فوتو: قورعانىس مينيسترلىگى
ۆەدومستۆو باسشىسى قارۋلى كۇشتەردىڭ ەلدىڭ تاۋەلسىزدىگى مەن اۋماقتىق تۇتاستىعىن قورعاۋداعى ماڭىزدىلىعىن اتاپ ءوتتى.
«بۇل تاپسىرمالاردىڭ ءساتتى ورىندالۋى بارلىق بولىمشەلەردىڭ كاسىبي دايىندىعىنا, ۇيلەسىمدىلىگى مەن جاۋىنگەرلىك رۋحىنا بايلانىستى. كەشەگى تابيعي اپاتقا قارسى كۇرەستە اسكەري قىزمەتشىلەر الدىڭعى قاتاردا ءجۇرىپ, اتسالىستى. ءبىز ارميا ەلىمىزدىڭ سەنىمدى تىرەگى ەكەنىن تاعى دا ءبىر دالەلدەي الدىق», دەدى گەنەرال-پولكوۆنيك رۋسلان جاقسىلىقوۆ.
جالپى, ارميانىڭ جاۋىنگەرلىك دايىندىعىن ارتتىرۋعا جانە ەلدىڭ قورعانىس قابىلەتىن قامتاماسىز ەتۋگە قوسقان ەلەۋلى ۇلەسى ءۇشىن پرەزيدەنت جارلىعىمەن 29 ادام ماراپاتتالدى. ونىڭ ىشىندە 10 ادامعا وردەن, 17 ادامعا «جاۋىنگەرلىك ەرلىگى ءۇشىن», 2 ادامعا «ەرەن ەڭبەگى ءۇشىن» مەدالدەرى بەرىلدى.
قورعانىس ءمينيسترىنىڭ ءبىرىنشى ورىنباسارى – قر قارۋلى كۇشتەرى باس شتابىنىڭ باستىعى گەنەرال-لەيتەنانت سۇلتان قامالەتدينوۆ ءى دارەجەلى «داڭق» وردەنىنە, اسكەري ءبولىم كومانديرى گەنەرال-مايور قاناتاي دالماتوۆ ءىى دارەجەلى «داڭق» وردەنىنە يە بولدى.
30212 اسكەري ءبولىمىنىڭ كومانديرى پولكوۆنيك ءسابيت ۇركىنباەۆقا, دەسانتتىق-شابۋىلداۋ اسكەرلەرى قولباسشىسىنىڭ ورىنباسارى پولكوۆنيك نۇرماحان قۇدايبەرگەنوۆكە, 32039 اسكەري ءبولىمى كومانديرىنىڭ ءبىرىنشى ورىنباسارى پولكوۆنيك ۇلىقبەك ساققا, بىتىمگەرلىك وپەراتسيالار ورتالىعىنىڭ باستىعى پولكوۆنيك باۋىرجان نىعمەتۋللينگە جانە 10228 اسكەري ءبولىمىنىڭ كومانديرى پودپولكوۆنيك عاني سەيدازىموۆقا ءىى دارەجەلى «ايبىن» وردەنى تابىستالدى.
قر قارۋلى كۇشتەرى باس شتابى سەرجانتتىق قۇراممەن جۇمىس جونىندەگى باسقارما باستىعىنىڭ ورىنباسارى شەبەر-سەرجانت بولات جايسانباەۆ جانە بىتىمگەرلىك وپەراتسيالار ورتالىعىنىڭ نۇسقاۋشى-سەرجانتى ءبىرىنشى دارەجەلى سەرجانت نۇرلان ءايتىموۆ ءىىى دارەجەلى «ايبىن» وردەنىنە يە بولدى.
«قر قورعانىس مينيسترلىگىنىڭ اسكەري-تەحنيكالىق مەكتەبى» رمقك باس ديرەكتورى وتستاۆكاداعى گەنەرال-مايور ادىلبەك الدابەرگەنوۆ «قۇرمەت» وردەنىمەن ماراپاتتالدى.
پرەزيدەنتتىڭ «جوعارى اسكەري جانە ارناۋلى اتاقتار, سىنىپتىق شەندەر بەرۋ تۋرالى» جارلىعىمەن قورعانىس ءمينيسترىنىڭ ورىنباسارى قانىش ابۋباكىروۆكە گەنەرال-لەيتەنانت», اۋە قورعانىسى كۇشتەرىنىڭ باس قولباسشىسى داۋرەن قوسانوۆقا «اۆياتسيا گەنەرال-لەيتەنانتى» اسكەري اتاعى بەرىلدى.
قۇرلىق اسكەرلەرى اسكەري ينستيتۋتىنىڭ باستىعى باۋىرجان يباتۋلين, راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ باستىعى قايرات داۋتوۆ جانە «استانا» وڭىرلىك قولباسشىلىعى اسكەرلەرىنىڭ قولباسشىسى ەرجان يبراەۆ «گەنەرال-مايور» اسكەري اتاعىنا يە بولدى. اۋە قورعانىسى كۇشتەرى باس قولباسشىسىنىڭ ورىنباسارى ەرجان نىلدىباەۆقا «اۆياتسيا گەنەرال-مايورى» اسكەري اتاعى بەرىلدى.
سونىمەن قاتار, قورعانىس ءمينيسترىنىڭ بۇيرىعىمەن 39 اسكەري قىزمەتشى ۆەدومستۆولىق «ەل قورعانى» مەدالىمەن ماراپاتتالدى. سۋ تاسقىنىنا قارسى ءىس-شارالار كەزەڭىندە ەرەكشەلەنگەن مەرزىمدى قىزمەتتىڭ 31ساربازى «قازاقستان رەسپۋبليكاسى قارۋلى كۇشتەرىنىڭ ۇزدىگى» توسبەلگىسىمەن ناگرادتالدى.
ۇلگىلى قىزمەتى جانە قىزمەتتىك مىندەتتەرىن ادال اتقارعانى ءۇشىن قورعانىس ۆەدومستۆوسى باسشىسىنىڭ بۇيرىعىمەن 60 وتان قورعاۋشىعا مەرزىمىنەن بۇرىن اسكەري اتاقتار بەرىلدى.
