سۋرەتتى تۇسىرگەن – جانگەلدى ابدىعالىم
توقسانىنشى جىلدارى تارىداي شاشىلىپ, تەمىر-تەرسەككە ءوتىپ كەتپەي امان قالعان قاراعاندىداعى تاۋ-كەن, شاحتا جابدىقتارىن جوندەۋ زاۋىتى بۇگىندە ەڭسەسىن ابدەن تىكتەپ العان. بۇرىندارى تەك «قازاقمىس» كورپوراتسياسىنىڭ قاجەتىن وتەپ كەلگەن زاۋىتقا كەيىنگى ۋاقىتتا تاپسىرىس توپەلەپ تۇسە باستاپتى. قازىر باسقا دا الپاۋىت كومپانيالاردىڭ سۇرانىسىن قامتاماسىز ەتىپ جاتىر.
– ءبىز 2019 جىلعا دەيىن كومپانيانىڭ نەگىزگى تاپسىرىس بەرۋشىسى «قازاقمىس» كورپوراتسياسىنا ونىمدەر دايىنداپ كەلدىك. سول جىلدان باستاپ تەمىردەن تۇيىلگەن بۇيىمداردى پايدالانۋشىلار سانىن ارتتىرا باستادىق. بۇگىندە باسقا كومپانياعا جاسالعان بۇيىمدارىمىز 2 پايىزدان 22 پايىزعا دەيىن ءوستى. بۇرىن تەك تاۋ-كەن سالاسىنداعى كəسىپورىندارعا عانا جۇمىس ىستەسەك, قازىر مۇناي ءوندىرۋ سەكتورىنا دا ءوز ونىمدەرىمىزدى ۇسىنامىز. سونىمەن قاتار تەمىرجول سالاسىنا دا بەت بۇردىق. مىسالى, استانادا شىعارىلاتىن «تالگو» ەلەكتروۆوزىنا, «قامقور-استانا», «قامقور-لوكوموتيۆ» سەرىكتەستىكتەرىنە ارنايى بولشەكتەردى دايىندايمىز. بۇرىن كورپوراتسيا ءۇشىن 4 مىڭداي بۇيىم شىعارساق, ونى 6 مىڭعا دەيىن ارتتىردىق. ءبىر عانا قۇيۋ ءوندىرىسى تسەحى تەك قانا انكەرلىك گايكاعا ارنالسا, بۇگىندە 45 ءتۇرلى قوسالقى جابدىقتى شىعارادى. ايىنا əزىرلەنگەن 6-8 توننا بۇيىمدار 25 تونناعا دەيىن جەتتى, – دەيدى «Maker» جشس-KLMZ-نىڭ ءوندىرىس ديرەكتورى اندرەي سافونوۆ.
كاسىپورىن تاۋ-كەن شاحتالارىنىڭ, بايىتۋ فابريكالارىنىڭ, مىس بالقىتۋ زاۋىتتارىنىڭ جابدىقتارىن, تەحنيكالاردىڭ قوسالقى بولشەكتەرىن شىعارادى. ونىمەن قوسا, ىستەن شىققاندارىن جوندەيدى. كراندار, جەراستى اۆتوبۋستارى, فلوتاتسيالىق ماشينالار, كونۆەيەرلىك جەلىلەر, كومىر تاسيتىن ۆاگونەتكالار, شاحتا تۇبىندەگى سۋدى سوراتىن سورعى, جۇزدەگەن توننا توپىراقتى ۇستاپ تۇراتىن انكەرلىك بەكىتپە, كەنىشتەردەگى اۋىر تەحنيكانىڭ بولشەكتەرى, پويىزدىڭ تەجەگىشتەرى سىندى مىڭداعان بۇيىم جاسالادى.
زاۋىت ونىمدەرى قىرعىزستان مەن وزبەكستانعا ەكسپورتتالادى. ءوندىرىس ديرەكتورىنىڭ ايتۋىنشا, سەنىمنىڭ نىعايىپ, سۇرانىستىڭ كوبەيۋىنە باستى سەبەپ – تۇتىنۋشىلاردىڭ كوبەيۋى جانە تاجىريبەلى ماماندار قولىنان شىققان ناتيجەلى جۇمىس.
