فوتو: Polisia.kz
شقو پوليتسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى ەلىمىزدىڭ وڭتۇستىك وڭىرلەرىنەن شقو-عا سينتەتيكالىق ەسىرتكى تاسىمالدايتىن ءىرى ارنانىڭ جولىن كەستى.
ءتارتىپ ساقشىلارى وسكەمەن – الماتى اۆتوجولىندا الماتى وبلىسىنىڭ 26 جاستاعى تۇرعىنىنىڭ باسقارۋىنداعى Toyota Land Cruiser اۆتوكولىگىن توقتاتقان. كولىك قۇرالىن ءتىنتۋ بارىسىندا جەدەل ۋاكىلدەر اق ءتۇستى ۇنتاق زاتى بار 4 پوليمەرلى پاكەتتى تاپتى, سونىمەن قاتار كولىكتىڭ باگاجىنان تاعى 15 وراما تابىلىپ, تاركىلەندى.
ساراپتاما قورىتىندىسىنا سايكەس, تاركىلەنگەن زات مەفەدرون بولىپ شىقتى, جالپى سالماعى 1 كەلى 850 گر, بۇل ءبىر رەتتىك 6 مىڭنان استام دوزانى قۇرايدى. جاۋاپ الۋ بارىسىندا ەر ادام ەسىرتكىنى استانا مەن پاۆلوداردا تاراتقانىن ايتقان. كۇدىكتىگە قاتىستى ەسىرتكى قۇرالدارىن, پسيحوتروپتىق زاتتار مەن ولاردىڭ انالوگتارىن زاڭسىز ساتىپ العانى, ساقتاعانى, وتكىزگەنى ءۇشىن قىلمىستىق ءىس قوزعالدى. قازىرگى ۋاقىتتا ول قاماۋعا الىندى. ەر ادام مۇلكى تاركىلەنىپ, ون جىلدان ون بەس جىلعا دەيىنگى مەرزىمگە باس بوستاندىعىنان ايىرىلۋى مۇمكىن.
