بقو-دا سۋ تاسقىنىنىڭ الدىن الۋ جانە اۆاريالىق-قۇتقارۋ جۇمىستارى ءالى دە جالعاسىپ جاتىر.
وبلىستا حالىقتى ەۆاكۋاتسيالاۋ, قۇلاقتاندىرۋ, بوگەتتەردى نىعايتۋ جۇمىستارى جالعاسىپ جاتىر. سوڭعى تاۋلىكتە 12 ادام ەۆاكۋاتسيالاندى. سۋ تاسقىنى كەزەڭىندە جالپى وبلىس بويىنشا 14 001 ادام ەۆاكۋاتسيالاندى. ونىڭ 5786-سى - بالا. 12 ەۆاكۋاتسيالىق پۋنكتە 2 447 ادام ورنالاسقان. بقو تجد رەسمي وكىلى نۇرجان تولەۋىش وكق بريفينگىندە وسىلاي دەپ مالىمدەدى.
- جەرگىلىكتى ماسشتابتاعى 6 توتەنشە جاعداي جۇمىس ىستەپ جاتىر. جەدەل شتاب پەن كۇندەلىكتى مونيتورينگ پەن كەزەكشىلىك جۇرگىزىلىپ جاتىر. 1 ملن تەكشە مەتردەن استام قار سۋى سورىلدى. 1,3 ملن دانا قاپشىق توسەلدى. 26 617 توننا ينەرتتى ماتەريال توسەلدى. بۇل جۇمىستارعا 3114 ادام, 993 تەحنيكا, 71 سۋ سورۋ قۇرالى, 170 ءجۇزۋ قۇرالى مەن 1 اۋە كەمەسى جۇمىلدىرىلدى, - دەدى سپيكەر.
قوسىمشا كۇش-قۇرالداردىڭ جارتىسى اتىراۋ وڭىرىنە جىبەرىلدى. وبلىس بويىنشا جاعداي تۇراقتى جانە قاتاڭ باقىلاۋدا.
