بۇيرا بۇلتتىڭ باۋىرىنان سەبەزدەگەن تامشىداي جان جايلاۋىن جادىراتار ءمولدىر شىعارمالار جىل سايىن جەتىسۋ رۋحانياتىنا قوسىلىپ جاتىر. سونىڭ ءبىرى – رەجيسسەر مۇساتاي اقىنجانوۆتىڭ «التىن ساقا» ەرتەگىسى. بۇل قويىلىمنىڭ ەرەكشەلىگى سول, 3D Fantasy نۇسقادا العاش رەت ساحناعا جول تارتتى. بۇرىن تەاتردا 1979 جىلى رەجيسسەر مۇحتار قامباروۆ ساحنالاعان ەدى. تۋرا 45 جىلدان كەيىن اتالعان ەرتەگى فەنتەزي جانرىندا قايتا جاڭعىرىپ وتىر.
ء«بىز ەرتەگىنى بالالارعا زامان تالابىنا ساي نۇسقادا ۇسىنىپ وتىرمىز. مۇندا قازىرگى بالدىرعانداردىڭ قارىم-قابىلەتى, ويلاۋ دەڭگەيى ەسكەرىلگەن. جەڭىل ءارى قىزىققا تولى قويىلىم. باستاۋىش سىنىپ وقۋشىلارىنىڭ سۇيىكتى ەرتەگىسى بولادى دەپ ويلايمىن», دەيدى قويۋشى-رەجيسسەر مەرەي اجىبەكوۆ.
ونىڭ ايتۋىنشا, سپەكتاكلدىڭ ءساتتى شىعۋىنا قويۋشى-سۋرەتشى جانات دۇيسەنباەۆ پەن كوستيۋم-سۋرەتشىسى قارلىعاش شالاباەۆانىڭ سىڭىرگەن ەڭبەگى زور. ۇجىمداعى ارتىستەر دە كىشكەنتاي كورەرمەندەردىڭ كوڭىلىنەن شىعۋعا بارىن سالعان.
«التىن ساقاداعى» بالانىڭ بويىندا كلاسسيكالىق باتىرلىق ەرتەگىگە ءتان بەلگىلەردىڭ ءبارى بار. جۇرتتا قالىپ قويعان التىن ساقاسىن الىپ كەلۋگە بارىپ, جالماۋىز كەمپىرگە كەز بولعان بالا كەمپىردىڭ الداعانىنا سەنبەي, ساقاسىن ات ۇستىنەن ءىلىپ الىپ, قاشا جونەلەدى. مىستان كەمپىر تۇرا قۋادى. وسىمەن وقيعا شيەلەنىسە تۇسەدى. ومىردەگى تارتىستار, ميفتىك كورىنىستەر, ۇلتتىڭ ادەت-عۇرپى بارلىعى ەرتەگىدە كورسەتىلەدى.
«ماعان ەرتەگى قاتتى ۇنادى. اسىرەسە جالماۋىز كەمپىردىڭ قىلىقتارى ەرەكشە. ارامىزدا قورقىپ وتىرعاندار دا بولدى. بىراق اكتەرلەر نانىمدى ويناپ, رولدەرىن وتە جاقسى الىپ شىقتى. ءدال وسى قويىلىمعا كەلگەنىمە قۋانىشتىمىن. ەرتەگىنى بۇلاي اسا زور قىزىعۋشىلىقپەن العاش رەت تاماشالاپ وتىرمىن», دەيدى مەكتەپ وقۋشىسى ارسەن ەلمۇرات.
كىشكەنتاي كەيىپكەردىڭ ەرلىگىنىڭ ناتيجەسىندە ونىڭ اتا-اناسى عانا ەمەس, تۇتاس تۋعان ەلى جالماۋىز كەمپىردىڭ قورلىق-زورلىعىنان ازات بولادى. قىزىقتى قويىلىم بالدىرعانداردى اقىلدى بولۋعا تاربيەلەپ, باتىرلىق پەن باتىلدىققا شاقىرادى.
