– قازاق تىلىنە قىزىعۋشىلىعىمدى قازاق ءتىلى پانىنەن ساباق بەرگەن گۇلميرا ابىلداقىزى وياتتى. اۋلادا قازاق بالالارمەن بىرگە ويناپ وسكەندىكتەن, ءتىلدى ونسىز دا بىلەتىنمىن. بىراق دۇرىستاپ دەن قويعانىم مۇعالىمىمنىڭ ارقاسى. ول كىسى مەنى اۋداندىق, وبلىستىق, رەسپۋبليكالىق ءتىل بايقاۋلارىنا قاتىستىراتىن. ءسويتىپ, قازاقشانى قازاقتان كەم بىلمەيتىن دارەجەگە جەتتىم, – دەگەن اركادي پوبەدينسكيدىڭ اڭگىمەسىن تىڭداۋدىڭ ءوزى جانىڭدى جادىراتادى.
وتان الدىنداعى اسكەري بورىشىن وتەپ كەلگەن ول 2022 جىلدان بەرى س.قوجامقۇلوۆ اتىنداعى جەزقازعان مۋزىكالىق-دراما تەاترىنىڭ قۋىرشاق ترۋپپاسىندا اككومپونياتور قىزمەتىندە. الايدا اركاديدىڭ اكە-شەشەسى قويعان نىسپىسى قازىر ۇمىتىلا باستاعان. ويتكەنى...
قازاقستاننىڭ ەڭبەك سىڭىرگەن ءارتىسى, ءانشى عالىم مۇحامەدين بىردە تەاترعا كەلگەندە قازاقشانى سۋداي ساپىرىپ وتىرعان سارىدومالاقتى كورىپ, اۋەلىدە «ورىسپىن» دەگەنىنە نانباپتى. كەيىننەن ونىڭ قازاقشاسىنا سۇيسىنگەنى سونشالىق, «سەن بۇدان بىلاي مەن ءۇشىن اركادي ەمەس, ارداقسىڭ», دەپتى. عالىم اعانىڭ قويعان ەسىمى ارىپتەستەرىنە دە ۇناپ, قازىر ونى بارشا جۇرت «ارداق» دەيتىن كورىنەدى.
ول الەم ەرتەگىلەرىن قۋىرشاق تىلىمەن قازاقشا سويلەتەدى. جۇرگەن ورتاسىنا سىيلى, كورەرمەنى – بالالارعا سۇيكىمدى. جاقىن بىلەتىندەر اركاديدىڭ ىزدەنىمپازدىعىنا ءتانتى. ول جەزقازعان مۋزىكالىق كوللەدجىنە وقۋعا تۇسۋگە كەلگەندە بار بولعانى كوركەمسوز وقيتىن. مۋزىكالىق اسپاپتاردا ويناي المايتىن. قازىر دومبىرانىڭ قۇلاعىندا وينايدى. قازاقتىڭ باسقا دا بىرقاتار ۇلتتىق اسپابىن دا مەڭگەرىپ العان. مۇنىڭ ءبارى – ىزدەنىستىڭ جەمىسى.
اركادي وسى جىلدى ەڭ بەرەكەلى جىلعا بالايدى. ويتكەنى جۋىردا عانا «شاپاعات» مەدالىمەن ماراپاتتالدى.
– مەدالدى اقوردانىڭ تورىندە پرەزيدەنت قاسىم-جومارت توقاەۆتىڭ قولىنان العانىمدى ەرەكشە ماقتانىشپەن ايتا الامىن. مەن ماراپات العان وسى ءساتتى عۇمىر بويى اسا زور ماقتانىشپەن ايتامىن, – دەيدى اركادي. ءبىز كەيىپكەرىمىزدى قۇجاتى بويىنشا جازىپ وتىرمىز. ايتپەسە, بۇل ازاماتقا «ارداق» دەگەن ەسىم ابدەن جاراسىمدى سەكىلدى.
جەزقازعان قالاسى
