ءتۋرنيردىڭ اشىلۋ سالتاناتىنا باتىردىڭ اتا-اناسى مەن تۋىستارى, ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, حالىق قاھارمانى گەنەرال-مايور قايرات ۇمبەتوۆ, «ورتالىق» وڭىرلىك قولباسشىلىعىنىڭ قولباسشىلىعى, سونداي-اق جاڭاارقا اۋدانى اكىمدىگىنىڭ ارداگەرلەرى مەن وكىلدەرى قاتىستى.
گەنەرال قايرات ۇمبەتوۆ الدىمەن قاھارمان ساربازدىڭ اتا-اناسىمەن جۇزدەستى.
«قاتارداعى جاۋىنگەر ايبات امانوۆ پاتريوتيزم مەن وتانعا دەگەن شەكسىز ادالدىقتىڭ جارقىن ۇلگىسى. مەملەكەت باسشىلىعى, اسكەر قولباسشىلىعى قيىن - قىستاۋ ساتتە مەملەكەتتىگىمىزدى قورعاعان وتانىمىزدىڭ اردا ۇلدارىن جوعارى باعالايدى. قوس باتىردىڭ جارقىن بەينەسى ءبىزدىڭ جۇرەگىمىزدە ماڭگى ساقتالادى. وسىنداي ۇلتجاندى ۇلداردى تاربيەلەپ وسىرگەن اتا-انا, جاقىندارىنا مىڭ العىس! تىنىشتىق پەن تۇتاستىقتى ساقتاۋ جولىنداعى ايبات پەن مادياردىڭ ەرلىگى — وسكەلەڭ ۇرپاققا زور ۇلگى», دەدى حالىق قاھارمانى گەنەرال قايرات ۇمبەتوۆ.
سودان كەيىن, باتىر ساربازدىڭ تۇرعان ۇيىندە, اقسەلەۋ سەيدىمبەك ورتا مەكتەبىندە مەموريالدىق تاقتانىڭ اشىلۋى ءوتتى.
ءىس-شاراعا ارنايى كەلگەن ماديار قايساروۆتىڭ اكەسى ورازالى قايساروۆ ءسوز سويلەپ, ۇلتتىق ۇلان باسشىلىعى مەن اكىمدىك قىزمەتكەرلەرىنە العىسىن ءبىلدىردى.
«ايبات امانوۆ ەل تاۋەلسىزدىگىن قورعاعان باتىر. وسىنداي سىي-قۇرمەت كورسەتىلىپ جاتقانىنا اتا-انا رەتىندە العىسىمدى بىلدىرەمىن», دەدى ەرجۇرەك ساربازدىڭ اكەسى.
مەكتەپ ۇجىمى كوپشىلىكتى قاھارمان سارباز وقىعان سىنىپپەن تانىستىردى. ناتيجەسىندە مەكتەپ پەن ۇلتتىق ۇلان اراسىندا ءوزارا ىقپالداستىق تۋرالى مەموراندۋمعا قول قويىلدى. بولاشاقتا وسى ءبىلىم ۇياسىندا «جاس بۇركىت» اسكەري-پاتريوتتىق سىنىپ اشىلاتىن بولادى.
باتىر ساربازدىڭ ەرلىگىن ەسكە الۋعا ارنالعان بوكس بىرىنشىلىگىندە جۇزدەگەن ءجاسوسپىرىم باق سىنايدى.
ەسكە سالايىق, 2022 جىلعى قاڭتاردا جاپپاي تارتىپسىزدىكتەر كەزىندە قىزىلوردادا ورنالاسقان 5547 اسكەري ءبولىمىنىڭ قاتارداعى جاۋىنگەرى ماديار قايساروۆ, سونداي-اق تالدىقورعان قالاسىنداعى 5514 اسكەري ءبولىمىنىڭ قاتارداعى جاۋىنگەرى ايبات امانوۆ قارۋلاستارىن قۇتقارۋ ماقساتىندا سوققىنى وزدەرىنە قابىلداپ, ەرلىكپەن قازا تاپقان ەدى.
كورسەتكەن ەرلىگى مەن باتىلدىعى ءۇشىن اسكەري قىزمەتشىلەر قايتىس بولعاننان كەيىن مەملەكەت باسشىسىنىڭ جارلىعىمەن ءىىى دارەجەلى «ايبىن» وردەنىمەن جانە اسكەر باسشىسىنىڭ بۇيرىعىمەن «ۇلتتىق ۇلان قىزمەتىنىڭ ۇزدىگى» توسبەلگىسىمەن ماراپاتتالدى. باتىر جاۋىنگەرلەردىڭ ەسىمدەرى وزدەرى قىزمەت ەتكەن اسكەري ءبولىم جەكە قۇرامىنىڭ تىزىمىنە ماڭگىگە جازىلدى.