– «پودولسك ماشينا جاساۋ زاۋىتى» مەن «پرومسيبەنەرگو» كومپانيالارىنىڭ تاپسىرىسىن ورىندادىق. «پرومسيبەنەرگو» كومپانياسىنا جىلۋ ەلەكتر ورتالىعىنداعى اۋىر كرانعا ارنالعان قوسالقى بولشەك دايىنداپ, «پودولسك ماشينا جاساۋ زاۋىتىن» ارنايى مەتالل جابدىقتارمەن قامتاماسىز ەتتىك, – دەيدى اندرەي سافونوۆ.
ارينە, مۇنداي الپاۋىت كاسىپورىننىڭ قۋاتتى وندىرىستىك پاركى جاڭارىپ وتىرۋى كەرەك. بۇل تۇرعىدان ازىرگە كەمدىك جوق. جاڭا تەحنيكالىق جابدىقتار جەتكىلىكتى دەڭگەيدە. زاۋىت ىشىنە كىرە قالساڭىز, ءتۇرلى مەتالل جابدىقتارى مەن قوسالقى بولشەكتەر شىعاراتىن, مەتالل كەسەتىن ستانوك, دəنەكەرلەۋ روبوتى, دايىنداۋ, سىعىمداۋ, گازبەن كەسۋ جəنە يۋ ارقىلى جابدىقتاردى كۇردەلى جوندەۋدەن وتكىزەتىن تسەحتاردى كورەسىز. زاماناۋي قوندىرعىلاردىڭ نەشە اتاسى بار. سولاردىڭ ارقاسىندا زاۋىت بۇيىمدارى 100 پايىز دəلدىكپەن شىعادى. ەلىمىزدەگى سبب ستانوكتاردىڭ ەڭ اۋقىمدى پاركى وسىندا كورىنەدى.
زاۋىت وڭدەۋدىڭ بارلىق كەزەڭىندە «Renishaw» داتچيكتەرىن پايدالانىپ, ستانوكتا بولشەكتەردى ولشەپ جəنە يمپورتتىق كەسكىش قۇرالدى قولدانا وتىرىپ, جوعارى جىلدامدىق پەن جوعارى دəلدىكتە وڭدەۋدى قولدانادى. «SIEMENS NX», «Teamcenter» باعدارلامالىق ونىمدەرى بازاسىندا ءوندىرىستى كونسترۋكتورلىق جəنە تەحنولوگيالىق دايىنداۋدىڭ بىرىڭعاي جۇيەسىن, قۇرال ۇزىندىعىن انىقتاۋ ءۇشىن «Zollerd» ولشەۋ ماشيناسىن پايدالانادى. زاۋىتتىڭ كونسترۋكتورلىق-تەحنولوگيالىق باسقارماسى بار. كەز كەلگەن جاڭا بۇيىمنىڭ سىزباسى وسىندا سىزىلادى. مۇنداي فۋنكتسيالاردى اتقاراتىن 230 ستانوك بار.
كاسىپورىن ونىمدەرىنە تولقۇجاتىمەن قوسا كەپىلدىك تە بەرىلەدى. زاۋىتتىڭ قاراعاندىدان تىس, بالقاش, جەزقازعان قالالارىندا كəسىپورىندارى بار. ءۇش قالادا 2 مىڭعا جۋىق ادام ەڭبەك ەتەدى. جانىبەك بايعابەلوۆ باسقاراتىن ءىرى ماشينا جاساۋ كəسىپورنى 2021 جىلى «وندىرىستىك ماقساتتاعى ۇزدىك كاسىپورىن» اتالىمى بويىنشا «التىن ساپا» سىيلىعىن العان بولاتىن. «قازاقستاننىڭ ۇزدىك تاۋارى» دا اتانعان. ەل نارىعىنا عانا ەمەس, ەكسپورتقا اي سايىن توننالاپ ءونىم شىعارىپ وتىرعان بۇل زاۋىتتىڭ كەلەشەگى زور ەكەنىنە كۇمان جوق.
قاراعاندى وبلىسى
