فوتو: ۆالەري بۋگاەۆ
«تازا قازاقستان» اۋقىمدى جالپىۇلتتىق ەكواكتسياسى پاۆلودار وبلىسىندا دا ۇيىمداستىرىلدى. وبلىس ورتالىعىندا جاپپاي سەنبىلىك وتكىزىلىپ, جۇزدەگەن ءتۇپ اعاش ەگىلدى. پاۆلودار قالاسىنىڭ اكىمى حاسار حابىلبەكوۆ وبلىس ورتالىعىن ودان ءارى كوگالداندىرۋ جوسپارى باستالىپ كەتكەنىن حابارلادى. بيىل پاۆلودار قالاسىنىڭ اۋماعىندا 20 مىڭعا جۋىق كوشەت سالىنادى. ونىڭ تەڭ جارتىسى «جاسىل بەلدەۋگە» ەگىلەدى. سونداي-اق نەگىزگى كوشەلەردەگى شىرىگەن اعاشتار كەزەڭ-كەزەڭىمەن اۋىستىرىلادى.
بىلتىر اۆتوماتتاندىرىلعان سۋارۋ كەشەندەرى عاشىقتار گۇلباعىندا, ورتالىق گۇلباقتا ورناتىلدى. بيىل وسىنداي جۇيەلەر ورتالىق جاعالاۋدا, كونستيتۋتسيا گۇلباعىندا, ءماشھۇر ءجۇسىپ اتىنداعى ورتالىق مەشىتتىڭ اۋلاسىندا, «قازقوناق» تابيعي ەسكەرتكىشى اۋماعىندا پايدا بولادى.
وڭىرلىك اقپارات جانە ازاماتتىق دامۋ باسقارماسىنىڭ دەرەگىنشە, ەكولوگيالىق اكتسياعا بۇل كۇنى 50 مىڭ ادام ءۇن قوسقان. تازالىق جۇمىسىنا 1 200 تەحنيكا جۇمىلدىرىلىپ, 10 مىڭ توننا قوقىس شىعارىلدى. ەلدى مەكەندەردە 8 مىڭ اعاش كوشەتى, 5 مىڭ بۇتا ەگىلگەن.
اكتسيانى وبلىس ورتالىعىنداعى №36 ەكولوگيالىق باعىتتاعى مەكتەپ تۇلەكتەرى دە قولدادى. ولار مەكتەپتىڭ تۇلەكتەر اللەياسىنا جۇزدەگەن ءتۇپ اعاش كوشەتىن ەكتى.
«اعاش ەگۋ ءبىزدىڭ مەكتەپتى دامىتۋعا بەرىلىپ وتىرعان مۇمكىندىك دەپ قابىلداعان دۇرىس. بۇل كوشەتتەر جاقىن جىلداردا سوڭىمىزدان وكشەلەپ كەلە جاتقان باۋىرلارىمىز بەن سىڭلىلەرىمىزگە امانات بولىپ, بىرگە جەتىلە تۇسپەك. ال بۇل ءداستۇردى وزگە دە تۇلەكتەر جالعاستىرا بەرەدى», دەيدى مەكتەپ تۇلەگى, قازىرگى كۇنى اتالعان ءبىلىم شاڭىراعىنىڭ كوركەم ەڭبەك مۇعالىمى الەنا كوريونوۆا.
بۇل مەكتەپتىڭ اۋلاسىندا قايىڭ, ۇيەڭكى, قاراعاي مەن شىرشا, بوز ارشا جانە باسقا اعاش تۇرلەرى ءوسىپ تۇر.
پاۆلودار وبلىسى
