كوركەم گيمناستيكا سپورت ءتۇرىن قارقىندى دامىتۋ, كوماندالار سانىن كوبەيتۋ, گيمناسشىلاردىڭ شەبەرلىگىن شىڭداۋ ماقساتىنداعى سايىستىڭ اشىلۋ سالتاناتىنا جاڭاوزەن قالاسىنىڭ اكىمى جانسەيىت قاينارباەۆ, استانا قالاسى سپورت دامىتۋ ورتالىعىنىڭ پرەزيدەنتى نۇرجان زاكاريا ۇلى قاتىسىپ, سپورتشىلارعا ساتتىلىك تىلەدى.
چەمپيوناتقا ماڭعىستاۋ وبلىسى بويىنشا اقتاۋ قالاسى, بەينەۋ اۋدانى, جاڭاوزەن قالاسىنان قۇراما كوماندالار قاتىسىپ, باق سىنادى. جارىستا 8-10 جاس ارالىعىندا 6 توپ, 10-12 جاس ارالىعىندا 2 توپ, 16 جاستان جوعارى 1 توپ ونەر كورسەتتى.
– بۇعان دەيىن وڭىرلىك جاتتىقتىرۋشىلاردىڭ تاجىريبەسىن ارتتىرۋ ماقساتىندا رەسپۋبليكالىق دەڭگەيدە سەمينار, شەبەرلىك-ساعاتى, وقۋ-جاتتىعۋ جيىنى وتكەن ەدى. ماڭعىستاۋ وبلىسى بويىنشا ەستەتيكالىق توپتىق گيمناستيكادان باس جاتتىقتىرۋشى ءوزىم بولعاندىقتان جارىستىڭ ۇيىمداستىرىلۋىن ءجىتى قاداعالادىم. اتالعان جارىس سپورت دامىتۋ ورتالىعىنىڭ دەمەۋشىلىگىمەن وتكىزىلدى. ءىس-شاراعا 100 شاقتى سپورتشى قاتىستى. ولاردىڭ اراسىندا مەنىڭ كوماندام «Caspian stars» تا بار. ايتا كەتسەم, جاڭاوزەندىك «Caspian stars» كومانداسى – بىلتىرعى قازاقستان چەمپيونى, ەل كۋبوگىنىڭ جەڭىمپازى. ال بيىل قازاقستان كۋبوگىنىڭ ءفيناليسى اتاندى, – دەدى ماڭعىستاۋ وبلىسى بويىنشا ەستەتيكالىق توپتىق گيمناستيكادان باس جاتتىقتىرۋشى نۇرساۋلە زاكارياقىزى.
ەستەتيكالىق توپتىق گيمناستيكانىڭ ەرەكشەلىگى كوماندا توپپەن ونەر كورسەتەدى. ءبىر توپتا بەلگىلەنگەن جاس ەرەكشەلىگىنە ساي 14 گيمناسشىعا دەيىن ونەر كورسەتۋگە رۇقسات ەتىلەدى.
چەمپيوناتقا قازاقستاننىڭ ەستەتيكالىق توپتىق گيمناستيكا فەدەراتسياسىنىڭ ەستەتيكالىق توپتىق گيمناستيكا جونىندەگى تەحنيكالىق كوميتەتىنىڭ توراعاسى, 1-دەڭگەيدەگى ەستەتيكالىق توپتىق گيمناستيكا بويىنشا IFAGG حالىقارالىق ساناتتاعى تورەشى زارينا داۆلەتياروۆا, اتالعان كوميتەتتىڭ مۇشەسى يرينا رۋسينوۆا استانا قالاسىنان ارنايى كەلىپ, قازىلار القاسى قۇرامىندا بولىپ, گيمناسشىلارعا باعا بەردى.
– قازىلار القاسى قۇرامىندا بىزبەن بىرگە ماڭعىستاۋلىق تورەشىلەر دە بولدى. ءبىز ءۇش بريگادا بولىپ باعالادىق. ءبىرىنشى بريگادا تەحنيكالىق قۇندىلىقتارىنا قاراي, ەكىنشىسى ارتىستىك ونەرىنە, ال ءۇشىنشى بريگادا ورىندالۋىنا قاراي باعا بەردى, – دەدى ز.داۆلەتياروۆا.
گيمناسشىلار ەرەكشە كيىمدەرىمەن, اۋەزدى اۋەنمەن ۇيلەسىم تاپقان نازىك قيمىلدارىمەن كورەرمەندى ءتانتى ەتتى. ءدۇبىرلى دودا جوعارى دەڭگەيدە ءوتتى. سايىستا ءار كوماندا ءوز ونەرىن كورسەتتى. جەڭىسكە جەتكەن كوماندالار مەدالمەن, العىسحاتپەن جانە كۋبوكپەن ماراپاتتالدى.
سىرباز سپورت كوركەم گيمناستيكاعا ماڭعىستاۋ وڭىرىندە قىزىعۋشىلار سانى ارتىپ كەلەدى, بولاشاق چەمپيوننىڭ شىراعى جاناتىن كۇن بولارى انىق.
ماڭعىستاۋ وبلىسى
