تابيعاتتى ايالاۋدى دارىپتەگەن اكتسياعا ەكولوگيا جانە تابيعي رەسۋرستار ءمينيسترى ەرلان نىسانباەۆ, استانا قالاسى اكىمىنىڭ ورىنباسارى ەرسىن وتەباەۆ, سونداي-اق اوسشك-گە مۇشە مەملەكەتتەردىڭ ەلشىلەرى مەن ديپلوماتيالىق كورپۋستىڭ وزگە دە وكىلدەرى قاتىستى.
اللەيا 2021 جىلدىڭ 1 ماۋسىمىندا اوسشك-ءنىڭ 30 جىلدىعى قارساڭىندا اشىلعان. مۇنداي باستاما ۇيىمنىڭ قورشاعان ورتانى قورعاۋ جونىندەگى زەرتتەۋلەرىنە نەگىزدەلگەن باستى باعىتتارىن ىسكە اسىرىپ, تۇراقتى دامۋ ماقساتتارىنا قول جەتكىزۋ جولىنداعى جۇمىستارىنا ۇجىم بولىپ اتسالىسۋدى كوزدەپ وتىر.
بيىل اكتسيا قاتىسۋشىلارى 100 ءتۇپ ساكۋرا اعاشى, سيۆەرس الماسى مەن قىزىل شەتەن اعاشتارىنان بولەك 35 ءتۇپ مايدا جاپىراقتى قاراعاش كوشەتتەرىن وتىرعىزدى.
– قولعا الىنىپ جاتقان بۇل باستامالار ەلىمىزدىڭ تابيعي رەسۋرستارىن ساقتاۋعا عانا ەمەس, سونىمەن قاتار جەرگىلىكتى حالىقتىڭ ءومىر ءسۇرۋ ساپاسىن جاقسارتۋعا جانە بولاشاق ۇرپاق ءۇشىن قولايلى جاعداي جاساۋعا سەپتىگىن تيگىزەدى, – دەيدى مينيستر ە.نىسانباەۆ.
استانا قالاسى اكىمىنىڭ ورىنباسارى ە.وتەباەۆ, ءوز سوزىندە قالا ومىرىندە ەكولوگيالىق تۇراقتىلىققا دەگەن تالپىنىستىڭ بارىن اتاپ ءوتتى. ول سونداي-اق اوسشك اللەياسىن جاڭا كوشەتتەرمەن تولىقتىرىپ, جەتىلدىرۋ سەكىلدى يگى باستامالار ارقىلى مەملەكەتتەر اراسىندا قورشاعان ورتانى قورعاۋ سالاسىنداعى ىنتىماقتاستىقتى دامىتۋدىڭ ماڭىزى زور ەكەنىن اتاپ ءوتتى.
ال ازياداعى ءوزارا ءىس-قيمىل جانە سەنىم شارالارى كەڭەسىنىڭ باس حاتشىسى قايرات سارىباي قورشاعان ورتانى قورعاۋ جولىنداعى اكتسياعا اتسالىسىپ, يگى باستاماعا ۇلەس قوسقان ازاماتتارعا العىسىن جاۋدىرىپ, ولاردىڭ وسىنداي ءىس-شارالار ارقىلى ۇيىمعا قولداۋ بىلدىرگەن ىقىلاستارىنا ريزاشىلىعىن ءبىلدىردى.
ول سونداي-اق اوسشك-ءنىڭ ەكولوگيالىق زەرتتەۋلەر اياسىنداعى ىنتىماقتاستىعىنىڭ ارتىپ كەلە جاتقانىنا توقتالىپ, ونىڭ جارقىن مىسالى رەتىندە پرەزيدەنت قاسىم-جومارت توقاەۆتىڭ قورشاعان ورتانى قورعاۋ ماسەلەلەرى بويىنشا اوسشك-ءنىڭ مينيسترلىك كونفەرەنتسياسىن شاقىرۋ جونىندەگى باستاماسىن اتاپ ءوتتى.
سونداي-اق قايرات سارىباي ازەربايجاننىڭ توراعالىعىمەن وتەتىن اوسشك مينيسترلەر كەڭەسىنىڭ وتىرىسى بيىل قاراشا ايىندا باكۋدە بۇۇ-نىڭ كليماتتىڭ وزگەرۋى جونىندەگى كونفەرەنتسياسىنىڭ (COP-29) باستالۋىمەن تۇسپا-تۇس كەلەتىنىن, بۇل ەكولوگيالىق پروبلەمالاردى شەشۋ جولىنداعى بىرلەسكەن جۇمىستىڭ وزەكتىلىگى مەن دەر كەزىندە كوتەرىلگەن ماسەلە ەكەنىن كەزەكتى مارتە كورسەتىپ وتىرعانىن اتاپ ءوتتى.
