فوتو: qaz.ulysmedia.kz
«قازگيدرومەت» رمك ءباسپاسوز حاتشىسى الينا يسماگۋلوۆا وكق-دا وتكەن بريفينگ بارىسىندا جاقىن كۇندەرى قازاقستاننىڭ باسىم بولىگىنىڭ اۋا رايىنا اتموسفەرالىق فرونتالدى بولىكتەر اسەر ەتەتىنىن, وعان بايلانىستى ەلىمىزدىڭ وڭتۇستىگىندە, وڭتۇستىك-شىعىسىندا قاتتى جاڭبىر جاۋاتىنىن ايتتى.
«رەسپۋبليكامىز بويىنشا كۇن رايى بۇزىلادى, اتاپ ايتقاندا, نايزاعاي ويناپ, جەلدىڭ كۇشەيۋى كۇتىلەدى. ال وڭتۇستىكتە, وڭتۇستىك-شىعىستا, ورتالىقتا بۇرشاق تۇسەدى, وڭتۇستىكتە, وڭتۇستىك-شىعىستا داۋىل تۇرادى, وڭتۇستىك-باتىستا, وڭتۇستىكتە, باتىستا شاڭدى داۋىل سوعادى, سولتۇستىكتە تۇمان بولادى دەپ بولجانادى. تۇندە سولتۇستىك قازاقستان وبلىسىندا, اقمولا, قوستاناي وبلىستارىنىڭ باتىسىندا, سولتۇستىگىندە, اقتوبە وبلىسىنىڭ سولتۇستىك-باتىسىندا, پاۆلودار وبلىسىنىڭ شىعىسىندا, وڭتۇستىگىندە, ۇلىتاۋ وبلىسىنىڭ سولتۇستىگىندە 1-6 گرادۋس ۇسىك جۇرەدى», دەدى سپيكەر.
ماڭعىستاۋ وبلىسىنىڭ باسىم بولىگىندە, اتىراۋ وبلىسىنىڭ وڭتۇستىگىندە, شىعىسىندا, قىزىلوردا وبلىسىنىڭ باتىسىندا, وڭتۇستىگىندە, ورتالىعىندا, تۇركىستان وبلىسىنىڭ سولتۇستىگىندە, اباي, قاراعاندى, اقتوبە وبلىستارىنىڭ وڭتۇستىگىندە ءورت قاۋپى جوعارى بولادى.
2024 جىلعى 1-2 مامىر ارالىعىندا قاتتى جاۋىن-شاشىن بولجامىنا بايلانىستى جەتىسۋ وبلىسىنىڭ تاۋ جانە تاۋ ەتەگىندەگى ايماقتاردا بەتكەيلىك اعىندىنىڭ قالىپتاسۋى جانە وزەندەردە سۋ دەڭگەيلەرىنىڭ كوتەرىلۋى كۇتىلەدى.
سونداي-اق جامبىل وبلىسىنىڭ تاۋلى جانە تاۋ ەتەگىندەگى ايماقتارىندا باۋرايلىق اعىننىڭ قالىپتاسۋى جانە وزەندەردە سۋ دەڭگەيىنىڭ كوتەرىلۋى كۇتىلەدى.
