ەكونوميكالىق تەرگەۋ دەپارتامەنتى وتكەن جىلدان بەرى ءتورت ويىن زالى مەن ءبىر بۋكمەكەرلىك كەڭسەنىڭ, سونداي-اق بەس بىردەي جاسىرىن كازينونىڭ جۇمىسىن توقتاتقان. ناتيجەسىندە, 111 مونيتور, 102 پروتسەسسور, 1 ويىن تەرمينالى, 6 ۆيدەو رەسيۆەر, 1 500 تەرمينال زاڭسىز اينالىمنان جويىلعان. الدىن الۋ شارالارى اياسىندا «كيبەرنادزور» اج ارقىلى ونلاين-كازينو بەلگىلەرى بار كۇدىكتى سايتتارداعى 986 سىلتەمە بۇعاتتالىپتى.
«ويىن بيزنەسى قوعامعا ۇلكەن زيان كەلتىرەدى. قۇمار ويىندارعا تاۋەلدىلىك اۋىر پاتولوگيا رەتىندە تىركەلگەن. بۇل كەسەل ازاماتتاردىڭ ءومىر سالتىنا ۇستەمدىك ەتىپ, الەۋمەتتىك, كاسىبي جانە ماتەريالدىق قۇندىلىقتار مەن مىندەتتەمەلەرىنەن اجىراتىپ, ولاردى ءوزىن-ءوزى جوعالتۋعا دەيىن اپارادى. «جەڭىل» اقشانى بىردەن ۇتىپ الامىن دەگەن ۇمىتپەن ادامدار كوبىنە كازينو مەن ويىن اۆتوماتتارىنا جالاقىسى مەن قولىندا بارىنىڭ ءبارىن قالدىرادى. جەدەل-تەرگەۋ تاجىريبەسى كورسەتىپ وتىرعانداي, انىقتالعان جەراستى كازينولارى مەن ويىن مەكەمەلەرىنە نەگىزگى كەلۋشىلەر جاستار بولىپ وتىر. حالىقتىڭ قۇمار ويىنداردان باس تارتۋى قاسكۇنەمدەردى زاڭسىز تابىستارىنان ايىرادى. بۇگىنگى تاڭدا كازينولار مەن ويىن اۆتوماتتارى زالدارى تەك قاپشاعاي سۋ قويماسىنىڭ جاعالاۋىندا جانە اقمولا وبلىسىنىڭ بۋراباي اۋدانىندا ورنالاستىرىلۋعا ءتيىس. اتالعان اۋماقتاردان تىس جۇمىس ىستەيتىن بارلىق ويىن مەكەمەسى ءوز قىزمەتىن زاڭسىز جۇزەگە اسىرىپ وتىر», دەيدى دەپارتامەنت باسشىسىنىڭ ورىنباسارى سابىرعالي بالعاليەۆ.
مامان تىلگە تيەك ەتكەندەي, قۇمار ويىننىڭ سالدارى تالاي وتباسىن قۇردىمعا كەتىرگەن. جاستار اراسىنداعى اجىراسۋ فاكتىلەرىنە دە بىردەن-ءبىر سەبەپ – لۋدومانيا. قالا جاستارى اراسىندا لۋدومانيانىڭ الدىن الۋ ءۇشىن دەپارتامەنت جاستار ساياساتى باسقارماسىمەن بىرلەسىپ بىرنەشە جوبانى قولعا العان. ءبىر جىل كولەمىندە جۇزەگە اسىپ كەلە جاتقان «قۇمار ويىنسىز قالا» جانە «ستوپ ويىن» جەدەل-پروفيلاكتيكالىق ءىس-شارالارى وڭتايلى ناتيجە كورسەتكەن.
