تاعلىمى مول رۋحاني ءىس-شارادا وقىرمان قولىنا ەندى تيگەن تۋىندىنىڭ بىرەۋى اقىن قوسجان مۇسىرەپوۆ تۋرالى بولسا, قالعانى بالالارعا ارنالعان. 30-عا جۋىق كىتابى جارىق كورگەن جازۋشىنىڭ «قوشاقاندار» ولەڭى 1974 جىلى جاريالانىپتى. سول جىلداردان باستاپ ول «جۇرەكتەگى جازۋلارىن» جالعاستىرىپ كەلەدى.
– ادامدا جۇرەك بولسا عانا ءبىر-ءبىرىن ىزدەيدى, ساعىنىش بولادى. كەزدەسكەندە جاتتاندى ءسوز ەمەس, جۇرەك ءۇنىن ايتادى. مەن ءۇشىن بۇل كەش سونداي بولدى. اتام جارىقتىقتىڭ قايتىس بولعاندا كابينەتىندەگى ۇستەلىنەن ەكى قالىڭ داپتەرى تابىلدى. وسىدان ەلۋ جىل بۇرىن جازىلعان: «ەشقاشاندا جاقسىلىقتان ءۇمىت ۇزبەڭدەر. جاماندىق ىزدەمە. ادال ادامدار ىزدەڭدەر, ولار ءومىردىڭ ءمانى مەن ماعىناسىن ۇعىندىرادى», دەگەن وسيەت سوزدەر ەشقاشان جادىمنان شىققان ەمەس. شىنىندا مەن ءومىر باقي ادام ىزدەپ ءجۇرمىن. كىتابىمنىڭ اتى دا «ادام ىزدەپ ءجۇرمىن», – دەدى جازۋشى اكىم ىسقاق.
قالامگەردىڭ «ەرتە ەسەيگەن قىز», «تەمىر تابىت», «اسقاروۆتىڭ كادرى», «كوڭىل قىمبات», «التىنىم» تۋىندىلارى وقىرماننىڭ ءالى جادىندا. ادەبي-سازدى كەشتە ونەر يەسىنىڭ اندەرى شىرقالىپ, كوپشىلىك قاۋىم كوركەمسوز شەبەرىنىڭ جىرلارىمەن سۋسىندادى. شىعارماشىلىق جيىندا سەنات دەپۋتاتى ءالي بەكتاەۆ سەنات توراعاسى ماۋلەن اشىمباەۆتىڭ قۇتتىقتاۋ حاتىن تاپسىردى. سونداي-اق مادەنيەت جانە اقپارات, وقۋ-اعارتۋ ءمينيسترىنىڭ دە قۇتتىقتاۋلارى وقىلدى.
اكىم ىسقاق – تۇڭعىش قازاق تىلىندە جازىلعان «حالىقتىڭ كوشى-قونى تۋرالى» زاڭنىڭ اۆتورى. دەپۋتات بولعان تۇستا اۋعانستان مەن پاكستاننان 700 قازاقتىڭ قازاقستانعا كەلۋىنە جاردەمدەسكەن. بۇل تۋرالى مەملەكەت جانە قوعام قايراتكەرى مۇحامبەت كوپەەۆ ء«بىر جىلدىڭ كولەمىندە اكىم وسى زاڭدى الىپ شىقتى. قانشاما قانداسىمىز ەلىمىزگە ورالدى. بۇل زاڭ ومىرشەڭ زاڭ بولدى», دەپ پىكىر ءبىلدىردى.
رۋحاني كەشكە سەنات, ءماجىلىس دەپۋتاتتارى, مەملەكەت قايراتكەرلەرى, تاعى باسقا بەلگىلى تۇلعالار قاتىستى.
– اكىم ىسقاقتىڭ شىعارمالارى ادامداردى جاقسىلىققا, ادامگەرشىلىككە, ۇستامدىلىققا, شىدامدىلىققا, سابىرعا شاقىرادى. قاراسوزدەرى, «التىنىم» دەپ باستالاتىن سوزدەرىنىڭ استارىندا ۇلكەن ءمان-ماعىنا بار. سوندىقتان كەيىنگى جاستارعا بەرەتىن ءتالىم-تاربيەسى مول, – دەدى قالا تۇرعىنى ىرىسجان شامۇراتوۆا.
