فوتو: Samruk-Kazyna Construction
ء«بىز «جايلى مەكتەپ» ۇلتتىق جوباسى بويىنشا قۇجات اينالىمىن تولىقتاي ەلەكتروندىق فورماتقا اۋىستىردىق. ياعني, ەندى قاعازباستىلىقتى ۇمىتۋعا بولادى. بۇل وتاندىق قۇرىلىس سالاسى ءۇشىن ۇلكەن سەرپىلىس. ەل پرەزيدەنتى قاسىم-جومارت كەمەل ۇلى توقاەۆ ءوز جولداۋىندا: «تسيفرلاندىرۋ – بارلىق رەفورمانىڭ نەگىزگى ەلەمەنتى جانە ۇلتتىڭ باسەكەگە قابىلەتتىلىگىن ارتتىرۋدىڭ نەگىزگى قۇرالى», دەپ اتاپ وتكەن ەدى. قۇرىلىس سالاسىندا Samruk-Kazyna Construction ەلىمىزدە العاشقى بولىپ «ە-Qurylys» جۇيەسىنە كوشىپ جاتىر», دەدى ماۋلەن ايمانبەتوۆ.
ونىڭ ايتۋىنشا, مەملەكەت باسشىسىنىڭ تاپسىرماسىن ورىنداۋ اياسىندا بىرنەشە اي بويى ءتيىستى جۇمىس اتقارىلدى. «ە-Qurylys» اقپاراتتىق جۇيەسىندە بارلىق پروتسەسستەر تسيفرلاندىرىلدى. سوندىقتان جوبادان اۋىتقۋعا, ورىندالماعان جۇمىستاردى قابىلداۋعا جول بەرىلمەيدى.
بارلىق اكتىلەر اۆتوماتتى تۇردە جاساقتالادى. ءتيىستى قۇجاتتار مەن فوتوسۋرەتتەردىڭ ءبارى ەلەكتروندى فورماتتا جۇيەگە جۇكتەلىپ, ەلەكتروندى اكت جاسالمايىنشا, مەردىگەرلەرگە ءبىر تيىن تولەم جاسالمايدى. بۇل سىبايلاس جەمقورلىق پەن «بەيرەسمي قارىم-قاتىناستار» سىندى قاۋىپ-قاتەرلەردى بولدىرمايدى, ال قۇرىلىس پروتسەسى بارىنشا اشىق جۇرگىزىلەدى.
العاشىندا ۇلتتىق جوبانى «ە-Qurylys» پلاتفورماسىندا ىسكە اسىرۋعا قۇرىلىسشىلار وداعى, وڭىرلەردەگى قۇرىلىس باسقارماسى باسشىلارى مەن قۇرىلىس كومپانيالارى قارسىلىق بىلدىرگەن. ولار جۇيەنىڭ ءالى «شيكى» ەكەنىن العا تارتىپ, ەسكى ءتارتىپ بويىنشا «قاعازبەن» جۇمىس ىستەۋدى سۇرادى. سونداي-اق جوبالىق-سمەتالىق قۇجاتتامانىڭ ءالى ساراپتاما قورىتىندىسىن الماعانىن العا تارتىپ, بۇل باستامانى سىنعا العاندار از بولمادى.
«نەگىزىندە, بىزدە اقپان ايىندا العاشقى اكتىلەردى قاعاز جۇزىندە قابىلداۋعا مۇمكىندىك بولدى. الايدا, جوبانىڭ اشىقتىعىن, تازالىعىن قامتاماسىز ەتىپ, جەمقورلىق پەن باسقا دا بۇزۋشىلىقتاردى بولدىرماۋ ءۇشىن قۇجات اينالىمىن تولىقتاي ەلەكتروندى فورماتقا كوشىرۋدى ماقسات قويدىق. ول ءۇشىن 3 اي ۋاقىت جوعالتۋعا تۋرا كەلدى. حالقىمىز «اسىققان شايتاننىڭ ءىسى», «سابىر ءتۇبى سارى التىن» دەپ بەكەر ايتپاعان. تسيفرلاندىرۋ – قازىرگى كەزەڭنىڭ تالابى ەكەنىن تۇسىنگەن ءجون. «جايلى مەكتەپ» ۇلتتىق جوباسى ەرس-شارتتار بويىنشا جۇزەگە اسىرىلىپ جاتىر. ياعني جوبالاۋ, قۇرىلىس جانە جابدىقتاۋ جۇمىستارى ءبىر ۋاقىتتا «پاراللەلدى» جۇرگىزىلگەندىكتەن, قۇرىلىس مەرزىمى ءبىرشاما قىسقارادى. سوندىقتان دا, جوبا «پيلوتتىق» دەگەن مارتەبەگە يە. ءبىز جاڭا ادىستەمەنى سىناپ جاتىرمىز. 98 مەكتەپتى وقۋ جىلىنىڭ باسىنا دەيىن قولدانىسقا تاپسىرۋدى جوسپارلاپ وتىرمىز. ولاردىڭ جارتىسىنان استامى, ياعني 53 نىساننىڭ جوبالىق سمەتالىق قۇجاتتاماسى مەملەكەتتىك ساراپتامادان ءوتىپ, وڭتايلى قورىتىندى الدى. قالعاندارى جاقىن ارادا ساراپتامادان وڭ قورىتىندىمەن شىعادى دەپ جوسپارلانعان», دەپ ءتۇسىندىردى ماۋلەن ايمانبەتوۆ.
Samruk-Kazyna Construction باسقارما توراعاسىنىڭ ايتۋىنشا, جاڭاشىلدىقتى ەندىرۋ جانە ىسكە قوسۋ پروتسەسىندە كوپتەگەن تەحنيكالىق قيىندىقتار تۋىندادى. Samruk-Kazyna Construction مەن ازىرلەۋشى كومپانيا ماماندارى بىرلەسە وتىرىپ, كەمشىلىكتەردىڭ ءبارىن تۇزەتتى. كۇن سايىن مەردىگەرلەر مەن جوبالاۋشى ۇيىمدار, ءبىزدىڭ قىزمەتكەرلەر, تەحنيكالىق جانە اۆتورلىق قاداعالاۋ ساراپشىلارىنىڭ قاتىسۋىمەن وقىتۋ سەمينارلارى, جينالىستار وتكىزىلدى.
«قول قويىلعان ءبىرىنشى ەلەكتروندى اكتى مەن جاسالعان تولەم – بۇل بىرنەشە ايعا سوزىلعان قاجىرلى جانە ۇزدىكسىز جۇمىسىمىزدىڭ ناتيجەسى. وسى ىسكە اتسالىسقان بارلىق قىزمەتكەرگە العىسىم شەكسىز. ويتكەنى, قايتالاپ ايتايىن, Samruk-Kazyna Construction الەۋمەتتىك نىسانداردىڭ عانا ەمەس, جالپى قۇرىلىستا العاشقى بولىپ «ە-Qurylys» پلاتفورماسىن ەندىردى. بۇل ءبىز ءۇشىن ۇلكەن مارتەبە عانا ەمەس, سونداي-اق زور جاۋاپكەرشىلىك. جۇيەنى ودان ءارى جەتىلدىرۋ بويىنشا جۇمىستار ءالى دە جالعاسىن تابادى», دەپ تۇيىندەدى ماۋلەن ايمانبەتوۆ.
