«RGT-2024» چەمپيوناتىنا 20 ايماقتان وبلىستىق تۋرنيرلەردىڭ جەڭىمپازدارى قاتىستى. 9 بەن 17 جاس ارالىعىنداعى 300-دەن استام مەكتەپ وقۋشىسى «Robotek», «مەرگەن», «كەرى سىزىق جارىسى», «تۋدى جەتكىزۋ», «جەتكىزۋشى روبوت» جانە «سۇرىپتاۋشى روبوت» ساناتتارى بويىنشا باق سىنادى. بيىل «Robotek Grand Tournament» العاش رەت حالىقارالىق دەڭگەيگە شىعىپ, وزبەكستان, قىرعىزستان, تاجىكستان ەلدەرىنىڭ وقۋشىلارى دا جارىسقا كەلدى.
«Robotek» – STEM ءبىلىم بەرۋ جانە روبوتتەحنيكا سالاسى بويىنشا الەمگە ەلىمىزدىڭ اتىن شىعارىپ ءجۇر. 2023 جىلدىڭ قاراشاسىندا ونىڭ وقۋشىلارى پاناماداعى «World Robot Olympiad» الەم چەمپيوناتىندا كوك تۋىمىزدى جەلبىرەتتى. جەڭىس تۇعىرىنا بىردەن ەكى كوماندا كوتەرىلدى. «Robotek» ارقاسىندا جالپى مەدالدىق ەسەپتە قازاقستان قۇراماسى ءبىرىنشى رەت مالايزيا قۇراماسىن عانا ارتقا تاستاپ, ەكىنشى ورىن العان ەدى.
ء«بىز روبوتتەحنيكا بويىنشا اۋقىمدى رەسپۋبليكالىق جانە حالىقارالىق جارىستاردىڭ ءجيى وتۋىنە مۇددەلىمىز. «Robotek Grand Tournament» – مازمۇنى جاعىنان تولىعىمەن وتاندىق, بارلىعى اۆتورلىق رەگلامەنتتەر بويىنشا وتكىزىلدى, بۇل بالالاردى جاڭا ينجەنەرلىك شەشىمدەرگە شابىتتاندىرادى. چەمپيوناتتىڭ ميسسياسى ءبىزدىڭ كومپانيانىڭ ميسسياسىمەن ۇندەس, بالالارعا بولاشاققا سەنىمدى قادام جاساۋعا كومەكتەسۋ. ءبىز ناقتى ەكونوميكاعا جاڭا بۋىننىڭ وتاندىق ينجەنەرلىك رەزەرۆىن قۇرۋ بويىنشا جۇمىس ىستەپ جاتىرمىز. بۇگىن چەمپيوناتتاردا روبوتتاردى قۇراستىراتىن, باعدارلامالايتىن وقۋشىلار ەرتەڭگى كۇنى جاساندى ينتەللەكتىنىڭ قاتىسۋىمەن جوعارى تەحنولوگيالىق, تسيفرلىق, روبوتتاندىرىلعان كاسىپورىنداردا سۇرانىسقا يە بولادى», دەپ اتاپ ءوتتى كومپانيانىڭ باس ديرەكتورى سانجار شالقاربەكوۆ.
ودان بولەك, تۇركىتىلدەس ەلدەردىڭ ۇزدىك روبوتتەحنيكتەرى دە جينالدى. «TurkTime!» جاھاندىق باستاماسى اياسىندا وتاندىق «روبوتەك» كومپانياسى مەن قىرعىزستاننان اقىلمان پرەزيدەنتتىك ليتسەيى (شولپان اتا), «ساپات» حالىقارالىق جەلىسى (بىشكەك), «Seytek STEM» ءبىلىم بەرۋ جەلىسى (توكماك), تاشكەنت پەن شىرشىقتان SteamLand جانە Roboschool ءبىلىم بەرۋ ورتالىقتارى, سونىمەن قاتار تاجىكستاندىق «ليگا روبوتوۆ» اراسىندا ىنتىماقتاستىق تۋرالى مەموراندۋمعا قول قويىلدى.
باستى كۋبوك – «ەل كۋبوگىن» – باتىس قازاقستان وبلىسىنىڭ قۇراماسى ورالعا الىپ كەتتى. بيىل العاش رەت ءۇش ارنايى اتالىم ەنگىزىلدى: «ۇزدىك ينجەنەرلىك شەشىم», ونىڭ جەڭىمپازدارى تۇركىستان وبلىسىنىڭ كەنتاۋ قالاسىنان يبراگيم يسكاندەروۆ پەن نۇريسلام ەرشوۆ, «ۇزدىك اۋىلدىق كوماندا» جەتىسۋ وبلىسى اقسۋ اۋدانىنان بەكجان مۇحتاربەك پەن رومان پرونياكوۆقا تاعايىندالدى. ال شىرشىقتان كەلگەن ارتەم اپپازوۆ پەن دجاحونگير مامادجانوۆ «ۇزدىك شەتەلدىك كوماندا» اتالىمىنا يە بولدى. ەڭ باستى سىيلىق – ەلىمىزدەگى جەتەكشى جوو – قازاقستان – بريتان تەحنيكالىق ۋنيۆەرسيتەتىنىڭ اقپاراتتىق تەحنولوگيالار جانە ينجەنەريا مەكتەبىنە ءبىلىم گرانتىن اباي وبلىسى ءۇرجار اۋدانىنان كەلگەن ميراس سليامعازىعا بۇيىردى.
«وتاندىق يندۋستريانىڭ بولاشاعى جاڭا تەحنولوگيالىق ازىرلەمەلەرگە, ولاردى جاساۋشىلارعا بايلانىستى. چەمپيوناتتا اكادەميالىق ءبىلىمدى دە, قاتىسۋشىلاردىڭ شىعارماشىلىق ويلاۋىن دا دالەلدەيتىن ساۋاتتى ينجەنەرلىك شەشىمدەر باسىم بولدى. بۇگىنگى تاڭدا ءاربىر جوعارى وقۋ ورنى تەحنيكالىق ماماندىقتاردى سانالى تۇردە تاڭداعان وقۋشىلاردىڭ وزدەرىندە وقۋىنا مۇددەلى, ال كاسىپورىنداردا ناعىز كاسىپقوي مامانعا اينالاتىن ۇزدىك تۇلەكتەر وزەكتى», دەدى دەمەۋشى بولعان «Allur» اۆتوموبيل كومپانياسى برەندتى دامىتۋ ءبولىمىنىڭ باستىعى رىستى اسەنوۆا.
ەلىمىزدىڭ «Robotek Grand Tournament» چەمپيوناتىنا كەلەسى جىلى 20-دان استام ەلدەن قاتىسۋشىلار كەلۋگە دايىن, بۇل بەدەلدى چەمپيوناتقا دەگەن ۇلكەن قىزىعۋشىلىقتى دالەلدەيدى. كەلەسى جىلى استانادا «Robotek Grand Tournament» الاڭىندا امەريكا قۇراما شتاتتارى, قىتاي, تۇركيا, ازەربايجان, وڭتۇستىك كورەيا, جاپونيا, تايۆان, باسقا دا ەلدەردىڭ جاس روبوتتەحنيكتەرى كەزدەسۋگە نيەتتى.
