تاراپتار ەكىجاقتى, سونىڭ ىشىندە وڭىرارالىق ىنتىماقتاستىقتىڭ جاي-كۇيى مەن كەلەشەگىن تالقىلادى.
– بىلتىر پرەزيدەنت قاسىم-جومارت توقاەۆ شىڭجاڭ-ۇيعىر اۆتونوميالىق اۋدانىندا بولدى. ودان كەيىن ءسىز قازاقستانعا جۇمىس ساپارىمەن كەلدىڭىز. بۇل وقيعالار شىڭجاڭ مەن قازاقستاننىڭ شىعىس وبلىستارى اراسىنداعى وڭىرارالىق بايلانىستارعا تىڭ سەرپىن بەردى. 1783 شاقىرىمعا سوزىلعان ورتاق شەكارامىز بار. وعان قوسا, وسى شىڭجاڭ اۋماعىندا ءبىزدىڭ 1,6 ميلليوننان استام قانداسىمىز, قازاق باۋىرىمىز تۇرادى. ولار قازاقستان مەن قىتاي اراسىنداعى «التىن كوپىرگە» اينالدى, – دەدى ەرلان قوشانوۆ.
ءماجىلىس توراعاسى شىڭجاڭ قازاقستان ءۇشىن دوستاس قىتايعا جول اشاتىنىن جانە بۇل ونىڭ ەكى ەل اراسىنداعى ماڭگىلىك جان-جاقتى ستراتەگيالىق ارىپتەستىكتى نىعايتۋداعى ءرولىن كورسەتەتىنىن اتاپ ءوتتى.
جيىن بارىسىندا ءماجىلىس توراعاسى ەكى ەلدىڭ دەپۋتاتتارى ءوزارا كەلىسىمدەر مەن ۋاعدالاستىقتاردىڭ ورىندالۋ ساپاسىن جۇيەلى تۇردە باقىلاي الاتىنىن اتاپ ءوتتى. باسقوسۋدا ساۋدا-ەكونوميكالىق سالاداعى ىنتىماقتاستىق ماسەلەلەرى دە قوزعالدى.
– قازاقستاننىڭ قىتايمەن ساۋدا-ساتتىعىنىڭ جارتىسىنان استامى شىڭجاڭ-ۇيعىر اۆتونوميالىق اۋدانىنا تيەسىلى. ءوسۋ قارقىنى كوڭىل قۋانتادى. بۇعان بىلتىر قاراشا ايىندا ەنگىزىلگەن ۆيزاسىز رەجىم وڭ اسەر ەتكەنى ءسوزسىز. جاقىندا پرەزيدەنت قاسىم-جومارت توقاەۆتىڭ تاپسىرماسىمەن ءۇرىمجى قالاسىندا «QazTrade» ساۋدا وكىلدىگى اشىلادى. ونىڭ قىزمەتى ەكى ەل اراسىندا ىسكەرلىك بايلانىستاردى نىعايتۋعا باعىتتالادى, – دەدى ەرلان قوشانوۆ.
تاراپتار قازاقستان اۋماعىندا ەلەكتروندى ساۋدانى دامىتۋ ءۇشىن بىرلەسكەن وڭىرلىك قويما ينفراقۇرىلىمىن قۇرۋ يدەياسىن دا تالقىلادى. سونداي-اق كولىك-لوگيستيكا, اۋىل شارۋاشىلىعى, ترانسشەكارالىق سۋ رەسۋرستارى جانە تۋريزم سالالارىنداعى ىنتىماقتاستىق ماسەلەلەرىنە ەرەكشە نازار اۋدارىلدى.
ءوز كەزەگىندە ما سينجۋي پرەزيدەنت قاسىم-جومارت توقاەۆتىڭ شىڭجاڭ-ۇيعىر اۆتونوميالىق اۋدانىنا جاساعان ساپارىنىڭ ماڭىزدىلىعىنا توقتالدى. بۇگىنگى تاڭدا شىڭجاڭنىڭ قازاقستان وڭىرلەرىمەن ىنتىماقتاستىعى بۇرىن-سوڭدى بولماعان تاريحي دەڭگەيگە جەتتى. ول قازاقستان قىتايدىڭ ء«بىر بەلدەۋ, ءبىر جول» جاھاندىق باستاماسىن جۇزەگە اسىرۋداعى نەگىزگى ستراتەگيالىق سەرىكتەسى ەكەنىن اتاپ ءوتتى. جاقىن ارادا «اياگوز-تاچەن» ءۇشىنشى تەمىرجول شەكارا وتكەلىنىڭ قۇرىلىسى باستالادى. ول شىڭجاڭنىڭ قازاقستاننىڭ شەكارالاس وبلىستارىمەن بايلانىسىن ودان ءارى كەڭەيتىپ, قىتايدىڭ ورتالىق ازياعا التىن قاقپاسى رەتىندەگى ءرولىن نىعايتادى.
– قازاقستان رەفورمالاردى جۇيەلى تۇردە جۇرگىزىپ كەلەدى. ءبىز سىزدەر ءۇشىن قۋانىشتىمىز. پرەزيدەنت توقاەۆ باستاعان رەفورمالار ءوز جەمىسىن بەرەدى دەپ سەنەمىز. 2029 جىلعا قاراي قازاقستان ەكونوميكاسىنىڭ ءوسۋى قاراپايىم ازاماتتاردىڭ ومىرىنە ەكى ەسە وڭ اسەر ەتەرى ءسوزسىز. بۇل جەردە قىتاي مەن قازاقستاننىڭ الەۋەتى بايلانىستى جانە ءبىر-ءبىرىن تولىقتىراتىنى ماڭىزدى. ءبىزدىڭ ەنەرگەتيكا, اۋىلشارۋاشىلىعى, گۋمانيتارلىق سالادا بولاشاعىمىز زور, – دەدى ما سينجۋي.
ساپار بارىسىندا ءماجىلىس دەلەگاتسياسى قىتايداعى ەڭ ءىرى اۋىل شارۋاشىلىعى تەحنيكاسىن ءوندىرۋشى «Xinjiang Xinyan» كومپانياسىنىڭ قىزمەتىمەن تانىستى.
