اتىراۋعا باشقۇرتستان كاسىپورنى قىزىعۋشىلىق تانىتتى

اتىراۋ.13 قاڭتار. اتىراۋ وبلىسى مەن رەسەي قۇرامىنداعى باشقۇرتستان رەسپۋبليكاسى اراسىندا ىسكەرلىك بايلانىس جاندانا باستاماق. بۇل تۋرالى egemen.kz ءتىلشىسى حابارلادى. رەسەيمەن شەكارالاس ايماقتىڭ ءبىرى – اتىراۋ وبلىسى مەن باشقۇرتستان اراسىندا ءوزارا ىنتىماقتاستىق تۋرالى مەموراندۋمعا قول قويىلعان. وسى مەموراندۋم اياسىنداعى ىسكەرلىك بايلانىستى كەڭەيتۋدى كوزدەگەن باشقۇرتستانداعى «يمپۋلس» عىلىمي-وندىرىستىك كاسىپورنىنىڭ عىلىمي جەتەكشىسى, حيميا عىلىمدارىنىڭ دوكتورى ولەگ پتاشكو وبلىس اكىمى باقتىقوجا ىزمۇحامبەتوۆپەن كەزدەسۋدە اتىراۋداعى ەركىن ەكلنوميكالىق ايماقتا بىرلەسكەن كاسىپورىن قۇرۋدىڭ مۇمكىندىكتەرى تۋرالى ءمالىم ەتتى. «ءبىز مۇناي-گاز سالاسىنا قاجەتتى حيميالىق رەاگەنتتەر شىعاراتىن ءوندىرىس اشۋدى, سونان سوڭ بيزنەستى قۇرىلىس ماتەريالدارى مەن وسىمدىك ءوسۋىن رەتتەۋشى ازىرلەۋگە ديۆەرسيفيكاتسيالاۋدى جوسپارلاپ وتىرمىز. بۇل جوسپارىمىزدى بارلىق تالاپتار مەن ەكولوگيالىق نورمالاردى ساقتاپ, ەكى-ءۇش جىلدا ىسكە اسىرۋعا بولادى. ءبىزدىڭ كاسىپورنىمىزدىڭ عىلىمي الەۋەتى جوعارى, 1996 جىلدان بەرى حيميالىق رەاگەنتتەر شىعارادى. ءوزىمىزدىڭ ارنايى ەكى زەرتحانامىز بار. رەسەيدەگى جانە باشقۇرتستانداعى عىلىم اكادەميالارىمەن بايلانىسىمىز ورنىققان. ەندى ءبىز اتىراۋدا دا سوڭعى تەحنولوگيالار نەگىزىندە حيميالىق رەاگەنتتەر شىعارۋمەن بىرگە, قۇرىلىس, اۋىل شارۋاشىلىعى سالالارىندا دا ەكى جاققا ءتيىمدى جوبالاردى ىسكە اسىرۋعا نيەتتىمىز», – دەدى ولەگ پتاشكو. جولداسبەك شوپەعۇل. دەرەك, سۋرەت: egemen.kz.