم, ارينە ءبىرتۇرلى. ەۆگەني يۆانوۆيچ (دارىگەر) مەنى بۇل ىسىمنەن اينىتىپ, وعان قوسا رەنجىدى. ال ماعان تۇك ۇيات ەمەس. كەرىسىنشە, مۇندا ءبىر تابيعي ديۋانالىق بار ەكەنىن سەزەمىن», دەپ جازادى.
ماسكەۋلىك ۆەلوسيپەدشىلەر قوعامى ءوز قاتارلارىنىڭ 67 جاستاعى قالامگەرمەن تولىققانىنا ەرەكشە تاڭعالدى. ءسويتىپ, تولستويعا اعىلشىننىڭ «Rover» ماركالى ۆەلوسيپەدىن سىيعا تارتتى.
بۇدان بولەك تولستوي اقساقال كونكي تەبۋدەن دە قۇر الاقان ەمەس, اتقا ءمىنىپ, ساعاتتار بويى جاياۋ جۇرۋدەن دە جالىقپاپتى. كەي كۇندەرى بالىق اۋلاپ, اڭعا شىعاتىن: ءتىپتى ايۋ اتقان دەسەدى (ارينە, ۆەگەتاريان بولعانشا). الەكساندر كۋپرين دە قۇمار اتلەت اتانىپ, تسيركتە ونەر كورسەتىپتى. ول اۋە شارىمەن كوتەرىلىپ, سۇڭگۋىر كوستيۋمىمەن سۋ استىنا تۇسكەن.
ال اۋەسقوي ساياتحاتشى كىم دەسەڭىز, اقىن نيكولاي گۋميلەۆتى ايتامىز. ول بىرنەشە رەت افريكادا ءارى ساياحاتشى, ءارى ەكسپەديتسيا جەتەكشىسى رەتىندە بولعان.
سپورتتىڭ ەڭ تىنىش ءارى سابىرلى تۇرىمەن يۆان تۋرگەنەۆ اينالىسقان. شاحماتتى وتە جاقسى ويناعان ول, ءتىپتى حالىقارالىق تۋرنيرلەرگە دە قاتىسىپ, جۇلدەلى بولعان دەسەدى.
