فوتو: realkz.com
اقىننىڭ جازۋىنشا, اقمولا وبلىسى, زەرەندى اۋداندىق سوتىنىڭ سۋدياسى ايدا كارىموۆا توراعالىق ەتكەن سوت پروتسەسى جابىرلەنۋشى تاراپتىڭ تالابىن وڭ ناتيجەگە شەشتى.
«ەلىكتى پاركتىڭ» يەسى سوتتالعان جوق. ونىڭ جيەنى سوتتالدى. سەبەبى, سول ۋاقىتتا ونىڭ بيزنەسى ۋاقىتشا سول جيەنىنىڭ اتىنا جازىلعان ەكەن. سوت ءاليحان سىرعاناعان كۇنى دە, ودان ءبىر اپتا كەيىن زارداپ شەككەن دينارا مۋكسۋلوۆا مەن ءبىرىمجانوۆالار سىرعاناعان ۋاقىتتا دا ەشقانداي قاۋىپسىزدىك ەرەجەلەرى ساقتالماعانىن دالەلدەپ, سوتتالۋشىعا قاۋىپسىزدىگى ەڭ تومەن كولونياعا ءتورت جىلعا باس بوستاندىعىنان ايىرۋعا ۇكىم شىعاردى», دەپ جازدى س.دۇيسەنعازى.
اقىننىڭ ايتۋىنشا, وقيعا بولعان كۇنى سوتتالۋشى تاراپ زارداپ شەككەن ۇلىن ۇيىمداسقان تۇردە ءبىر جارىم ساعات بويى تاۋدا تىعىپ ۇستاعان. بىراق جابىرلەنۋشى تاراپ بۇنى سوتتا دالەلدەي الماعان.
ء«بىز ولاردىڭ ۇيىمداسقان تۇردە بالامىزدى تاۋدا ءبىر جارىم ساعات تىعىپ تاستاعانىن دالەلدەي المادىق. سەبەبى, تاۋدا بالامنىڭ جاتقانىن كورگەن كۋاگەرلەردىڭ سوزدەرى ءارتۇرلى شىقتى. كوبى ءبىر-ءبىرىن تانيتىن ادامدار عوي. كامەرا بولماعان سوڭ دالەلدەۋ قيىن ەكەن. ونىڭ ۇستىنە سوتتالۋشى تاراپتىڭ جالداپ العان ەكى ادۆوكاتى دا اككى, زاڭ سالاسىنان بىلىمدەرى تەرەڭ جىگىتتەر ەكەن. ەش دالەلدەرى جوق بولسا دا ءار سوتتا «بۇيرەكتەن سيراق شىعارىپ-اق» باقتى. سوت مورالدىق شىعىنىمىزدى ءىشىنارا قاناعاتتاندىرعانىمەن, ماتەريالدىق شىعىنىمىزدى قاناعاتتاندىرمادى. ونىڭ بارلىعىنا چەك كەرەك ەكەن. ءوزىمىز ازان-قازان بولىپ جاتقاندا كىم چەك جيناپ جۇرەدى؟ ادام ءولىمىنىڭ ءوزى دالەل ەمەس پە؟ ءبىزدىڭ زاڭدارىمىزدىڭ دا قىزىق جەرى كوپ ەكەنىنە كوز جەتتى. ەندى ون بەس كۇننىڭ ىشىندە ەكى تاراپقا دا اپپەلياتسيالىق سوتقا بەرۋگە مۇمكىندىك بار», دەپ جازدى اقىن.
ايتىسكەردىڭ ايتۋىنشا, تالاي بالا وسى شاڭعى بازاسىندا قايتىس بولسا دا, ءىستى جىلى جاۋىپ قويا بەرگەن, تەك ۇلىنىڭ ءىسى عانا سوتقا جەتكەن.
ء«دال مەنىڭ ءاليحانىم سياقتى تالاي بالا وسىنداي شاڭعى بازالارىندا قايتىس بولعان. سوت بىتكەنشە بارلىعىنىڭ اماناتى موينىمدا جۇرگەندەي كۇي كەشتىم. سولاردىڭ اراسىندا ءاليحاننىڭ ءىسى عانا سوتقا دەيىن جەتتى. وعان ءبىزدى قولداعان قالىڭ قازاعىمنىڭ ۇلەسى بار دەپ ويلايمىن», دەدى ايتىسكەر.
ەسكە سالايىق, 2023 جىلدىڭ 2 قاڭتارىندا كوكشەتاۋ ماڭىنداعى «ەلىكتى پارك» تاۋ-شاڭعى بازاسىندا اقىن سەرىكزات دۇيسەنعازىنىڭ 16 جاستاعى ۇلى ءاليحان اعاشقا سوعىلىپ, كوز جۇمعان ەدى. اعاشتىڭ تۇبىندە جاتقان ءجاسوسپىرىمدى سىرعاناپ جۇرگەن دەمالۋشىلار بايقاپ, حابار جەتكىزگەن ەدى.
