قازاقستاننىڭ ۇلتتىق قۇراماسى پاراگۆاي, ۋكراينا, ماروككو, تايلاند, پاناما فۋتزالشىلارىمەن بىرگە ەكىنشى سەبەتكە ءتۇستى. وزگە سەبەتتەردە مىنا كوماندالار بار: ءبىرىنشى – وزبەكستان, برازيليا, يسپانيا, ارگەنتينا, پورتۋگاليا, يران. ءۇشىنشى – كوستا-ريكا, گۆاتەمالا, ۆەنەسۋەلا, جاڭا زەلانديا, كۋبا, ليۆيا. ءتورتىنشى – اۋعانستان, انگولا, حورۆاتيا, فرانتسيا, نيدەرلاند, تاجىكستان. ەستەرىڭىزگە سالا كەتەيىك, تورتكۇل دۇنيەنىڭ مىقتىلارى باس قوساتىن بايراقتى باسەكەنىڭ جولداماسى ءۇشىن تارتىستىڭ ەليتالىق كەزەڭىندە جەرلەستەرىمىز نيدەرلاند, رۋمىنيا, ازەربايجان قۇرامالارىن ۇتتى.
فۋتزالدان الەم چەمپيوناتى 1989 جىلدان بەرى ۇيىمداستىرىلىپ كەلەدى. اتالعان جارىستا ەڭ كوپ ولجاعا كەنەلگەن – برازيليا قۇراماسى. وڭتۇستىك امەريكانىڭ وعلاندارى 5 رەت باس جۇلدەنى ولجالادى. بۇعان قوسا برازيليالىقتاردىڭ قورجىنىندا 1 كۇمىس پەن 2 قولا مەدال بار. يسپانيانىڭ ورەندەرى بەس باسەكەنىڭ فينالىنا شىعىپ, ەكى رەت توپ جاردى. پيرەنەي تۇبەگىنىڭ تۇلەكتەرى تاعى ءبىر جارىستى ءۇشىنشى ورىنمەن قورىتىندىلادى. ارگەنتينا (+1 كۇمىس) مەن پورتۋگاليا (+1 قولا) قۇرامالارى ءبىر-ءبىر رەتتەن تەڭدەسسىز دەپ تانىلدى. سونداي-اق جۇلدە العاندار قاتارىندا نيدەرلاند (1 كۇمىس), اقش (1 كۇمىس, 1 قولا), يتاليا (1 كۇمىس, 2 قولا), رەسەي (1 كۇمىس, 1 قولا), يران (1 قولا) بار.
سوڭعى الەم چەمپيوناتى وسىدان ءۇش جىل بۇرىن ليتۆادا ۇيىمداستىرىلدى. بالتىق جاعالاۋىندا پورتۋگاليانىڭ ويىنشىلارى الدىنا جان سالمادى. فينالدا ولار ارگەنتينانى 2:1 ەسەبىمەن ۇتتى. قولا مەدال ءۇشىن ماتچتا برازيليا مەن قازاقستان قۇرامالارى كۇش سىناستى. بۇل باسەكە 4:2 ەسەبىمەن برازيليالىقتاردىڭ پايداسىنا شەشىلدى. اتالعان جارىستىڭ توپتىق سايىسىندا جەرلەستەرىمىز كوستا-ريكا (6:1) مەن ليتۆانى (3:0) جەڭىپ, ۆەنەسۋەلامەن (1:1) تەڭ ءتۇستى. 1/8 فينالدا تايلاندتى (7:0) تىزە بۇكتىرسەك, شيرەك فينالدا يرانعا (3:2) شاڭ قاپتىردىق. جارتىلاي فينالدا پورتۋگاليامەن (2:2) تەڭ تۇستىك. بىراق پەنالتي سوعۋ بارىسىندا (4:3) پيرەنەي تۇبەگىنەن كەلگەن جىگىتتەردىڭ جولى بولدى. ناتيجەسىندە, ليتۆاداعى دوپ دوداسىن وتانداستارىمىز ءتورتىنشى ورىنمەن قورىتىندىلادى.
ال سوعان دەيىن قازاقستاننىڭ فۋتزالشىلارى دۇنيەجۇزىلىك دوداعا ەكى رەت قاتىسقان ەدى. 2000 جىلى گۆاتەمالادا توپتىق تۋرنيردە سۇرىنسەك, 2016 جىلى كولۋمبياداعى جارىستىڭ 1/8 فينالدىق مەجەسىندە يسپانياعا (2:5) ەسە جىبەردىك.
