قورعانىس سالاسىنىڭ مايورى ەرمان يمانعاليەۆ اڭگىمەسىن وسىلاي باستادى. ول – بۇگىندە وڭىرلىك قورعانىس ىستەرى جونىندەگى دەپارتامەنتتىڭ جۇمىلدىرۋدى جوسپارلاۋ ءبولىمىنىڭ باسشىسى. ادەتتە, مۇنداي مامانداردىڭ قىزمەتى سىرت كوزگە بايقالا بەرمەيدى. شىنداپ كەلگەندە, مەملەكەت ىشىندەگى بەيبىتشىلىكتىڭ ساقتالۋىنا, اسكەري مىندەتتى ازاماتتارىمىزدىڭ كەز كەلگەن جاعدايدا ەل قورعاۋ ىسىنە ساقاداي ساي تۇرۋىنا بۇل قۇرىلىمنىڭ ءسىڭىرىپ وتىرعان قىزمەتى زور.
ء«بىزدىڭ ءبولىم وبلىستاعى اسكەري جۇمىلدىرۋ دايىندىعىن جوسپارلاۋ, ىقتيمال سوعىس جاعدايىندا قالاي ارەكەت ەتۋ كەرەكتىگىن, قارۋلى كۇشتەرىمىزدى ۇيلەستىرىپ, كەز كەلگەن اسكەري قيمىلدى الدىن الا ويلاستىرۋمەن شۇعىلدانادى. جۇرتتىڭ كوپشىلىگى قورعانىس دەپارتامەنتى ازاماتتاردى تەك اسكەرگە شاقىرۋمەن اينالىسادى دەپ ويلايدى. دەيتۇرعانمەن اسكەري قىزمەت, ونداعى قۇرىلىمدار بىرقاتار كۇردەلى ۇدەرىستەن قۇرالادى. پاۆلودار وبلىسىندا قورعانىس ىستەرى جونىندەگى جەرگىلىكتى 12 ءبولىم بار. بەيبىتشىلىگىمىزگە قاۋىپ توندىرەتىن قۇبىلىس تۋىنداي قالسا, ولاردا تىركەلىپ تۇرعان اسكەري مىندەتتى ازاماتتاردى حابارلاندىرىپ, جۇدىرىقتاي جۇمىلدىرۋ – نەگىزگى ماقساتىمىز. ماسەلەن, زاپاستاعى وفيتسەرلەر 60 جاسقا دەيىن, سەرجانتتار مەن قاتارداعى جاۋىنگەرلەر 50 جاسقا دەيىن اسكەري مىندەتتى بولىپ ەسەپتەلەدى», دەيدى ول.
ازاماتتىڭ بالالىق ارمانى مەكتەپ بىتىرگەن سوڭ بىردەن اسكەري ومىرگە جەتەلەدى. استاناداعى ىشكى ىستەر اسكەرىندە ازاماتتىق بورىشىن وتەگەن سوڭ اقسۋ قالاسىنداعى قورعانىس ىستەرى جونىندەگى بىرىككەن بولىمىنە جۇمىسقا تۇردى. كەيىن قىزمەت جولى ورلەپ, اقتوعاي اۋدانىنداعى جۇمىلدىرۋ دايىندىعى جانە اۋماقتىق قورعانىس ءبولىمىنىڭ باسشىسى, اۋداندىق قورعانىس ىستەرى جونىندەگى ءبولىم باسشىسىنىڭ ورىنباسارى مىندەتتەرىن اتقاردى. 2016 جىلدان وبلىستىق قورعانىس ىستەرى جونىندەگى باسقارمادا ابىرويلى ەڭبەك ەتىپ كەلەدى.
ەرمان راشيد ۇلىنىڭ سوزىنشە, بۇگىنگى جاستاردىڭ وتانسۇيگىشتىك سەزىمى جوعارى دەڭگەيدە. قازىرگى زامانعى بۋىن كوپ قۇندىلىقتى ماتەريالدىق قاجەتتىلىكپەن ولشەيتىنىن ەسكەرسەك, قورعانىس ىسىندە جاستاردى ىنتالاندىراتىن تەتىكتەر جەتەرلىك. ماسەلەن, اسكەرگە بارىپ, ءتارتىبىن جاقسى جاعىنان كورسەتە بىلسە, ۇيىنە ورالعاندا جوعارى وقۋ ورنىندا تەگىن وقۋ مۇمكىندىگى بەرىلەدى. موينىندا نەسيەسى بولسا, تولەۋ مەرزىمى ءبىر جىلعا شەگەرىلەدى. مۇنىڭ سىرتىندا باسپانا الۋعا, باسپانا جالداپ تۇرۋعا قانشاما جەڭىلدىك بار. وسىنىڭ بارلىعى اسكەرگە ءوز نيەتىمەن بارۋشىلار قاتارىن ارتتىرا ءتۇسىپ وتىر.
«وتانسۇيگىشتىك قاسيەت قانمەن كەلەدى. اتا-بابالارىمىزدىڭ ەرلىك ىستەرىنىڭ رۋحى ءبىزدى ءاردايىم جىگەرلەندىرەدى. جاسىرىپ كەرەگى نە, اسكەري قىزمەتتە كوپ جىل ەڭبەك اتقارعان كەيبىر ازاماتتار تەزىرەك زەينەتكە شىعىپ كەتسەم دەپ جۇرەدى. مەندە ونداي وي جوق. قۋاتىم قايتقانشا وسى سالادا ەڭبەكتەنىپ, وتان قورعاۋ ىسىندە تۋعان ەلىمە قىزمەت ەتسەم دەگەن ماقسات قانا بار. بۇل سالادا قانشاما مىقتى ماماندارمەن, اعا بۋىنمەن قىزمەتتەس بولىپ, ۇلگى-ونەگەلەرىن كوردىم. ولاردىڭ تاجىريبەلەرىن بويىما جيناپ, بۇگىندە كەز كەلگەن تىعىرىقتان جول تاۋىپ شىعاتىنداي دەڭگەيگە جەتتىم دەپ ەسەپتەيمىن. اسكەري ءومىر قانشا قاتال دەگەنمەن, اعالاردىڭ ىستىق ىقىلاسىن ءالى كۇنگە سەزەمىن. ۇلكەنگە ىزەت, كىشىگە قۇرمەت كورسەتۋ قاجەت. ەشقاشان اشۋعا بوي الدىرماي, قىزعانىش دەگەن جامان قاسيەتتەردى بويعا دارىتپاۋ كەرەك. ارتىمىزدان ەرگەن جاس بۋىن ءبىلىمىن شىڭداپ, ءوزى سۇيگەن ماماندىققا بەت بۇرىپ, قوعامعا دا, وزىنە دە پايداسى تيەر جاقسى مامان بولسا, ودان اسقان مۇرات جوق», دەيدى ەرمان.
ە.يمانعاليەۆ سالاداعى قاجىرلى ەڭبەگى ءۇشىن قورعانىس مينيسترلىگى تاراپىنان العىسحاتپەن ماراپاتتالعان. بۇگىندە جۇبايىمەن بىرگە وتباسىندا ءبىر ۇل, ءبىر قىز تاربيەلەپ وتىر. بوس ۋاقىتىندا دزيۋدو كۇرەسىمەن شۇعىلدانادى. «سپورت ءاردايىم سەرگەك ءجۇرۋىم ءۇشىن قاجەت» دەيدى ول.
پاۆلودار وبلىسى
