فوتو: parlam.kz
ەرلان سايروۆتىڭ ايتۋىنشا, 2023 جىلدىڭ قازان ايىنان باستاپ شىعىس قازاقستان, الماتى, تۇركىستان, اتىراۋ وبلىستارىنىڭ بارلىق جەرلەرىندە بالىق ونىمدەرىن وڭدەيتىن توعىز زاۋىتقا قارسى نەگىزسىز قىلمىستىق ىستەر قوزعالعان.
اتالعان زاۋىتتىڭ بارلىعى ءونىمدى ەكسپورتقا شىعارۋمەن اينالىسادى. دەمەك, بۇل زاۋىتتاردىڭ بۋحگالتەرياسى اشىق, ال شىققان ونىمدەر كەدەن ارقىلى باقىلانىپ وتىرادى.
ايتا كەتسەك, وتاندىق بالىق ونەركاسىبى سالاسى 1 300-گە جۋىق بالىق شارۋاشىلىعىنىڭ سۋبەكتىلەرىنەن تۇرادى, اتالعان سالادا جانە وعان ەنشىلەس كاسىپورىنداردا 500 مىڭعا جۋىق ادام جۇمىس ىستەيدى. بالىق ونەركاسىبى سالاسى - قازاقستاننىڭ دايىن ءونىمدى ەكسپورتتاۋعا باعىتتالعان بىردەن-ءبىر ەكونوميكالىق باعىتى. بالىقشىلار وڭدەلگەن بالىق ونىمدەرىن ەو, قىتاي, تمد ەلدەرىنە, تاياۋ شىعىس ەلدەرىنە, سونداي-اق تاعى باسقا 36-مەملەكەتكە ەكسپورتتاپ وتىر. وتكەن جىلدارى وڭدەلگەن شورتان, سازان, سۋداك ءتارىزدى بالىقتاردىڭ 30-مىڭ تونناعا جۋىق ءونىمى ەكسپورتتالعان.
«وسىناۋ ەلىمىزدىڭ ىشكى جالپى ءونىمىن ەكسپورتتىق تاۋارلارمەن تولتىرىپ وتىرعان ەكونوميكا سالاسىنىڭ كاسىپورىندارىنا قارجىلىق مونيتورينگ اگەنتتىگى سالىق تولەۋدەن جالتىردى دەگەن ەكى ۇدايى ايىپپەن قىلمىستىق ءىس اشىپ قويعان. مەملەكەتكە سالىق تولەپ, مىڭداعان ازاماتتى جۇمىسپەن قامتىپ وتىرعان توعىز زاۋىتتىڭ بۇكىل بۋحگالتەريا, ءىس-جۇرگىزۋ قۇجاتتارى تاركىلەنگەن, كاسىپورىنداردىڭ جۇمىسىن توقتاتقان. قارجىلىق مونيتورينگ اگەنتتىگىنىڭ ارەكەتتەرى ەلىمىزدىڭ ەكسپورتتىق الەۋەتىن ارتتىرىپ وتىرعان ەكونوميكا سالاسىنىڭ جۇمىسىن تولىق توقتاتۋعا الىپ كەلۋى مۇمكىن. ياعني, مەملەكەتكە تولەنىپ وتىرعان سالىق توقتاپ, بالىق ونەركاسىبى, ەنشىلەس كاسىپورىنداردا ىستەيتىن مىڭداعان ازاماتتىڭ جالاقىسىنىڭ تولەنبەي, زاۋىتتارعا شەتەلدەن ءونىمدى ۋاقىتىندا جەتكىزبەگەنى ءۇشىن شترافتىق سانكتسيالاردىڭ كەلۋ قاۋپى ءتونىپ تۇر. «شاش ال دەسە, باس الاتىن» تەكسەرۋشىلەر مەن نەگىزسىز تەكسەرۋلەردەن بالىقشىلاردى اراشالاپ قالۋىمىز كەرەك», دەدى دەپۋتات.
ەرلان سايروۆ بالىقشىلار تاراپىنا جاسالىپ جاتقان شابۋىل كەيبىر ەكونوميكالىق كۇشتەردىڭ رەيدەرلىك ارەكەتتەرى دە بولۋى مۇمكىن ەكەنىن ايتتى.
وسى ورايدا AMANAT فراكتسياسىنىڭ مۇشەسى قازاقستاننىڭ ەكسپورتىن قالىپتاستىراتىن ەكونوميكا سالاسىن دامىتۋ جولىندا بىرقاتار ۇسىنىسىن ورتاعا سالدى.
«باس پروكۋراتۋرا قارجىلىق مونيتورينگ اگەنتتىگىنىڭ بالىق زاۋىتتارىن تەكسەرۋدىڭ زاڭدىلىعىن انىقتاۋى قاجەت جانە قىلمىستىق ءىستىڭ اشىقتىعىن قامتاماسىز ەتۋى ءتيىس. قارجىلىق مونيتورينگ اگەنتتىگىنىڭ اشقان قىلمىستىق ىستەرىنە تەز ارادا قاجەتتى قۇقىقتىق باعا بەرىپ, قاراستىرىلىپ وتىرعان ىستەردى زاڭ اياسىندا ادىلەتتى توقتاتۋدى قاجەت دەپ ەسەپتەيمىن. باس پروكۋراتۋرا قۇقىق قورعاۋ ورگاندارىنىڭ ەكونوميكا سۋبەكتىلەرىنە ءجون-جوسىقسىز شەڭگەل قولدارىن سوزا بەرۋىن توقتاتۋى ءتيىس. باس پروكۋراتۋرا پرەزيدەنت قاسىم-جومارت توقاەۆتىڭ قۇقىق قورعاۋ ورگاندارعا وتاندىق بيزنەستى كۇشتەۋدى توقتاتۋ جونىندەگى تاپسىرماسىن تولىق ورىندالۋىن قامتاماسسىز ەتۋ ماڭىزدى», دەپ قورىتىندىلادى دەپۋتات.
