ءو.ياشۇكىرقىزىن كوزقاراقتى قاۋىم اقىن, جازۋشى, ساتيريك, جۋرناليست رەتىندە جاقسى بىلەدى. ءتورت جانردى ەركىن مەڭگەرگەن ونىڭ قاي شىعارماسى دا شىنايىلىعىمەن, تازالىعىمەن تارتىمدى. اسىرەسە قازاقى بوياۋعا تولى كەستەلى ءتىلى وقىرماندى جەتەلەپ اكەتەدى.
كەشتى اقىن, قازاقستان جازۋشىلار وداعى استانا قالالىق فيليالىنىڭ ديرەكتورى داۋلەتكەرەي كاپ ۇلى جۇرگىزدى. الدىمەن جيىن مودەراتورى كەش يەسىنە قازاقستان جازۋشىلار وداعىنىڭ باسقارما توراعاسى م.قۇلكەنوۆتىڭ قۇتتىقتاۋحاتىن وقىپ, قالامگەرگە «قازاقستاننىڭ قۇرمەتتى جازۋشىسى» توسبەلگىسىن تابىس ەتتى.
ودان كەيىن ءسوز العان جازۋشى, مەملەكەتتىك سىيلىقتىڭ لاۋرەاتى الىبەك اسقار بۇگىنگى قۋانىش يەسى ءو.ياشۇكىرقىزىمەن مەملەكەتتىك قىزمەتتە بىرگە ىستەگەن جىلدارىنان ەستەلىك ايتتى. «جازۋشىلىق پەن مەملەكەتتىك قىزمەتتىڭ اراسى ەكى بولەك. ەكى الەم دەسە بولادى. ءورىس ءبىزدىڭ دەپارتامەنتكە گازەتتەن كەلدى. ەركىن. جادىراپ كۇلەدى. ويىن جاسىرمايدى. ال مەملەكەتتىك قىزمەتتە جۇرگەندەردىڭ دەنى ونداي ەمەس. ەشقاشان پىكىرىن ايتپايدى. بۇگىپ جۇرەدى. ءبىر كۇنى ءورىستى شاقىرىپ الىپ, ويىڭىزدى اشىق ايتا بەرمەڭىز دەدىم. ونى بۇل كىسى ەلەگەن جوق. سول قالپىنان وزگەرمەدى. مەملەكەتتىك قىزمەتتىڭ ورتاسىنا كەيدە ەركىندىك تە كەرەك. مەن سونى ءورىستىڭ بويىنان كوردىم», دەدى ول. جازۋشى ءشاربانۋ بەيسەنوۆا ءو.ياشۇكىرقىزىمەن استاناعا كەلگەندە العاش تانىسقانىن ءسوز ەتتى.
«1998 جىلى ەلورداعا كوشىپ كەلگەندە, ءورىس «استانا اقشامى» گازەتىندە ىستەدى. العاشىندا وسىندا كىم بار ەكەن دەپ ويلادىم. سوندا العاش تانىسقانىم: ولكەتانۋشى كلارا امىرقىزى مەن ءورىس بولدى. ورەكەڭنىڭ گازەتتەن ءاربىر ماقالاسىن ءسۇيسىنىپ وقۋشى ەدىم. اسىرەسە «باعان باسىندا جانعان جىگىت» تۋرالى الەۋمەتتىك ماقالاسى وقىرمانداردى ءدۇر سىلكىندىرگەن ەدى. ونىڭ جازبالارىندا ادامگەرشىلىك, ادىلەتتىلىك جاعى باسىم بولاتىن», دەپ ىزگى لەبىزىن ءبىلدىردى.
ال قازاقستان جازۋشىلار وداعىنىڭ مۇشەسى, اقىن ەگەۋحان مۇقاماديقىزى قالامگەردىڭ ءتورت تومدىعىن تولىق وقىپ شىققانىن ايتىپ, اۆتوردىڭ كوركەم ءسوز ونەرىندەگى جانكەشتى ەڭبەگىن جوعارى باعالادى. جازۋشى, اۋدارماشى كامال الپەيىسوۆا ءو.ياشۇكىرقىزىنىڭ شىعارماشىلىعى تۋرالى ايتا كەلىپ: «مەن ەلدەن ەرتە الماتىعا كەتىپ, تۋعان جەرىمنەن الىستاپ قالدىم. سوندىقتان تۋعان ەلىمە قىزمەت ەتكەن ادامداردى جاقسى كورەمىن. ورەكەڭ مۇحيت اعا ەكەۋى بۇرىنعى تورعاي وبلىسىنا بارىپ ەڭبەك ەتتى. مۇحيت اعانىڭ باسقارۋىمەن تورعاي وڭىرىندەگى 31 اۋىلدا اۋەجاي اشىلدى. سودان مەن دە ەلىمە قىزمەت ەتكەن ادامداردى ايتىپ جۇرەيىن, جازىپ جۇرەيىن دەگەن ىشكى وي بولدى. وعان «قازاق ادەبيەتى» گازەتىندە جارىق كورگەن ءو.ياشۇكىرقىزى تۋرالى ماقالامدا كەڭىرەك توقتالدىم», دەدى ك. ابىلقاسىمقىزى.
سونداي-اق كەش بارىسىندا قالامگەردىڭ شىعارماشىلىعى مەن ادامي كەلبەتى جايىندا جولتاي ءالماش ۇلى, وڭداسىن ەلۋباي, كامال ءابدىراحمان, تولىمبەك ءابدىرايىم, ايگۇل كەمەلباەۆا سەكىلدى جازۋشىلار پاراساتتى وي ساباقتادى. اۆتوردىڭ ءتورت تومدىق جيناعىنىڭ لەنتاسى قيىلدى. كەش سوڭىندا ءو.ياشۇكىرقىزى جينالعان قاۋىمعا ريزاشىلىعىن ءبىلدىردى.
