“سالەم, پاپا” جوباسىنا قاتىسقان ونەر يەسى بالا كۇنىندە اكە-شەشەسىنىڭ كىم ەكەنىن بىلمەگەنىن دە جاسىرمادى.
- 1976 جىلى تۋعانمىن. بالالىق شاعىم جامبىل وبلىسىنىڭ تالاس اۋدانىندا ءوتتى. ول كەزدە زامان سونداي ما, اتا-اجەنىڭ بالاسى بولدىق. اكە-شەشەم ماعان اعا-اپكە سياقتى ەدى. ولار قالادا تۇردى. مەن اتا-اجەممەن اۋىلدا تۇردىم. اكە-شەشەمنىڭ سولار ەكەنىن ەستىگەندە قاتتى تاڭعالدىم. وعان دەيىن مەنى اجەم تۋعان دەپ ويلاپ ءجۇرىپپىن. مەكتەپكە باراتىن كەزدە اكەمنىڭ اتامنان جالىنىپ سۇراپ العانى ەسىمدە. “قالانىڭ ءومىرىن كورسىن, مەكتەپكە بارادى” دەگەسىن اتام رۇقساتىن بەردى. ەكى اكەنىڭ تاربيەسىن كوردىم دەپ ايتا الامىن. ونەردەگى اكەم – التىنبەك قورازباەۆ. ول كىسى دە اكەمدەي قامقورلىق جاسادى, – دەدى ءانشى.
سونداي-اق ونەر يەسى بالانىڭ ومىرىندە اكەنىڭ الاتىن ورنىن ايتىپ, بالا تاربيەسى تۋرالى دا ويىن ءبولىستى.
- اكەمنىڭ مىنەزى اقكوڭىل, ازىلگە جاقىن. ورتاسىن جادىراتىپ, كۇلدىرىپ وتىراتىن. شەشەم –سالماقتى, كوپ سويلەمەيتىن ادام. مەن ەكەۋىنىڭ دە قاسيەتىن تەڭدەي بويىما سىڭىرگەنمىن. سالماقتىلىعىم دا, ءازىل ايتىپ كۇلدىرىپ وتىراتىنىم دا بار. بالاعا اكەنىڭ وسيەتى مەن بەرگەن ءتالىمى وتە ماڭىزدى. قازاق اكەنى اسقار تاۋعا تەڭەيدى. بۇگىندە بالالارىما جاقسى اكە بولۋعا تىرىسامىن. مەن بالا كۇنىمدە “بوزتورعاي” دەگەن ءاندى ايتقانمىن. جەتىم بالانىڭ زارى مەن مۇڭىن سۋرەتتەيدى. سول كەزدە التىنبەك كوكەم جەتىمدەر ۇيىنە الىپ بارعان. ءاندى ءتۇسىنىپ ايتسىن دەگەن نيەتى بولۋى كەرەك. “مىنا بالالاردىڭ اكەسى دە, شەشەسى دە جوق” دەگەندە ومىردە اكە-شەشەسى جوق بالالار دا بولادى ەكەن عوي دەپ قاتتى تاڭعالعانىم بار, – دەپ جان سىرىن اقتاردى ەسترادا جۇلدىزى.
