ورتالىقتا جەرگىلىكتى اۋىل شارۋاشىلىعى وندىرۋشىلەرىنە ساۋدا ورىندارى بەرىلمەك. بۇل ءوز كەزەگىندە ءونىمدى دەلدالسىز ساتۋعا مۇمكىندىك جاساپ, سول ارقىلى تۇتىنۋشىلار ءۇشىن باعانى تۇراقتاندىرۋعا وڭ اسەر ەتەدى. مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسىپ جاتقان جوبانىڭ باسەكەلەستىك ورتانى قالىپتاستىرۋعا جانە تاۋار باعاسىن تومەندەتۋگە مۇمكىندىگى بار.
«قازىر جۇمىستىڭ 90%-ى ورىندالدى. جوبانىڭ جالپى اۋدانى شامامەن 40 مىڭ شارشى مەتردى قۇرايدى. قۇرىلىستىڭ نەگىزگى كەزەڭدەرى اياقتالدى, سونىڭ ىشىندە عيماراتتىڭ قاباتتارى سالىنىپ, ينجەنەرلىك كوممۋنيكاتسيالار تارتىلدى. اباتتاندىرۋ جۇمىسى اياسىندا اسفالت توسەلىپ, نىساننىڭ اينالاسى كوگالداندىرىلادى. جوبا ەكى كەزەڭدە ىسكە اسىرىلادى: جاز باستالعاندا سۋىق كامەرالار مەن توڭازىتقىش قويماسى, سونداي-اق قۇرعاق ونىمدەر قويماسىن اشۋ جوسپارلانعان. ەكىنشى كەزەڭى قىركۇيەك ايىندا جۇزەگە اسادى, ياعني ازىق-ت ۇلىك تاۋارلارىن جەتكىزەتىن كوتەرمە-تاراتۋ ورتالىعى اشىلادى دەگەن جوسپار بار», دەدى كوتەرمە-تاراتۋ ورتالىعىنىڭ قۇرىلىسىمەن اينالىساتىن «اقتاۋ ورتس» جشس ديرەكتورى بەكزات جەتكىزگەنوۆ.
نىسان پايدالانۋعا بەرىلگەننەن كەيىن پاۆيلونداردا فەرمەرلەر ءوز ونىمدەرىن دەلدالسىز ساتا الادى. ولارعا كوكونىس پەن جەمىس-جيدەك ساقتايتىن قويمالار, سونداي-اق توڭازىتقىش پەن مۇزداتقىشى بار كامەرالار بەرىلەدى. اۋىل شارۋاشىلىعى ونىمدەرىن دەلدالسىز ساتۋ حالىققا ازىق-ت ۇلىك تاۋارلارىن بارىنشا ارزان باعادا ساتىپ الۋعا مۇمكىندىك بەرەدى. ورتالىقتىڭ ماقساتى دا وسى.
تولىقتاي ەڭسەرىلۋگە جاقىن تۇرعان جوبانىڭ تۇساۋى كەسىلىپ, پايدالانۋعا بەرىلەتىن ۋاقىتى الىس ەمەس. دەمەك اتشاپتىرىم اۋماققا ورنالاسىپ, الىپ جۇكتى ارقالاعان ورتالىقتىڭ بۇل ماقساتتى قانشالىقتى ورىنداعانىنا كوز جەتكىزەتىن كۇن دە الىس ەمەس.
ماڭعىستاۋ وبلىسى
