فوتو: kaz.orda.kz
سالاعا جاۋاپتى مينيسترلىك پەن جەتىسۋ وبلىسىنىڭ اكىمدىگى تاقىرىپ توڭىرەگىندە جۋرناليستەردىڭ بىلىكتىلىگىن ارتتىرۋ ءۇشىن باق وكىلدەرىنىڭ باسىن قوستى. تالدىقورعاندىق ارىپتەستەرىمىز ب.قۇرانبەك اتىنداعى جۋرناليستەر ۇيىنە جيىلسا, رەسپۋبليكانىڭ وزگە وڭىرىندەگى تىلشىلەر Zoom پلاتفورماسى ارقىلى كاسىبيلەردەن كەڭەس الدى.
الدىمەن ءسوز العان باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ «ماسس-مەديا تۋرالى» زاڭعا ەنگىزىلەتىن تۇزەتۋلەر سوڭعى ساتى سەناتتا تالقىلانىپ جاتقانىن جەتكىزىپ, كەيىنگى وزگەرىستەردەن قۇلاعدار ەتتى.
احەتوۆتىڭ ايتۋىنشا, ايماقتاعى جۋرناليستەردىڭ الەۋمەتتىك الەۋەتىن كوتەرۋدى كوزدەيتىن «پرەسس-كارتا» جەڭىلدىگىن ەنگىزۋدى مامانداردىڭ ءوزى ماقۇلداماعان. وعان مەديا تۇلعالاردى بولە-جارىپ قاراۋ قادامىنىڭ الدىن الۋ سەبەپ بولىپتى.
الايدا جۋرناليست, اقىن ايتاقىن بۇلعاقوۆ بۇل ماسەلەنىڭ سالماعىن سارالاۋ ءۇشىن «تاۋەلسىز ساراپشىلاردى» ىسكە تارتۋدى ۇسىندى.
«الاتاۋ» گازەتى رەسپۋبليكالىق قوعامدىق-ساياسي باسىلىمنىڭ باس رەداكتورى تىلشىلىككە قاتىستى بىرقاتار زاڭنامالىق باستامالارىن ورتاعا سالدى. ولاردىڭ قاتارىندا مەملەكەتتىك جانە جەكەمەنشىك باسىلىمداردىڭ مارتەبەسىن تەڭەستىرۋ, «اقپارات سالاسىنىڭ ۇزدىگى» اتاعىنا ۇسىنۋدىڭ جولىن قىسقارتۋ, جەرگىلىكتى جۋرناليستەردىڭ جالاقىسىن دا كوتەرۋ مەن گازەتتەر ءۇشىن وتكىزىلەتىن تەندەرگە جىلدا تەلمىرتپەي 3 جىلدا ءبىر-اق وتكىزۋ, جالپى جۋرناليستەردىڭ قۇقىقتىق قولداۋ ماسەلەلەرى بار.
باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ «ماسس-مەديا تۋرالى» زاڭعا ەنگىزىلگەن سوڭعى تۇزەتۋلەردە باق ءۇشىن مەملەكەتتىك تاپسىرىستى 3 جىلعا دەيىن جاساۋ مۇمكىندىگى قاراستىرىلىپ وتىرعانىن تىلگە تيەك ەتتى.
«جۋرناليستەردىڭ كاسىبي قۇقىقتارىن قورعاۋعا مەملەكەت تە مۇددەلى. ەندى مەملەكەتتىك تاپسىرىس 2 نەگىزدە قاراستىرىلادى. ءبىرىنشىسى: مەملەكەتتىك باق ءۇشىن – مەملەكەتتىك تاپسىرىس جانە جەكە مەنشىكتەگى باق ءۇشىن – مەملەكەتتىك گرانت. تاپسىرىستى الۋعا بارلىق مەديا قۇقىلى. سونداي-اق تاپسىرىس بەرۋ مەرزىمىن ۇزارتۋ ارقىلى كونتەنت ساپاسىن ارتتىرۋ ماقساتى قويىلىپ وتىر. مەملەكەت وسى تاپسىرىس نەگىزىندە عانا باق-تى قارجىلاندىرىپ, كونتەنتىن ساتىپ الا الادى», دەدى ق.احەتوۆ.
قازاقستاندا رەسمي 5 000 باق تىركەلسە, ونىڭ 80-90 پايىزى جەكەنىڭ جاۋاپكەرشىلىگىندە. وسى تۇستا كوپشىلىككە كاسىبي, ساۋاتتى, تەكسەرىلگەن ماتەريال ۇسىنۋدا جۋرناليستەردىڭ قوعامداعى ستاتۋسىن شەگەلەۋ شەشىمىن تابۋ كەرەك.
قۇزىرلى ورگاندارمەن جەدەل اقپارات الماسۋ جۇمىسىندا دا ءبىرشاما كەدەرگىلەر بارى جاسىرىن ەمەس. جينالعان جۋرناليستەر بۇل ماسەلەنى دە ۇمىت قالدىرمادى.
«جۋرناليستەردىڭ كاسىبي قىزمەتىنىڭ قۇقىقتىق جانە ادەپتىلىك اسپەكتىلەرى» كۋرسىنىڭ ەكىنشى ءبولىمى «KazMediaNetwork» قوعامدىق بىرلەستىگىنىڭ اتقارۋشى ديرەكتورى باقتىگۇل بۋرباەۆانىڭ شەبەرلىك دارىسىنە ۇلاستى.
تاجىريبەلى جۋرناليست زاڭناماداعى وزگەرىستەر مەن مەديا الەمىندەگى ماڭىزدى مىندەتتەردى اڭگىمەلەسۋ, تانىمدىق اقپارات بەرۋ, ويىن ءادىسى ارقىلى ۇتىمدى جەتكىزە ءبىلدى. حالىقارالىق باق-تاعى قۇقىق بۇزۋشىلىق جاعدايلارىنىڭ ناتيجەسىن ءبولىسۋ ارقىلى اقپاراتتى ءاردايىم ىجداحاتتىلىقپەن تەكسەرۋگە, بەيتاراپ ۇستانىمدى ۇستىن ەتۋگە شاقىردى.
سونداي-اق باقتىگۇل بۋرباەۆا الەۋمەتتىك جەلىدەن الىنعان اقپاراتتان سوڭ الەك بولىپ قالماۋ ءۇشىن, وقيعانىڭ بايىبىنا بارۋ, استارىنا ءۇڭىلۋ, جازبا اۆتورىنان كەلىسىم الۋ – جۋرناليستيكالىق قىزمەتتىڭ نەگىزگى اسپەكتىسىنە اينالعانىن ايتتى.
بۇگىنگى باق-تىڭ ەلەي بەرمەيتىن كەلەسى ءتۇيىنى – اۆتورلىق قۇقىق. كەز كەلگەن اقپاراتتىڭ الىنعان توركىنىن كورسەتۋ, بىرىنشىدەن, وقىرمانعا قۇرمەت, سەنىمدى دەرەككوز ۇسىنۋ بولسا, ەكىنشى رەتتە جۋرناليستەردىڭ كەلەڭسىزدىككە تاپ بولماۋىنىڭ كەپىلى. سوندىقتان دەرەككوزدى اكتيۆ سىلتەمەمەن ايشىقتاۋ – قاجەت قادام.
جۋرناليستەر كاسىبي قۇزىرەتى مەن قۇقىعى تۋرالى جەكەلەگەن ۇسىنىستارىن «ماسس-مەديا تۋرالى» زاڭ قابىلدانعاننان كەيىن ەكى اي ىشىندە ايتا الادى.