جەدەل-تەرگەۋ ءىس-شارالارى بارىسىندا «تikتok» جەلىسىندە زاڭسىز ويىن بيزنەسىن ۇيىمداستىرۋ, ءباس قابىلداۋ, بانكتىك اۋدارىمدار ارقىلى ۇتىستاردى ەسەپتەۋ جانە بەرۋ فۋنكتسيالارىن قولدايتىن ونلاين قۇمار ويىنداردىڭ بىرقاتار فاكتىسى انىقتالعان. تەكسەرۋ بارىسىندا قوس الماتىلىق الەۋمەتتىك جەلىلەردە 12,9 ملن تەڭگەدەن استام سوماعا ءىرى مولشەردە كىرىس الا وتىرىپ, ءتورت اي بويى زاڭسىز ويىن بيزنەسىن ۇيىمداستىرعانى دالەلدەنگەن. وسىلايشا, زاڭعا قايشى جۇمىس ىستەگەندەر تەمىر تورعا قامالعان.
جوعارىدا اتاپ وتكەنىمىزدەي, الماتىدا جاستار اراسىندا ويىنعا تاۋەلدىلىكتىڭ الدىن الۋعا باعىتتالعان كەشەندى جوسپار قۇرىلدى. جاستار ساياساتى باسقارماسىنىڭ باستاماسىمەن قولعا الىنعان شارا بىرنەشە باعىتتان تۇرادى. الەۋمەتتىك مەملەكەتتىك تاپسىرىس اياسىندا ىسكە اسقان باعدارلامانىڭ ءبىرى – «جاستار اراسىندا ينتەرنەتكە تاۋەلدىلىك پەن قۇمار ويىنداردىڭ الدىن الۋ» جوباسى. بيىل جوباعا بولىنگەن سوما 30 ملن تەڭگەنى قۇراپ وتىر.
بۇل باعىتتا NEET ساناتىنا كىرەتىن جاستارعا ەرەكشە نازار اۋدارىلعان. ۇزاقمەرزىمدى مونيتورينگ ارقىلى جاستار اراسىنداعى جۇمىسسىزدىق دەڭگەيىن تومەندەتۋ, كاسىپكە باۋلۋ, الەۋمەتتەنۋگە جانە ءوزىن-ءوزى جۇزەگە اسىرۋعا مۇمكىندىك تۋعىزۋعا نەگىزدەلگەن باعدارلامالار از ەمەس. بۇل رەتتە جەكە جانە توپتىق كونسۋلتاتسيالار اياسىندا كەڭەس بەرەتىن پسيحولوگتەردىڭ, جاتتىقتىرۋشىلاردىڭ كومەگى وڭ ناتيجە كورسەتكەن. ايتالىق, جىل باسىنان بەرى الماتى قالاسىنىڭ بىرقاتار جوعارى وقۋ ورنىندا ستۋدەنتتەر اراسىندا «قۇمار ويىندار – قوعام دەرتى», «ينتەرنەتكە تاۋەلدىلىك: پايداسى مەن زيانى» تاقىرىبىندا وتكەن سەمينار-ترەنينگتەرگە 500-گە جۋىق ستۋدەنت قاتىسىپتى.
«ماقساتىمىز – قالا جاستارى ءۇشىن قاۋىپسىز جانە سالاماتتى بولاشاقتى قامتاماسىز ەتۋ. تەك بىرىگۋ ارقىلى عانا ءبىز قاۋىپسىز بولاشاققا قادام جاساي الامىز», دەگەن جاستار ساياساتى باسقارماسى باسشىسىنىڭ ورىنباسارى ءا.قاجدەنبەك قالا تۇرعىندارىن تالاي وتباسىن تىعىرىققا تىرەگەن كەلەڭسىزدىكپەن بىرلەسە كۇرەسۋگە شاقىردى.
كاسىپكەرلەر, قوعامدىق جانە جاستار ۇيىمدارىنىڭ وكىلدەرى, بلوگەرلەر مەن باق قىزمەتكەرلەرى زاڭسىز ويىن بيزنەسىمەن كۇرەستە بەلسەندىلىك تانىتسا يگى. بۇل ىسكە تەك جاۋاپتى ماماندار ەمەس, كەز كەلگەن قالا تۇرعىنى ءۇن قوسا الادى. زاڭسىز ويىن بيزنەسىنە قاتىستى قانداي دا ءبىر ارەكەتتەن حابارى بار ازاماتتار 1458 ءنومىرى بويىنشا بايلانىس ورتالىقتارىنا حابارلاسۋىنا بولادى.
الماتى
