مارافون قازاقستان حالقىنىڭ بىرلىگى كۇنى قارساڭىنا ارنايى ۇيىمداستىرىلدى. وعان قازاقستان حالقى اسسامبلەياسى باستاماشى بولدى. سونداي-اق استانا قالاسىنىڭ ترياتلون فەدەراتسياسى مەن تۋريزم جانە سپورت, مادەنيەت جانە اقپارات مينيسترلىكتەرى دە ۇيىتقى بولدى.
– «بىرلىك جۇگىرىسى» – قازاقستان حالقى اسسامبلەياسىنىڭ ء«بىز ءارتۇرلىمىز, بىراق تەڭبىز» قاعيداسىن نەگىزگە الدى. مۇنىڭ ءبارى مەرەكە قارساڭىندا حالقىمىزدىڭ بىرلىگىن نىعايتۋعا, ىنتىماعىمىزدى كورسەتۋگە, سالاماتتى ءومىردى قالىپتاستىرۋعا ۇلەسىمىز دەپ سانايمىز. جارىسقا 15 مىڭ ادام قاتىسىپ وتىر, ەلىمىزدە مۇنداي كولەمدە جۇگىرىس بۇرىن-سوڭدى بولعان ەمەس. سوندىقتان ءىس-شارانى ەندى جىل سايىن وتكىزۋدى ويلاستىرامىز, – دەدى قحا توراعاسىنىڭ ورىنباسارى مارات ءازىلحانوۆ.
ەلوردادا تاڭعى 7:00-دە باستالعانىنا قاراماستان, 2 مىڭعا جۋىق ادام جارىس جولىنا شىقتى. جۇگىرۋ باسەكەسىنە قالا تۇرعىندارىمەن قاتار, پارلامەنت دەپۋتاتتارى, استانا قالاسى اكىمىنىڭ ورىنباسارى ەسەت بايكەن, استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى ۆاسيلي لەۆيت, رەسپۋبليكالىق جانە استانالىق ەتنومادەني بىرلەستىكتەردىڭ, جاستار جانە ەرىكتىلەر ۇيىمدارىنىڭ, سپورت فەدەراتسيالارىنىڭ, جۇگىرۋ كلۋبتارىنىڭ وكىلدەرى قاتىستى. ايتا كەتەرلىگى, بيىل العاش رەت جاس سپورتشىلار ءبىر شاقىرىم قاشىقتىققا جارىستى.
– اتا-انام جەڭىل اتلەتيكامەن كاسىبي تۇردە اينالىسادى. ارينە, مەن دە ولاردان قالىس قالمايمىن. جارىستاردا ءوز قاتارلاستارىممەن بىرگە سايىسقا تۇسكەن ۇنايدى. مەن ءۇشىن جەڭىمپاز بولۋ مىندەتتى ەمەس. ۋاقىتقا دا قارامايمىن. باستىسى – جۇگىرۋدەن ءلاززات الامىن, – دەپ, 9 جاستاعى ماركۋس اتتى جاس قاتىسۋشى ءوز ويىن ءبىلدىردى.
مارەگە جەتكەندەردىڭ بارلىعىنا ەستەلىك مەدال بەرىلدى. ال جەڭىمپازدار جاس ساناتتارى بويىنشا باعالى سىيلىقتارمەن ماراپاتتالدى. جارىس اياسىندا بارلىق قاجەتتى قاۋىپسىزدىك شارالارى قامتاماسىز ەتىلىپ, كاسىبي ماماندار تورەشىلىك ەتتى.
– سالاماتتى ءومىر سالتىن ناسيحاتتاۋ ماقساتىندا ەلوردامىزدا ەرەسەكتەردەن 1 500, بالالاردان 300-دەي قاتىسۋشى جينالدى. بىلتىرعى جارىسىمىزدا تەك 500 مەتر, 2,5 جانە 5 شاقىرىمدى قۇراپ, 250-دەي عانا سپورتشى جارىسقان ەدى. ەندى كورىپ وتىرعانىمىزداي, 1 جىلدىڭ ىشىندە 10, 21 شاقىرىمدى دا قوسىپ, قاتىسۋشىلاردىڭ قاتارى 6-7 ەسەگە ارتتى. ەرەسەكتەردەن بولەك, 6-17 جاستاعى بالالار 1 شاقىرىم جۇگىرەدى. بۇل – جاقسى ءداستۇر. ويتكەنى بالا اتا-اناسىنىڭ ايتقانىن ەمەس, كورگەنىن ىستەيدى. تاعى ءبىر جاقسى جاڭالىعىمىز – تراسسا حالىقارالىق جەڭىل اتلەتيكا فەدەراتسياسى تاراپىنان مويىندالعان. ياعني وسى كورسەتكىشپەن وزگە دە ءىرى حالىقارالىق مارافوندا باق سىناۋعا بولادى. مۇنىمەن توقتاپ قالمايمىز. كەلەر جىلى تولىققاندى 42,1 شاقىرىمدى ەنگىزسەك دەيمىز, – دەدى استانا قالاسى ترياتلون فەدەراتسياسىنىڭ پرەزيدەنتى ەۆگەني بولگەرت.
ءىس-شارا سوڭىندا قاتىسۋشىلار «تازا قازاقستان» اكتسياسى اياسىندا سول ماڭداعى قوقىستاردى تازالاپ كەتتى.
– اينالامداعى دوستارىم جۇگىرۋگە ىقپال ەتتى. ولار: «جۇگىرۋدىڭ ەش قيىندىعى جوق, ارنايى زالدى قاجەت ەتپەيدى. كەز كەلگەن ۋاقىتتا اياقكيىم كيىپ, باستاي بەرەسىڭ» دەگەننەن كەيىن, جۇگىرۋگە بەل بۋدىم. ءساۋىر ايىندا ەڭ العاش قولعا الىپ, 5 شاقىرىمعا تىركەلدىم. قورقىنىش بولدى. مارەگە جەتە الماي, ۇيات بولا ما دەپ ويلادىم. قۇدايعا شۇكىر, 35 مينۋتقا جەتكىزبەي, قاشىقتىقتى باعىندىردىم. وسىنىڭ ءوزى جەتىستىك بولعانىمەن, 20-25 مينۋتتا جۇگىرەتىندەرگە قىزىعىپ, مەن دە وسىلار سەكىلدى بولسام دەگەن جوسپارىم بار. سالاماتتى ءومىر سالتىن ۇستانۋمەن قاتار, «تازا قازاقستان» اكتسياسىندا اينالاداعى قوقىستاردى دا جيناۋعا ءوز ۇلەسىمدى قوستىم. ەرتە تۇرعاننىڭ ناتيجەسىندە قوعامعا دا سەپتىگىمدى تيگىزدىم دەپ ويلايمىن, – دەدى استانا قالاسىنىڭ تۇرعىنى وركەن.
