فوتو: ernur.kz
وبلىستىق پوليتسيا باسقارماسى وقيعا 12 مامىرعا قاراعان ءتۇنى بولعانىن مالىمدەدى.
«بۇركىت-35» بريگاداسىنىڭ پوليتسەيلەرى جولداعى «زيل-131» اۆتوكولىگىنەن كۇدىكتەنىپ, توقتاۋدى بۇيىرعان. الايدا جۇرگىزۋشى پاترۋلدىك توقتاتۋ پارمەنىن ەلەمەي, ءىزىن سۋىتقان.
«جۇك كولىگىن باسقارعان 49 جاستاعى ەر ادام الماتى-جەتىگەن تاس جولىنىڭ 32-ءشى شاقىرىمىنداعى ايالداماعا ۇلكەن جىلدامدىقپەن سوعىلعان. اپات سالدارىنان ەكى ادام كوز جۇمىپ, ۇشەۋى ءتۇرلى جاراقاتتارمەن وبلىستىق اۋرۋحاناعا جاتقىزىلدى», دەدى وبلىستىق جول پوليتسياسى باسقارماسىنىڭ باستىعى باۋىرجان الەنوۆ.
مەديتسينالىق ساراپتاما ناتيجەسىندە جۇك كولىگىنىڭ جۇرگىزۋشىسى ورتاشا ماس كۇيىندە بولعانى انىقتالدى.
«ەر ادام ۋاقىتشا ۇستاۋ يزولياتورىنا قامالدى, كولىك ارنايى تۇراققا ورنالاستىرىلدى, ەكى ادامنىڭ ولىمىنە اكەپ سوقتىرعان جول-كولىك وقيعاسى بويىنشا قىلمىستىق ءىس قوزعالدى», دەدى باۋىرجان الەنوۆ.
