بيىلعى بايقاۋ قازاقستان ۇلتتىق عىلىم اكادەمياسىنىڭ نەگىزىن قالاعان تاۋ تۇلعالى اكادەميك قانىش ساتباەۆتىڭ 125 جىلدىق مەرەيتويىنا ارنالدى.
حالىقارالىق بايقاۋدى وتكىزۋ يدەياسىنىڭ اۆتورى جانە جەتەكشىسى – بەلگىلى تەلەجۋرناليست ءارى عالىم, پروفەسسور ۇلبوسىن مەيىربەكقىزى ەسەنبەكوۆا.
بايقاۋ قازاق عىلىمىنا ولشەۋسىز ۇلەس قوسقان اكادەميك قانىش ساتباەۆتىڭ قايراتكەرلىگىن كورسەتۋ, عىلىمي ەڭبەكتەرىن ناسيحاتتاۋدى ماقسات ەتكەن ەدى.
بايقاۋدىڭ شارتى بويىنشا قاتىسۋشىلار الەمدىك ساياساتتاعى وزگەرىستەرگە, سونداي-اق قانىش يمانتاي ۇلى ساتباەۆتىڭ قازاق عىلىمىن دامىتۋعا قوسقان ۇلەسىنە قاتىستى اقپاراتتىق-تانىمدىق بەينە ماتەريالدار ۇسىندى.
قاتارىنان سەگىزىنشى رەت وتكىزىلىپ وتىرعان حالىقارالىق بايقاۋعا وتاندىق 8 ۋنيۆەرسيتەتىنەن جانە امەريكا قۇراما شتاتتارى, ۇلىبريتانيا, گەرمانيا مەن بىرىككەن اراب امىرلىگى سياقتى 11 ەلدىڭ ستۋدەنتتەرى مەن ماگيسترانتتارىنان, دوكتورانتتارىنان 100-گە جۋىق جۇمىستار كەلىپ تۇسكەن.
بايقاۋدى ۇيىمداستىرۋ كوميسسياسى گران-پري جۇلدەسىمەن ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى ءالي الىشەر ساۋلەت ۇلى ماراپاتتالدى. سونداي-اق Columbia University ستۋدەنتىنىڭ «Columbia. قازاق ءانى» دەپ اتالاتىن جۇمىسى بايقاۋدىڭ تاعى ءبىر ۇزدىگى دەپ تانىلدى.
جۇلدەلى ورىنداردان باسقا ۇزدىك يدەيا, ۇزدىك رەجيسسۋرا بويىنشا, كۇلتەگىن, اباي, ساعات اشىمباەۆ, شەرحزان مۇرتازا اتىنداعى نوميناتسيالار بويىنشا جەڭىمپازدار ارنايى ديپلومدار مەن باعالى سىيلىقتارمەن ماراپاتتالدى.
حالىقارالىق بايقاۋدىڭ جىلدان جىلعا مارتەبەسى مەن اۋقىمى ءوسىپ كەلە جاتقانىن ماراپاتتاۋ راسىمىندە ەۋرازيا ۇلتتىق ۋنيۆەرسيتەتىنىڭ باسشىلارى, جۋرناليستيكا جانە ساياساتتانۋ فاكۋلتەتىنىڭ دەكانى ساق قايرات ءومىرباي ۇلى تىلگە تيەك ەتتى.
بايقاۋ جەڭىمپازدارىن ماراپاتتاۋ ءراسىمى ونلاين جانە وففلاين فورماتتاردا ءوتتى. جەڭىمپازداردى ماراپاتتاۋ راسىمىنە مەملەكەت جانە قوعام قايراتكەرلەرى, وتاندىق عالىمدار, بەلگىلى تەلەجۋرناليستەر مەن مەديا مەنەدجەرلەر, تەلەۆيزيا سالاسىنىڭ ارداگەرلەرى قاتىستى.
