فوتو: sputnik.kz
1991 جىلى 25 قازاندا قازاقستان پرەزيدەنتىنىڭ جارلىعىمەن قازاق سسر مەملەكەتتىك قورعانىس كوميتەتى جاساقتالدى. كەيىن ول قازاقستان رەسپۋبليكاسىنىڭ قورعانىس مينيسترلىگى بولىپ قايتا قۇرىلدى.
1992 جىلدىڭ 7 مامىرىندا قر تۇڭعىش پرەزيدەنتىنىڭ ارنايى جارلىعى شىققان ەدى. بۇل جارلىق بويىنشا, رەسپۋبليكا اۋماعىنداعى كسرو قارۋلى كۇشتەرىنىڭ قۇرامىنداعى مەكەمەلەر, بولىمدەر, قۇرامالار قازاقستان رەسپۋبليكاسىنىڭ قۇزىرەتىنە بەرىلدى. جوعارعى باس قولباسشى رەتىندە قارۋلى كۇشتەردى باسقارۋدى پرەزيدەنت ءوز موينىنا الدى. پرەزيدەنتتەن باسقا قورعانىس ىسىمەن تىكەلەي شۇعىلداناتىن العاشقى قورعانىس ءمينيسترى قىزمەتىنە گەنەرال-پولكوۆنيك ساعادات نۇرماعامبەتوۆ تاعايىندالدى.
7 مامىر قازاقستاندا مەرەكەلىك دەمالىس كۇنى بولىپ سانالادى. مەرەكە قارساڭىندا جوعارعى باس قولباسشى قاسىم-جومارت توقاەۆ كەزەكتى اسكەري شەندەر بەرۋ تۋرالى جارلىققا قول قويىپ, ەرەكشە كوزگە تۇسكەن اسكەري قىزمەتكەرلەردى ماراپاتتايدى.
بيىل دا مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ جوعارى اسكەري ارناۋلى اتاقتار مەن سىنىپتىق شەندەر بەرۋ تۋرالى جارلىققا قول قويعانى تۋرالى حابارلاعان ەدىك.
