بالقاشتان جولداعان گۋمانيتارلىق كومەكتە ازىق-ت ۇلىكتەر, كۇرەك, قاجەتتى قۇرال-سايماندار, كىلەم, توسەك-ورىندار مەن جەكە گيگيەنالىق زاتتار, وزگە دە قاجەتتى زاتتار قامتىلعان.
– ءبىز باسپاناسىنان ايىرىلىپ, كوڭىلىنە قاياۋ تۇسكەن بۇقارانىڭ جاعدايىمەن تانىسپىز. قازىر كوپتەگەن وڭىردە سۋ تاسقىنى ءجۇرىپ, ادامدار زارداپ شەگىپ جاتىر. وسىنى ەستىپ, كورىپ وتىرعان بالقاش كولى جاعاسىن جايلاعان شاشۋباي, اقجايداق, دەرەسىن سياقتى اۋىلداردىڭ حالقى ءۇنسىز قالمادى. مەن باستاما كوتەرگەن كۇننەن جەرگىلىكتى بەلسەندى عابيت, قۇرماش, قالاداعى جۇك تاسىمالىمەن اينالىساتىن «گازەل» كولىگىن جۇرگىزەتىن جىگىتتەر قولداۋ تانىتىپ, قاراجات جيناۋدى باستادى. حالىقتان 5 ملن تەڭگە قارجى جينالدى. 4 ملن تەڭگەگە كەرەك زاتتار الىندى. 1 ملن تەڭگە جول شىعىنىنا قاراستىرىلدى. بالقاش قالاسىنىڭ اكىمدىگى دە جول شىعىنىنا 1 ملن تەڭگە قارجى ءبولدى. باستى ماقساتىمىز – حالىقتىڭ اماناتىن قۇلسارىعا جەتكىزۋ, – دەيدى بەلسەندى توپتىڭ جەتەكشىسى ءبىرجان ماقسۇت.
قوعام بەلسەندىسى عابيت جاقىپوۆ قۇتقارۋشىلارعا ۇرمەلى قايىق, سۋدا كيەتىن ەتىك پەن ارنايى كيىمدەر, سۋ سورعىزاتىن قۇرىلعىلار, بوگەت جاساۋعا ارنالعان قاپتاردى كوپتەپ العاندارىن جەتكىزدى.
– قۇلسارىداعى زارداپ شەككەن حالىققا كومەك رەتىندە التى «گازەل» جۇكتى امان-ەسەن جەتكىزىپ بەردىك. وسى ورايدا بارلىق جاناشىر تۇرعىنعا العىسىمدى بىلدىرگىم كەلەدى. قالا اكىمى ساپار ساتاەۆ باستاعان قالا اكىمدىگىنىڭ ماماندارىنا, قايىرىمدىلىق ىسپەن اينالىسىپ جۇرەتىن انار ادامبەكوۆاعا, كاسىپكەرلەرگە, قولۇشىن بەرگەن وزگە دە ەتنوس وكىلدەرىنە, ءتىپتى يگى ىستەن قالىس قالماعان ستۋدەنت جاستارعا ءدان ريزامىن. ءبىرجان ماقسۇت ەسىمدى جاقسىلىققا جارشى بولعان باۋىرىمىزعا, ونى قولداعان بارشا ازاماتقا ريزاشىلىعىمىز شەكسىز. ەربول, عازيز, قۇرماش, اماندىق ەسىمدى اردا ازاماتتار قۇرباندىق شالىپ, ەلدىڭ اماندىعىن تىلەپ, قۇران وقىتىپ, قۇلسارىعا جولعا شىعاتىن ادامدارعا اس بەردى. جاقسىلىق جاساپ جارىسقان جۇرتتى كورگەندە, بىرلىگىمىزدىڭ بەكەم ەكەنىنە كوزىمىز جەتتى. قۇلسارىداعى ەل-جۇرتقا بارىنشا باسۋ ايتىپ, بىرگە ەكەنىمىزدى جەتكىزدىك. ولار دا العىسىن جاۋدىرىپ جاتىر, – دەيدى عابيت جاقىپ.
بالقاش قالاسىنان قۇلسارىعا باعىت العان قايىرىمدىلىق كەرۋەنىنە تۇرعىندار ءالى دە قارجى اۋدارىپ جاتىر. بالقاش ءوڭىرىنىڭ جاناشىر ازاماتتارى مەن ەرىكتىلەرى تۇسكەن قارجىنى ارنايى اشىلعان ەسەپشوتتارعا اۋدارادى.
بالقاش قالاسى
