فوتو: اتىراۋ وبلىسىنىڭ جەدەل شتابى
«قازگيدرومەت» رمك اتىراۋ وبلىستىق فيليلالىنىڭ گيدرولوگيالىق مونيتورينگ دەرەگىنە قاراعاندا, جايىق وزەنىندەگى سۋ دەڭگەيى كۇن سايىن كوتەرىلىپ جاتىر.
ماسەلەن, يندەر اۋدانىندا كەشە, 2 مامىردا تاڭەرتەڭگى ساعات 08:00-دە وزەن ارناسىنىڭ سۋى 750 سانتيمەترگە جەتكەن ەدى. ال بۇگىن, 3 مامىردا 788 سانتيمەترگە جەتتى. وسىلايشا, ءبىر تاۋلىكتە جايىق وزەنى +38 سانتيمەترگە كوتەرىلگەن.
ال ماحامبەت اۋدانىندا كەشە تاڭەرتەڭ جايىقتىڭ سۋى 795 سانتيمەتر دەڭگەيىندە بولاتىن. بىراق كەشە كەشكى 20:00-دە 8 مەتردەن اسىپ كەتتى. ءبىر تاۋلىكتىڭ ىشىندە بۇل اۋدانداعى سۋدىڭ كوتەرىلۋ كورسەتكىشى +17 سانتيمەتر قۇراعان. بۇگىن, 3 مامىردا سۋ دەڭگەيى 812 سانتيمەترگە جەتتى.
اتىراۋ قالاسىندا دا جايىق وزەنىنىڭ سۋى كوتەرىلىپ تۇر. كەشە تاڭەرتەڭنەن بەرى سۋ ايدىنى +12 سانتيمەترگە ۇلعايدى. قازىر مۇنايلى شاھارداعى وزەن ارناسىنىڭ دەڭگەيى 471 سانتيمەتردى قۇرادى.
