كىتاپتا 1905 جىلعى ورىس-جاپون سوعىسى ءورشىپ تۇرعان كەزەڭ بەينەلەنەدى. سول كەزدەگى قازاق دالاسىندا ورنالاسقان كەنىشتەردىڭ ءبىرىن ساتىپ العان بريتان تاۋ-كەن ينجەنەرى, «سپاسسك مىس كەندەرى» كاسىپورنىنىڭ باسقارۋشىسى نەلسون فەللدىڭ دالا ولكەسىندە وتكەن جىلدارى باياندالادى. ەستەلىكتەر قاراپايىم بايانداۋ تىلىمەن جازىلعان. دالا حالقىنىڭ ەرەكشە بولمىسى, تابيعاتپەن ۇيلەسىمدە ءومىر ءسۇرۋى, رياسىز پەيىلى, ءداستۇردى ساقتاۋى باتىس وركەنيەتىنىڭ وكىلىنە ەرەكشە تارتىمدى كورىنگەن, قىزىقتى اڭگىمەلەرىنە ارقاۋ بولعان. اۆتوردىڭ كورگەن-بىلگەندەرىن سول كەزدەگى كوشپەلىلەردىڭ تۇرمىسىن ەگجەي-تەگجەي تانىتاتىن ەتنوجازبا دەۋگە بولاتىنداي.
– كىتاپ ۇلكەن قىزىعۋشىلىق تۋدىرادى. ويتكەنى قازاقتاردىڭ ەتنوگرافياسىن زەرتتەۋشى نەمەسە ساياحاتشى ەمەس, مەنەدجەر ويى بار ادام جازعانىن وتە سيرەك كەزدەستىرەمىز. ەگەر ءناتۋراليستىڭ قازاق دالاسىنا ساپارى تۋرالى جازبالارىندا تابيعاتتىڭ كوركەم سيپاتتاماسىن, قۇستاردىڭ تۇرلەرىن, كيىز ءۇيدىڭ قۇرىلىسىن ءجيى كەزدەستىرسەك, وندا فەلل ءوزىنىڭ مىس بالقىتۋ زاۋىتىنىڭ ورىس جانە قازاق جۇمىسشىلارىمەن پراكتيكالىق مىندەتتەردى قالاي شەشەتىنىنە, جەرگىلىكتى جەردەن قاراجاتتى قالاي تاباتىنىنا نەمەسە شاحتالاردى قالاي ساتىپ تاباتىنىنا نازار اۋدارتقان. بۇل سول كەزدەگى اۋقاتتى قازاقتار اراسىنداعى احۋال مەن ەتيكەت نورمالارىن جاقسى تۇسىنۋگە مۇمكىندىك بەرەدى, – دەيدى ەڭبەكتى اۋدارۋعا اتسالىسقان «AmalBooks» باسپاسىنىڭ باسشىسى باقىتجان بۇحارباي.
ەڭ قىزىعى, نەلسون فەلل العاش رەت 1902 جىلى قازاق دالاسىنا ات باسىن تىرەپ, 1909 جىلعا دەيىن لايىقتى بايلىق جيناي العان. كەيبىر دەرەككوزدەرگە سايكەس, ايىنا 640 مىڭ دوللار پايدا تاپقان.
