سۋرەتتى تۇسىرگەن – جانگەلدى ابدىعالىم
جوعارى دارەجەلى ماراپاتتى تابىستاعان ايماق باسشىسى ايباردىڭ ەرلىگىن ايتا ءوتىپ, قۇتتىقتاۋىن جەتكىزدى.
– ايبار قىراعىلىق تانىتتى. ول وسى شاحتادا بولۋى مۇمكىن قايعىلى وقيعانىڭ الدىن الدى. ەل پرەزيدەنتى ماراپاتتاۋ تۋرالى شەشىم قابىلدادى. شىن جۇرەكتەن قۇتتىقتايمىز! ەرەن ەڭبەگىڭىز ءۇشىن راحمەت, اتا-اناڭىزعا وسىنداي ەڭبەكقور ۇل تاربيەلەگەنى ءۇشىن العىس ايتامىز, – دەدى ە.قابدۋلا ۇلى.
«Qarmet» كومپانياسىنىڭ باسشىلىعى دا قىزمەتكەرلەرىن مەملەكەتتىك ناگرادامەن قۇتتىقتاپ, اقجارما العىسىن ءبىلدىردى.
ءوز كەزەگىندە مەملەكەتتىك ماراپات الىپ مەرەيى تاسىعان ايبار قوسانوۆ ەل پرەزيدەنتىنە ەلەنگەن ەڭبەگى ءۇشىن جانە جوعارى ماراپاتى ءۇشىن ءىلتيپات ءسوزىن جەتكىزدى.
– مەن ءۇشىن بۇل كۇتپەگەن توسىن ءارى قۋانىشتى جاعداي. بۇل ءبىزدىڭ بۇكىل ۇجىمنىڭ ورتاق سىيى دەپ بىلەمىن. سول كۇنى مەن ادەتتەگىدەي جۇمىسىمدى اتقارىپ جۇرگەن ەدىم. وقىستان تاراعان ءتۇتىن تۋرالى ەستىگەن بەتتە بىردەن 700 مەترگە تۇرا جۇگىردىم. قاۋلاعان قارا ءتۇتىندى كورگەندە ەكى ءورت سوندىرگىشتى الىپ, وشاققا قاراي ۇمتىلدىم. سول كەزدە ەشتەڭە ويلاپ تا ۇلگەرمەدىم. بار ويىم تەك ونداعى ادامداردى قۇتقارۋ ەدى, – دەيدى ماراپات يەسى.
ايبار قوسانوۆ – شەت اۋدانىنىڭ تۋماسى. 38 جاستا. كوستەنكو شاحتاسىنىڭ ەلەكتروسلەسارى بولىپ جۇمىس ىستەپ كەلە جاتقانىنا ءۇش جىل بولدى. وتباسىندا ەكى بالا تاربيەلەپ وتىر.
كوستەنكو اتىنداعى شاحتا ديرەكتورى دەنيس دىموۆتىڭ ايتۋىنشا, مۇنداي ارەكەتكە كەز كەلگەن ادام بارا بەرمەيدى. قاۋىپسىز جەردەن 750 مەترلىك تومەندىكتەگى وقيعا وشاعىنا دەيىن جانۇشىرىپ بارۋ – كوزسىز ەرلىك. ول شاپشاڭ ارەكەت ەتىپ, كونۆەيەر شترەگىندەگى ءتۇتىندى جالعىز ءوزى اۋىزدىقتاعان. بۇل, ءتىپتى, ونىڭ مىندەتىنە كىرمەيدى ەكەن.
ەستەرىڭىزگە سالا كەتەيىك, 2 مامىر كۇنى كەشكىلىك كوستەنكو اتىنداعى شاحتاداعى ك3 قاباتىنىڭ 4-كونۆەيەرلىك شترەگىنىڭ اينالاسىنان ءتۇتىن شىققان. جەدەل ارەكەت ناتيجەسىندە وقىس جاعداي تەز ارادا جويىلعان. بۇل رەتتە ەۆاكۋاتسيالاۋ جوسپارىن ەنگىزۋ ءارى كەنشىلەردى جەر بەتىنە شىعارۋ تۋرالى شۇعىل شەشىم قابىلداندى.
بۇل جاعدايدىڭ ورىن الۋ سەبەبى تومەنگى كەنەپتىڭ روليگىنە بوگدە زاتتىڭ ءتۇسۋى بولىپ شىقتى. روليكتىڭ جۇمىسى بۇعاتتالىپ, سالدارىنان كونۆەيەر تاسپاسىندا ءتۇتىن تاراعان.
قاراعاندى وبلىسى
