كورنەكتى مەملەكەت قايراتكەرى, اعارتۋشى, ادەبيەتشى سماعۇل سادۋاقاس ۇلى 1919 جىلى ومبى قالاسىندا شىعاتىن «ترۋدوۆايا سيبير» جۋرنالىندا جاريالانعان «كيرگيزسكايا ليتەراتۋرا» دەگەن وچەركىندە قازاق ادەبيەتىنىڭ جاعدايى, ونىڭ وركەندەۋى جونىندە تالداۋ جاساعان.
«اقىنداردىڭ ىشىندە حالىقشىل اقىن س.دونەنتاەۆ ايرىقشا دارالانادى. ونىڭ ولەڭدەرىنىڭ رۋحى تازا قازاقشا, ۇلتتىق ارقاۋى ايرىقشا بەرىك, شۋماقتارىنىڭ جۇيەلىلىگى, بۋناقتارىنىڭ ۇندىلىگى جونىنەن, تەرەڭ مازمۇنى جونىنەن, ەڭ اقىرى كەرەمەت وتكىرلىگى جونىنەن دونەنتاەۆ ولەڭدەرى حالىق پوەزياسىنىڭ اتاسى بايتۇرسىن ۇلى پەن نازىك جاندى ليريك جۇماباەۆتىڭ شىعارمالارىنا جەتەعابىل», دەپ جازدى. بۇدان بايقايتىنىمىز, س.دونەنتاەۆ – ءوز زامانىندا-اق ناقتى باعاسىن العان اقىن. ال تۇلعانىڭ قازاق ادەبيەتىنىڭ دامۋىنا قوسقان ۇلەسى قوماقتى.
ءسابيتتىڭ باسپاسوزبەن بايلانىسى, ياعني جۋرناليستىك قىزمەتى 1912 جىلى پاۆلودارداعى قاسىم ەرتىسباەۆتىڭ مەدرەسەسىندە وقىپ جۇرگەن كەزىنەن باستالعان. سەمەيدەگى مۇعالىمدەر دايارلايتىن كۋرستا وقي ءجۇرىپ, «سارىارقا» گازەتى مەن «اباي» جۋرنالىنا ولەڭدەرىن جولداپ وتىرادى. كەيىن «قازاق ءتىلى مەن ادەبيەتى», «سوتسياليستىك شىعىس», «جاڭا اۋىل», «قازاق ءتىلى» گازەتتەرىندە ءتىلشى, ءبولىم مەڭگەرۋشىسى بولىپ قىزمەت اتقارادى. سەمەيدەگى جۋرناليستىك قىزمەتىندە ول جەرگىلىكتى دراماتۋرگتەرمەن, سونىڭ ىشىندە جۇمات شانينمەن بايلانىس ورناتىپ, پەسالاردى تالقىلاۋعا ارالاسقان. اقىن دراماتۋرگيانى وتە قيىن جانر دەپ ەسەپتەگەن.
بۇقار جىراۋ مۋزەيىندە ساقتالىپ تۇرعان سياساۋىتتى كەزىندە سەمەيدەگى «جاڭا اۋىل» (قازىرگى «سەمەي تاڭى») گازەتىنىڭ رەداكتسياسى اقىنعا سىيعا تارتقان. اتالعان باسىلىم 1928-1930 جىلدار ارالىعىندا شىعىپ تۇرعان. سياساۋىتتىڭ استىڭعى جاعىندا لاتىن ارىپتەرىمەن «س.دونەنتاي ۇلىنا «جاڭا اۋىلدان» بەرىلگەن بەلگى» دەپ جازىلعان.
جادىگەردى كەزىندە تۇلعانىڭ قىزى ساۋلەت سابيتقىزى اكەسىنىڭ تۋعان جەرىنە ارنايى اكەلىپ, مۋزەيگە تابىس ەتكەن ەكەن.
پاۆلودار وبلىسى
