فوتو: ر. ءجۇرسىنوۆ.
ساراپشىنىڭ ايتۋىنشا, جارلىق كاسىپكەرلىك باعىتتا ەركىندىك بەرەدى. سونداي-اق الداعى ۋاقىتتاعى قۇقىقتىق, ەكونوميكالىق جانە الەۋمەتتىك جاعدايلار مەن كەپىلدىكتەردى ايقىندايدى.
«ەل پرەزيدەنتىنىڭ جارلىعى – مەملەكەتتىڭ ەكونوميكاعا ارالاسۋىن ازايتۋ جانە باسەكەلەستىكتى ىنتالاندىرۋ جولىنداعى ماڭىزدى قادام. سونىمەن قاتار جارلىق ۇلتتىق ستاندارتتار بويىنشا جوبالىق قۇجاتتامانى مىندەتتى تۇردە ازىرلەمەي-اق, قۇرىلىس ءۇشىن حالىقارالىق ستاندارتتاردى پايدالانۋ مۇمكىندىگىن بەرەدى, سونداي-اق بيزنەس قۇقىقتارىن قورعاۋدى كۇشەيتەدى. بۇل دەگەنىمىز – ەلدەگى جەكە كاسىپكەرلىكتى دامىتۋعا قوسىمشا سەرپىن بەرەتىنى انىق», دەيدى رۋستام ءجۇرسىنوۆ.
تاۋەلسىز ساراپشى سوڭعى ەكى جىل ىشىندە بيزنەس-ومبۋدسمەن كەڭسەسى ۇكىمەتپەن بىرلەسىپ «تازا پاراقتان» رەتتەۋدى ەنگىزۋ بويىنشا جۇمىس جۇرگىزگەنىن, 10 مىڭنان استام ەسكىرگەن جانە ارتىق تالاپتار جويىلعانىن اتاپ ءوتتى.
«بۇل رەتتە جارلىقتا بيزنەستىڭ قۇقىقتارى مەن زاڭدى مۇددەلەرىن قورعاۋدى كۇشەيتۋگە, ونىڭ ىشىندە ەكونوميكالىق قىزمەت سالاسىنداعى قىلمىستىق قۇقىق بۇزۋشىلىقتاردى قىلمىسسىزداندىرۋعا, مەملەكەتتىك ورگاندار باستاماشىلىق ەتەتىن تىيىم سالۋ-شەكتەۋ شارالارىن پروكۋرورلارمەن كەلىسۋ جولىمەن باعىتتالعان ءىس-شارالار كەشەنى جەكە بلوك بولعانى قۋانتادى», دەيدى ر.ءجۇرسىنوۆ.
ساراپشى اتالعان جارلىقتى كاسىپكەرلەردىڭ قۇقىقتارىن قورعاۋعا جانە قولايلى كاسىپكەرلىك احۋال جاساۋعا باعىتتالعان ەلدىڭ ەكونوميكالىق ساياساتىنىڭ ماڭىزدى اسپەكتىسى دەپ باعالاپ وتىر.
